Boletin di notisia, 13:00 or

Lareina a nombra èks promé Ruud Lubbers komo informadó nobo
Reina Beatris a apuntá eks promé minister i minister di estado Ruud Lubbers (CDA) komo informadó nobo. Lareina a pidi'é investigá kua gabinete di mayoria ta posibel ainda. Ku esaki e opshon di un gabinete derechista ku VVD, PVV i CDA a bira posibel atrobe. Promé ku esaki lider di PVV Wilders mester deshasí di algun punto di bista. Ayera Wilders i Lubbers a konbersá na Paleis Noordeinde na Den Haag. Awó ku VVD i PvdA no por a yega mas serka di otro durante e negoshashonnan tokante Paars-plus, ta parse manera ku CDA lo bai hunga un papel krusial.

BP a interumpí trabou den Golfo di Méhiko debí na orkan
Kompania di zeta BP a para trabou seka e fuente di zeta dañá den Golfo di Méhiko pa motibu di mal tempu. Den area di Karibe tin un orkan ta ras ku por kué rumbo di Golfo di Mehiko. Si mester evakuá e area, segun gobièrno merikano e trabou lo kore un retraso di di dies pa dieskuater dia. E trabou ta pará te ora ku e pronóstikonan di wer bira mas kla. E buraku di zeta den Golfo di Mehiko a kuminsá na aprel, ora ku un plataforma di zeta a eksplotá i senk. sentenares di miones di liter di zeta a basha den laman. Siman pasá porfin a logra sera e buraku ku un kapa temporario. Un pos di zeta nobo pa remplasá esun daña ta seka kla.

Detenshon di 21 polis benesolano kómplise di trafikante di droga
Na Venesuela Na Venezuela a detené 21 polis pasobra nan a yuda dos trafikante di droga mehikano hui for di prizòn. Kon nan a hasi esaki no ta konosí. Wardadonan di prezo a bati alarm ora ku nan a ripará ku ta falta dos prizonero. Awo e 21 polisnan ta será den e mesun prizòn.

Evakuashon na New York debí na huma den Estátua di Libertat
Na New York mester a desokupá Estátua di Libertat ya ku un motor di left dañá a yena e edifisio ku huma. Mester a saka sentenares di bishitante afó. Segun un bosero di e monumento e situashon no ta grave. Asina bomberonan kaba di listra e edifisio e ta habri atrobe. No tabatin hende heridá. Pa motibunan di seguridat e Estátua di Libertat a keda será añanan largu despues di e atentadonan di aña 2001. Na aña 2004 e pia di e estatua a habri bèk pa públiko, e korona riba e kabes a habri aña pasá numa.

Mucha yòn musulman a lanta wèpsait pa ideanan kontemporáneo
Algun musulman hóben krítiko a lanta un website ku mester bira un plataforma islámíko pa pensadónan kontemporáneo. Ademas nan ke kibra ideanan ku tin tokante islam. E lantadónan di e site ta apelá na otro moslem pa ta krítiko i no pensa den hòki. Riba e site yamá nieuwemoskee.nl, e lantadónan ta skibi ku Koran ta mustra riba libertat di religion i konsenshi. Segun nan koran no ta sostené siguimentu di tradishon sin husga. Nan ta spera di haña un diskushon riba internet.

Deskubrimentu di e strea mas pisá ku a mira te awor
Astrónomonan oropeo a diskubri e strea di mas pisá di tur tempu, 265 be mas pisá ku solo. Ora ku e strea a originá, algu mas ku un mion aña pasá, e mester tabata mas pisá ainda, e astrónomonan ta pensa. E strea no ta solamente esun di mas pisa sino tambe esun ku mas brio. E ta bria mas ku 10 mion be mas tantu ku solo. For di tera kasi no por mira e strea pasobra e ta tapá den un neblina, na un distansha di 165 mil aña lus.

Inundashonnan grave na China
China ta eksperienshá e inundashonnan di mas pisá den kasi dies aña. E aña aki so 700 hende a pèrdè nan bida. Tin un 350 hende pèrdí. E inundashonnan a kousa daño di 16 miar euro. A evakuá 18 mion chines. Tres kuart di e pais ta sufri bou di un mal tempu formal. Den riunan e awa a subi na un haltura rèkert. Na aña 1998 4 mil hende a fayesé den mal tempu.

Selebrashon di mei miar di miembro di Facebook
E website di e ret sosial Facebook a selebrá un evento memorabel: mundialmente tin mei miar di miembro. Ko-fundadó i presidente Mark Zuckerberg seis aña pasá a lansa Facebook, komo un plataforma online pa studiante merikano. Último añanan e site a krese enormemente. Delaster seis luna a bini mas o menos shen mion miembro aseka. Entretantu Facebook a bira e site di ret sosial di mas grandi di mundu i 70 porshento di e miembronan ta biba pafó di Estados Unidos. Na Hulanda tambe e kantidat di miembro ta krese.

Denunsia di víktimanan aleman di abusu seksual na Ameland
Seis mucha hòmber aleman di 13 aña a duna keho di abusu seksual durante di un kampo di vakashon riba e isla hulandes Ameland, fin di luna pasá. E mucha hòmbernan ta miembro di un klup di deporte ku tin desenas di aña ta bini Ameland pa vakashon den zomer. Segun hustisia aleman 20 otro miembro di e klup ta kulpabel di abusu den e sala di drumi. E víktimanan lo a grita, skonde bou di kama of hui via e trapi di emergensia. E supervisornan lo a keda sin hasi kaso di loke tabata pasando. Polis aleman ta investigando e asuntu. Te awó dos sospechado a konfesá.

Karchi di seguridat estilo bieu na Vierdaagse di Nijmegen
Awe mainta e kanadónan di Vierdaagse na Nijmegen a sali ku un karchi di kòntròl moda bieu. E sistema di banchi na pòls tabatin muchu fayo. Pa skèn e banchinan ku barcode no tabata logra i den e kasonan aki tabata dura muchu largu promé ku e kanadónan por a sigui. E 37 mil kanadonan ku a sobra mester laga kontrolá nan karchi na diferente lugá kantu di e ruta. Awe tin e asina yamá Dia di Groesbeek ku e kaminda di shete seru tan temí riba su ruta. Djarason, e di dos dia mis dossshen kanadó a kai afó. Esaki ta menos ku aña pasá. Segun e organisashon e kanadonan awe meinta a presentá na start mas miho prepará, i tabata muchu menos kalor.

Pronóstiko di wer na Hulanda
Awe merdia lo tin yobida, espesialmente den zùit. Lo bira 21 grado den nort west  te ku 25 grado den interior. Mayan temperatura lo no kambia mashá ma tin mas yobida sí.