Sentensha Breivik satisfaktorio pa víktima i famia dje defuntunan

Víktimanan i famia djesnan ku a peresé den e atentadonan ku Anders Breivik a kometé ta satisfecho ku veredikto di tribunal na Oslo, asina dos di nan abogadonan a bisa. E kos mas importante ta ku Breivik lo no sali liber mas, asina e abogadonan di. Nan ta sali for dje punto di bista lo prolongá e kastigu kadabé despues ku Breivik sinta esun máksimo di 21 aña ku wesnan a dikta. Manera por a spera a asesino múltiple lo no apelá su kaso. Fe promé el a anunsiá ku lo e bringa e sentensia únikamente si deklar'é moralmente inkapas, kos ku tribunal no a hasi, kontrario na loke fiskalnan di OM a demandá. Abogado di Breivik a bisa ku e kastigu no a kue su kliente di sorpresa, es mas: e norwechi di 33 aña a dal un smail ora ku a pronunsiá e kondena.

Isaac bayendo awó pa Haiti i San Dumingu
Tormenta tropikal Isaac a tumba den direkshon di República Dominicana i di Haiti. Isaac a trese hopi yobida di awa na Puerto Rico. No ta sigur si ta fe djawe e tormenta ta bola bira orkan. Haiti ta prekupá ku e tormenta, komo ku ainda tin hopi hende bibá den tènt fe tempu dje temblor ku a sakudí e pais dos aña pasá. Florida tambe ta tur hanshá, pasó ta ferwagt ku Isaac lo pasa pegá ku Tampa, sitio dje konvenshon di partido Republikano, programá pa kuminsá djaluna awor. Felismente e tormenta tropikal no a kousa mashá molèster na Islariba.

Kòrsou tin ku presentá ekonomisashon
Presentashon di plannan di ekonomisashon di gobièrnu di Kòrsou mester sigui tòg promé ku fin dje luna akí. Raad van State, o sea Konseho di Estado, a rechasá e apelashon di gobièrnu di Kòrsou kontra e asina yamá 'aanwijzing' di Konseho di Minister di Reino. No mas tardá ku promé di sèptèmber mester presentá un plan di ekonomisashon pa rèim 150 mion di florin. Gobièrnu di Kòrsou no ta kere ku e 'aanwijzing' ta nesesario i ademas e ta violá outonomia dje pais. No tin klaridat si ainda gobièrnu ta kapas di entregá su plannan di ekonomisashon na tempu.

Ta basta bishita i spatment'i sèn na Antia
Kolaboradornan di Commissariaat voor de Media no tin mester di bishitá Antia tur aña mas. Minister Marja van Bijsterveldt di Asuntunan di Media lo ahustá e palabrashonnan al respekto. Aktualmente ta pará den lei ku Commissariaat tin ku bai Saba i Boneiru tur aña, por ehèmpel pa papia riba asuntunan manera libertat i ekspreshon liber. Van Bijsterveldt ta haña ku mester traha efisientemente. E ta kere ta dispidiment'i sèn si papia di televishon na Saba, manera notisiero RTL a informá ayeranochi, siendo ku aya no tin emisora televisivo. Despues di transmishon di notisia di RTL, minister Spies a bisa ku ámtenarnan no tin mester di hiba tantu bishita di trabou asina na Antia. RTL Nieuws ta informá ku último tres aña ámtenarnan di ministerio hulandes di Asuntunan Interno i di Hustisia so kaba a biaha pa Antia na 600 okashon, kos ku a kosta dos mion di euro.

Petishon ekstradishon trafikante ruso di arma
Rusia a pidi Estados Unidos pa ekstraditá Viktor Bout, un kontrabandista internashonal di arma. Un tribunal merikanu a sentensiá e ruso n'un kastigu di prizòn te 25 aña pa konspirashon ku abastesementu di gueriya antimerikanu ku arma na Colombia. Detaye interesante den investigashon di Bout, ku porsierto a dura años, ta ku agentenan merikanu a kompilá entre otro prueba na Kòrsou. E agentenan akí a hasi komosifuera ta komandante gueriyero di FARC nan ta.

Chapman por bien lubidá adelanto di libertat
No ta adelantá libertat di Mark David Chapman, e asesino di John Lennon, kantante di The Beatles, asina outoridatnan di estado merikanu New York a disidí. Ta pa di shete biá ku Chapman ta pidi pa lag'é sali fo'i prizòn promé ku tempu. Aki dos aña e por purba dinobo. Entretantu Chapman tin 57 aña. El a tira Lennon mata 8 di desèmber 1980 na porta di apartamentu dje kantante na New York.

Pago na kam'i behes lo baha drástikamente
Penshun di behes di miones di hulandes lo baha drástikamente próksimo añanan. Minister Henk Kamp di Asuntunan Sosial ta kere ku ta 'sumamente probabel' ku hopi fondo di penshun mester kòrta loke penshonadonan tin ku risibí. E mandatario ta studiando riba medidanan pa 'limitá redukshon di penshun maske t'un poko'. Fin dje aña akí numa ta sa kon ta pará k'esei. Basta tempu kaba fondonan di penshun ta den pèrtá. E problema mas grandi pa nan ta e porsentahe abou di interes debí n'e krísis di euro. Ta a base dje porsentahe ei nan tin ku saka afó si por sigui kumpli ku nan kompromisonan riba término largu tambe.

Potrèt di prens Harry blo sunú tòg den The Sun
The Sun, un diario di farándula britániko, lo publiká e potrètnan di prens Harry blo sunú tòg awé. Promé k'esei tur korant i wèpsait britániko a disidí di lébumai publikashon, debí na palabrashonnan riba privasidat di Famia Real di Gran Bretaña. Riba e dos potrètnan ku a saka den un hotèl na Las Vegas, por mira prínsipe Harry di 27 aña di edat den trahe di Adán huntu ku'n damita, tambe blo sunú. The Sun ta kleim k'e ta respetá famia Real, ma ku prohibishon di publikashon ta pugna ku libertat di prensa. Prens Harry ta yu hòmber menor di prens Charles i di su èks esposa, defuntu prensès Diana.

Fox News a veriguá identidat komando eskritor
Notisiero televisivo merikanu Fox News ta kleim di a veriguá identidat dje miembro di komando Seals, ku tabata envolví den matamentu di Osama bin Laden i ku a skibi un buki dje mishon ei. Fox News ta bisa ku ta Matt Bissonette, un èks komando di 36 aña prosedente di Alaska a skibi e buki. Editor dje buki ta bisa ku e ta ún dje promé unnan ku a penetrá den kamber di Bin Laden aña pasá. Supuestamente e tabata presente ora a tira Bin Laden mata.

Siklista famá kansá di bringa agensia antidoping
Lance Armstrong a para su lucha kontra e agensia merikanu antidoping, asina el a skibi den un deklarashon riba su mes wèpsait. IOC, o sea komité olímpiko internashonal i UCI, Union internashonal di koredó di baiskel di kareda no ke duna komentario ainda riba desishon di Lance Armstrong. E instansha ku ta kombatí doping ta akusá e èks koredó merikanu di baiskel di kareda di uzo di supstansha pa stimulá su prestashon. Armstrong a gana Tour de France shete be. El a purba kita e denunsia for di mesa den un huisio sumario k'el a entamá, ma tribunal a rechasá su petishon. E agensia a reakshoná bisando di ke kita tur premio di kampionato for di Armstrong i ku e ke ekskluy'é di karedanan di siklismo.

Churandy a bolbe drecha rèkert hulandes
Koredó di kareda Churandy Martina a drecha rèkert hulandes p'a distansha di 200 meter na kompetishon di atletismo na Lausanne, Suisa. Martina a kor'é den 19.85 i piku di sekònde. E rèkert bieu di 19.94 tambe tabata di dje. Na Lausanne tambe kampion olímpiko hamaikino Usain Bolt a kore pasa Churandy Martina bai.

Wer na Hulanda
Awe ta medio nublá ku algun yobid'i awa den nòrt, solo ta bria sí debésenkuando. Temperatura ta 20 te 23 grado. Mañan djasabra tin mas yobida ainda i ta mas friu tambe.