Boletin di notisia, 13or

Hulandes mester testiguá den proseso di asesinato di desèmber na Sürnam
Den e proseso rònt di e asesinatonan di desèmber na Sürnam a yama algun hulandes prominente pa bin testiguá. Entre otro e èks agregado militar na Sürnam Hans Valk, i e èks embahador Vegelin van Claerbergen, asina Wereldomroep ta reportá. Aña pasa Vegelin van Claerbergen, den e programa di televishon hulandes Andere Tijden, a pone ku ta Valk tabata e sintí tras di e gòlpi di estado di Desi Bouterse na aña 1980. Na desèmber di aña 1982 e rezjim di e èks lider militar a mata 15 atversario polítiko. Bouterse a tuma responsabilidat polítiko so. E petishon pa tende e hulandesnan ta bini di e abogado di Bouterse, kende ta e sospechado mayó den e kaso. No ta sigur si e hulandesnan lo testiguá: nan no ta bou di obligashon pa biaha bai Sürnam.

Frakshon di CDA ta sigui deliberá ta kiko ke bai papia di dje
Frakshon di CDA awe ta bini huntu pa disidí si e partido ke papia tokante un koalishon ku VVD i PVV. Informadó Lubbers a pidi e partido djabièrnè pa hasi esaki, pero lider di frakshon Verhagen a bisa ku e ke papia ku su mes frakshon promé. Tambe el a bisa ku su partido ta keda pone kondishon na e deliberashonnan. CDA entre otro ke pa PVV legumai su proposishonnan manera prohibishon di koran, belasten riba lensu di mara kabes, i registrashon étniko. E kombersashonnan entre e lidernan di frakshon di e tres partidonan por resulta tambe den un gabinete di minoria ku VVD i CDA, ku sosten di PVV. Segun Lubbers no ta realista pa papia di un gabinete di sentro, ku VVD, CDA i PvdA promé ku investigá e opshon derechista profundamente. Formashon di un gabinete di sentro ta parse problemátiko pasobra PvdA a laga sa ku nan no tin masha interes.

Mas graf kolektivo na Mehiko
Den nort di Mehiko atrobe a diskubri un graf kolektivo. Partí den algun buraku, ehersito a diskubrí 23 kurpa sin bida. E kantidat aki por subi pasobra ainda no a kaba e investigashon. Segun ehérsito bandanan di droga tabata usa e luga pa torturá i ehekutá nan víktimanan. Último simannan den nort di Mehiko a diskubri dos di e grafnan aki. Pa motibo di e gueranan di droga último kuater aña mas ku 25 mil mehikano a pèrdè nan bida.

Alarma di kandela i gas tabata pagá na e plataforma di bora Deepwater Horizon
E alarma di kandela di gas di Deepwater Horizon den Golfo di Mehiko tabata pagá parsialmente for di sigur un aña promé ku e eksploshonnan. Asine e tékniko hefe di e plataforma di bora a bisa un komishon di investigashon na Estados Unidos. Na aprel tabatin dos eksploshon riba Deepwater Horizon; 11 hende a pèrdè nan bida. Segun e tékniko no a atvertí e trahadónan. E tékniko, ku tabata den servisio di e doño di e plataforma, Trans-ocean, ta bisa ku esnan na enkargo tabata sa ku e alarma tabata pagá parsialmente. Nan no tabata ke pa alarma falsu lanta e trahadónan for di soño. BP a hür Deepwater Horizon pa bora pa zeta den Golfo di Mehiko.

Tempestat Bonnie ta pèrdè forsa
E tempestat tropikal Bonnie a pèrdè forsa riba e estado merikano Florida. E sentro nashonal di orkan ta bisa ku Bonnie a baha bira un depreshon tropikal. Awo Bonnie ta pasa riba Golfo di Mehiko i por gana forsa atrobe. Pa prekoushon BP a para trabou na e pos di bora daña den Golfo. A kita e barkunan ku tabata yuda kombatí e desaster di zeta. BP ta konfia ku e kapa pa sera e pos kibrá lo sigui funkshoná durante di e tempestat.

Nort Korea ta menasá di usa su armanan nuklear
Nort Korea ta menasá di usa su armanan nuklear si Estados Unidos i Suit Korea sigui nan ehersisio militar. Pyong Yang ta yama e ehersisio konhunto ku ta kuminsá mayan un provokashon. Ademas e rezjim ta bisa ku e ta kla pa un guera sagrado. Washington den un reakshon a bisa ku e no ta interesá den un pustamentu di boka i ta preferá di mira Nort Korea tuma un aktitut konstruktivo. Den e ehersisio konhunto tin binti barku i supmarino, shen avion i 8 mil militar ta partisipá. E tenshon entre Nort i Suit Korea a subi despues ku a senk un barku suit koreano. Investigashon internashonal a saka 'fo ku ta trabou di Nort Korea.

Iran ta bai hasi biahe di espasio
Promé ku aña 2020 Iran ke hasi un biahe espasial ku tripulashon. Pa realisá esaki e pais ta aselerá su programa di biahe espasial ku sinku aña. Asina presidente Ahmedinedjad a bisa na Teheran. E aselerashon di e programa segun Ahmedinejad ta un reakshon riba e resolushonnan nobo di Nashonnan Uni kontra Iran. Kuminsamentu di e aña aki Iran a hasi un tèst ku un rakèt ku lo a hiba un satélite di komunikashon den espasio. Oksidente ta teme ku ta trata di rakèt ku tin un kabes nuklear. Iran ta ninga ku e ta trahando riba un arma nuklear.

Final di Vierdaagse di Nijmegen
Ayera, riba e di kuater i delaster dia di e Vierdaagse di Nijmegen masha poko hende a kai afó. 198 hende no a alkansá final. Den añanan anterior e kantidat aki tabata kasi dòbel. Sigur 36 mil hende a kana Vierdaagse; mas o menos 3400 a kai afó. Awe meinta un hòmber di Gran Britania a pasa final komo esun di promé. Aña pasá tambe e tabata esun di mas promé.

Pronóstiko di wer
Prome tin nubia aki aya, ma for di west shelu ta kuminsá klara mas i mas. Ku un temperatura di 19 pa 22 grado no ta kalor. For di mayan lo bini mas variashon den wer.