Boletin di notisia, 13:00 or

Orkan Bonnie ta para trabou di BP den Golfo di Mehiko
Den Golfo di Mehiko BP a kuminsá kita e barkunan ku ta yuda kombatí e desaster di zeta. Motibu ta e orkan Bonnie ku ta tumando rumbo pa e pos di zeta ku ta lèk. Probablemente e orkan lo yega einan mayan. A para trabou na e pos kaba pa motibu di e mal tempu ku ta bini. Awo a disidí di kita e barkunan tambe. Probablemente esaki lo pone e trabou kore retraso. Fin di yüni tambe mester a para e trabou pa motibu di mal tempu. BP ta laga e kapa nobo ku a pone riba e buraku para. Ma pa motibu di e evakuashon e kompania di zeta no por kontrolá mas si tur kos ta sigui bon.

Informadó Lubbers ta kontinuá su tarea
Awe informadó Lubbers lo kontinuá kombersashonnan ku e presidentenan di frakshon den parlamento. Ayera e lidernan di frakshon di VVD, PvdA, PVV i GroenLinks a pasa kaba. Lider di VVD Rutte i Geert Wilders di PVV ke pa mira posibilidat di un gabinete derechista di VVD, PVV i CDA promé. Lider di PvdA Cohen tambe ta haña esaki hustu, ounke ku ainda e ta preferá Paars-plus. Lider di GroenLinks Halsema a enfatisá ku mester bini un gabinete di mayoria. "I si esei ta un gabinete derechista, lo mi konformámi ku esei", el a bisa. Awe Lubbers lo kuminsá na risibi su kopartidario Verhagen di CDA. Despues ta toka turno na e otro lidernan di frakshon i e tres informadónan anterior Tjeenk Willink, Rosenthal i Wallage.

Presidente Chavez ta kibra tur laso diplomátiko ku Colombia
Presidente venesolano Chávez ta kibra tur laso diplomátiko ku Colombia. Na frontera colombiano inmediatamente e estado di alerta di mas haltu lo drenta na vigor, asina el a bisa den un diskurso na televishon. El a reakshoná riba akusashonnan nobo di outoridatnan kolombiano ku Venezuela ta atmití miembronan di e ehersito di gueria FARC. Na un kumbre internashonal na Washington e embahador kolombiano a mustra imagen ku lo a demonstrá ku Venezuela ta hospedá sigur 1500 rebelde kolombiano. Segun Chávez esaki ta ko'i kèns i Colombia su aktitut ta agresivo. El a bisa ku no ta ked'é nada mas ku kibra tur laso ku Colombia. E dos paisnan tin problema ku otro pa basta tempu kaba. Chávez ta ninga di ta presente na huramentashon di e presidente kolombiano nobo Santos.

Arsobispo Tutu ta retirá di bida públiko
Arsobispo Tutu ta retirá di bida públiko. Na un konferensha di prensa na Kaapstad e Sur Afrikano di 78 aña di edat ta bisa ku e ke biba mas trankil. Despues di febrüari di otro aña lo e no duna niun entrevista mas. "No yamámi, mi mes ta yama boso", el a deklará na prensa. Na aña 1984 Tutu a risibí premio Nobel di pas pa su lucha kontra Apartheid. Despues di kaída di e rezjim di Apartheid e tabata presidente di e komishon di Berdat i Rekonsiliashon. Un di su aparienshanan públiko mas resien tabata na apertura di Kampeonato Mundial di Futbòl, kaminda e tabata para baila riba tribuna.

Sindikato FNV ke kita vakashon 'bouwvak'
E sindikato FNV Konstrukshon ke kita 'bouwvak', e vakashon fiho pa trahadónan den konstrukshon. E bònt ta bini ku e proposishon aki pa motibu di un investigashon bou di e miembronan. For di esaki a sali ku mayoria di e miembronan mes ke por disidí ki ora nan por bai di vakashon. Presidente Kersten di FNV Konstrukshon ta yama e periodo mandatorio di vakashon moda bieu. E miembronan ke tin un bos den e oranan di trabou tambe. Aktualmente no ta posibel pa traha part time den konstrukshon. Segun e bònt esaki ta e motibu ku e sektor no ta popular seka hóben i hende muhé.

Morto na kabaitu di Tilburg
Na kabaitu di Tilburg un hòmber a fayesé despues ku el a kai for di e atrakshon yamá 'spookhuis', esta 'kas di spiritu'. Bishitantenan a tende un sla duru banda di tres or di mardugá i a haña e kurpa sin bida di e hòmber tras di e atrakshon. No ta kla ta kiko e hòmber tabata buska den e kas di spiritu n'e ora ei. E atrakshon tabata será for di un or djanochi.

Nubia di shinishi tabata positivo pa kompania di trèin Eurostar
E nubia di shinishi ku a stroba tráfiko aereo oropeo na luna di mei tabatin konsekuensha positivo pa e kompania di trein Eurostar. Den e promé mitar di aña 4.6 mion hende a biaha den e tùnel bou di laman, ku ta konektá Brussel i Paris ku Londen, usando e liña di velosidat haltu. Esaki ta un oumento di seis porshento. Ganashi a subi ku mas ku 18 porshento bai kasi 400 mion euro. E kompanianan di aviashon a pèrdè desenas di miones di euro komo konsekuensha di e nubia di shinishi di Islandia.

Deporte
FC Utrecht a kalifiká pa e próksimo tanda di Liga di Oropa. Awo nan ta den e di tres i penúltimo buèlta preliminar di Liga di Oropa. Nan lo hunga kontra FC Luzern di Suisa. AZ tambe lo drenta e torneo aki. Nan lo hunga kontra IFK Gothenburg.

Martin Jol ta keda treiner di Ajax. Riba e website di Ajax e ta laga sa ku e ta rechasá e oferta di e klup di Londen, Fulham. Jol a disidí esaki despues di konbersashon ku maneho di Ajax. E ta bisa ku e no por bai laga Ajax aworaki. Siman pasá el a laga sa ku e ta duda ku e por mantené e selekshon di Ajax riba nivel. Awo nan a sigurá Jol ku e por oumentá su team.

Sürnam a kue su promé medaya na CAC Games na Puerto Rico. Na badminton den dòbel maskulino Virgil Soeredjo i Mitchel Wongsodikromo a pèrdè di nan atversarionan mehikano. Esaki a resultá outomátikamente den un medaya di bròns.

Pronóstiko di wer
Na prinsipio tin mest, despues solo ta bria. Mas lat lo tin mas nubia i algun yobida, espesialmente den zùit, posibelmente ku mal tempu. Lo bira mas o menos 22 grado. Mayan lo ta seku, ku basta solo pero ta keda fresku, 19 pa 22 grado. Despues wer lo keda kambia kádabe.