Gabinete hulandes a disidí di baha

Promé minister Mark Rutte a ofresé Reina Beatrix retiru di tur minister i sekretario di estado, asina gabinete di Lareina a kaba di partisipá. E hefe di estado hulandes a pidi e ministernan i sekretarionan di estado pa "sigui ehekutá tur loke nan ta konsiderá importante pa Reino hulandes". Mañan atardi Rutte lo duna un deklarashon den Tweede Kamer, o sea parlamentu hulandes, anto despues Kamer ta debatí ku e promé minister. N'e momento akí e presidentenan di frakshon a bolbe akudí serka señora Gerdi Verbeet, presidente di Tweede Kamer. E pregunta mas importante ku mester di respuesta ta e fecha pa elekshon nobo na Hulanda.

Mashinest sprinter a pasa seña kòrá
E choke frontal di dos trèin na Amsterdam probablemente ta konsekuensha dje echo ku mashinest dje sprinter no a hasi kaso djun seña kòrá. Minister Schultz van Haegen a skibi e kos akí den un karta pa Tweede Kamer, o sea parlamentu hulandes. E promé resultadonan dje investigashon di Inspectie Leefomgeving en Transport ta indiká ku e sprinter a kore pasa seña kòrá. Investigashon profundo mester determiná si por konfirmá e konklushon provisorio ei, asina e minister a skibi. Fe mainta De Volkskrant i De Telegraaf a informá nan lesadó dje probabilidat ei. E desgrasia di trèin a eksigí bida di ún señora, miéntras ku mas ku shen hende a keda heridá, algun di nan ta den kondishon grave.

Ekstradishon Van der Sloot pa Merka
Media peruano ta informá ku Perú a bai di akuerdo ku ekstradishon di Joran van der Sloot. E hóben hulandes ta sintando un kastigu di prizòn di 28 aña pa asesinato di Stephany Flores. Van der Sloot tabata sospechoso prinsipal tambe den e kaso dje desaparesido damita merikanu Natalee Holloway, ku wes a deklará morto ofishalmente prinsipio dje aña akí. Van der Sloot a primintí mama di Natalee Holloway di konta unda kurpa di e mucha muhé ta, esaki a kambio di 250.000 dòler. Sinembargo, te dia djawe el a keda sin revelá paradero di kurpa di Natalee i awor ta akus'é di ekstorshon. E proseso merikanu kontra Van der Sloot ta programá pa 2015, pero por ekstradit'é promé ku esei.

Tempu di beran obispado Den Bosch
Obispado di Den Bosch ta den problema finansiero. Ora pa ora ta drentando ménos sèn ya ku e kantidat di baidó di misa a baha, ta p'esei mester reorganisá obispado drástikamente. Lo retirá 13 di e 42 empleadonan. E notisiero di obispado lo stòp di eksistí despues di nobenta aña. Tambe lo sera sekshon di Arte eklesiástiko. Archivo di obispado si ta keda eksistí, ma akiratu e no ta públiko mas. Obispado Den Bosch ta konsiderá e medidanan aki komo e úniko manera pa keda finansieramente saludabel.

Promé tanda elekshon presidenshal
Fransha a bai urna ayera djadumingu. E kandidato sosialista François Hollande a gana e promé tanda dje elekshon presidenshal n'e pais. Presidente den funshon Nicolas Sarkozy a sali di dos. Ta e votonan for di eksterior so mester konta ainda. Hollande a gana rèim 28 porshento dje votonan, Sarkozy kasi 27 porshento. E kandidato ekstremo derechista, señora Marine Le Pen, a sali na di tres lugá ku 18 porshento dje votonan na Fransha, ku ta mas ku loke su tata, Jean-Marie le Pen, a yega di alkansá. E di dos buèlta elektoral dia 6 di mei, lo bira un kontienda, manera por spera antó, entre Hollande i Sarkozy. Ta pa promé biá for di 1958 ku un presidente den funshon ta pèrdè e promé tanda. Partisipashon elektoral djayera tabata 80 porshento.

Èks senador Edwards na tribunal federal
Na Merka a kuminsá ku e proseso penal kontra èks senador John Edwards. E ta komparesé dilanti tribunal federal ya ku ta akus'é di a uza plaka di kampaña pa tene un afèr ku su amante embarasá sekretu. Lo el a uza 900.000 euro pa mantenshon di su amante i pa paga gastunan médiko dje dama. Na 2008 Edwards a trata di bira presidente p'e demókratanan, pero su intento tabata enbano. Si prueba ku Edwards ta kulpabel, por sentensi'é na kastigu di prizòn di 30 aña. Ekspektativa ta ku e proseso kontra e èks senador lo dura te fin di mei/prinsipio di yüni.

Penshonadonan italianu no ke traha mas
Gabinete Monti na Italia tin pensá pa manda grandinan, ku a baha ku penshun delantá, bai trabou bèk. Ta trata djun grupo di dies pa shenmil pensionado, ku a stòp di traha promé ku nan 65 aña, i ku ta keda dos aña sin entrada awor ku a subi edat di penshun, di 65 pa 67 aña. E minister di Asuntu Sosial a anunsiá e plan ku awa na wowo durante un konferensha di prensa. Gabinete italianu ta bisa ku e plan ta nesesario pa saka e pais for di krísis di krédito. E pensionadonan tin problema ku e idea di bai trabou bèk. Ademas e pregunta ta si por ehekutá e plan. Hopi dunadó di trabou a duna e djòpnan dia bieu na empleadonan mas yòn.

Ta basta duna Israèl gas segun Egipto
Egipto ta stòp di abastesé Israèl ku gas. E kompania nashonal di gas a para transporte pa motibu dje tantísimo atentadonan kontr'e ret di tubu di gas. Fo'i tempu di kaída di Mubarak a sabotiá e ret di tuberia 14 biá. Probablemente ta egipsionan rabiá k'e echo, ku ta suministrá Israèl ku gas, ta tras dje aktonan. Nan no ke tin nada di aber ku Israèl debí n'e konflikto ku e palestinonan.

Hopi dòlfèin morto na kosta peruano
Na playanan den nòrt di Perú, kasi 900 dòlfèin a spula na tera último lunanan. Niun hende no sa dikon. Minister di asuntu di Naturalesa i di Medio Ambiente a konta CNN, ku el a start un investigashon grandi pa averiguá kousa dje fenómeno. No por atribuí fayesementu dje dòlfèinnan na falta di kuminda, na peska òf venenamentu. Ta asumí ku un vires a ataká e bestianan. Na playanan ost di Estados Unidos i Brazil tambe desénas di dòlfèin morto a spula na tera último lunanan.

Deporte-Player of the Year Award
Na Inglatera a eligí Robin van Persie komo 'futbolista di aña'. E delantero di Arsenal a risibí e distinshon di sindikato di futbolista PFA. Van Persie di 28 aña di edat i di nashonalidat hulandes ta orguyoso ku su título i ku rasón: e temporada akí el a hinka 27 gol. Ta pa di tres biá ku un hungadó di bala hulandes ta risibí Player of the Year Award: Dennis Bergkamp a gan'é na 1997 i Ruud van Nistelrooij na 2002.

Bala mucha hapones a drif bai Alaska
Un mucha hòmber hapones di 16 lo haña su bala di futbòl bèk for di Alaska. Pa motibu dje tsunami di aña pasá, e bala a drif bai na otro banda di Oséano Pasífiko. Misaki a pèrdè tur su pertenenshanan den e ola devastador. Un hende ku tin kustumber di rekogé kos ku laman tira na playa, a haña e bala na Alaska. El a lokalisá e doño pa medio dje tekstonan rib'e bala. Alumnonan di klas di Misaki a skibi deseo di éksito anto nòmber di su skol tambe tabata skibí rib'e bala. Ainda a keda 5 mion tòn di opheto den oséano despues dje tsunami. Hopi kos a senk, pero tin basta kos ta drif ainda tambe.

Pronóstiko di tempu
Solo ta bria atrobe despues ku awa a kai. Temperatura ta mas o menos 13 grado. E siman akí wer ta kambia kádabe, pero for di djárason temperatura lo subi sí.