Tanki di guera na Tripoli ta tira riba barionan
Tanki di guera di ehèrsito libio na Tripoli ta tirando riba diferente bario di e siudat. E tankinan a subi kaya despues di a warda largu. E luchanan aki a kuminsa despues di kanto di viktoria di rebeldenan, ora nan a konkistá gran parti di Tripoli. Bosero di e rebeldenan ta atmití ku e trupanan di Kadhafi ahinda ta poseé mas o menos 20 porshento di e kapital. Dos yu hòmber di Kadhafi a keda arestá durante e bataya ku e rebeldenan. Un di nan ta e poderoso Saif al-Islam. No ta konosí unda Kadhafi mes ta. Lidernan di paisnan di oksidente a pidi Kadhafi entregá su mes. Gobièrnu britániko ta pidi e rebeldenan pa no tuma revancha. Londen ta spera ku por evitá e kaos na Libia ku a surgi na Irak despeus ku a baha Saddam Hoessein for di su puesto.

Obama a deklara ku régimen di Kadhafi a yega na su fin
Presidente di Merka, Barack Obama a deklará ku Kadhafi tin ku atmití ku su régimen a yega na su final. Obama meskos ku otro lidernan oropeo, ta urgi Kadhafi tuma su retiro pa evitá ku ta bin mas víktima. E presidente merikano a bisa tambe ku su gobièrnu ta sigui sostené e konseho di transishon libio. El a pidi e konseho pa respetá derecho di habitantenan di Libia i pa traha pa realisá un Libia demokrátiko. E úniko presidente ku ta sostené Kadhafi ta presidente venezolano Hugo Chávez.

Assad ta partisipá ku su régimen tin tur kos bou di kòntròl
Presidente sirio Assad ta deklará ku su régimen ta fuerte i ku su ehèrsito tin tur kos bou di kòntròl. E presidente sirio a bisa na televishon nashonal ku e no ta preokupá ku e rebelion di pueblo. E rebelion ta dura mas ku sinku luna kaba. Reformashon ku el a primintí ta sigui normal, asina el a deklará. Febrüari 2012 lo bin elekshon parlamentario nobo. Otro partidonan polítiko tambe lo por partisipá na e elekshon, asina Assad a deklará. Entretantu rebeldenan sirio ta lantando un konseho di transishon meskos ku a lanta na Libia.

Bombardeo entre Israël i Liña di Gaza ta sigui
Bombardeo entre Israël i Liña di Gaza a sigui ayeranochi i den marduga ounke nan a anusia un 'toke de keda'. Miembronan di ehèrsito palestino a primintí ku nan lo stòp ku tiramentu. Pero for di e tempu ei a tira mas ku 10 rakèt i otro proyektil. Israël a atakánan ayeranochi. E violensha a kuminsa djaweps ora ku militantenan na Eliat a kuminsa ku atake. Eliat ta e frontera entre Egipto i Israël. Sinku egipsio a pèrdè na bida. Egipto a menasá djasabra ku e ta manda buska ku su ambahador for di Israël. E ora ei Israël a primintí ku ta bai hasi un investigashon konhunto riba fayesementu di e habitantenan. Egipto ta haña esei bon pero no sufisiente.

Isla Utöya ta aksesibel atrobe pa públiko
Polis noruego a anunsia ku for di djamars marduga e isla Utöya ta aksesibel atrobe pa públiko. Polis ta duna e isla bèk na e organisashon di hóben di partido laboral di noruega. Nan ta doño di e isla. Ta un luna pasá kaba ku Anders Breivik a mata 69 persona na e isla. Mando polisial a hasi partisipá esaki, despues di e konmemorashon nashonal ku a sera luna di luto kune. Mas ku 6 mil persona a atendé na e servisio pa rekordá víktimanan di e tiroteo ku a tuma lugá den un stadion na Oslo. Miembronan di kas real di Suisa i Dinamarka tabata presente. Tambe e presiente di Finlandia i prome ministernan di paisnan skandinavo tabata presente. Entre otro presidente di Noruega i rei di Noruega a tene un diskurso.

Aresto di habitante di Amsterdam den kaso di abusu seksual
Polis a arestá un hòmber di 66 aña na Amsterdam. E lo ta envolví den kaso di abusu seksual na un enternat britániko. E hòmber tabata dosente di matemátika na e enternat ku ta keda na Suffolk. Eks alumnonan ta bisa ku e hòmber a abusá di nan i a batinan entre añanan 70 i 80. Anteriormente a arestá 2 otro persona den kaso di abusu seksual na e skol. E kabes di skol a haña un kondena di 21 aña den prizòn. Un otro dosente ku tambe a arestá a mata su kurpa durante su aresto preventivo. Gran Bretania a pidi entrega di e hulandes.

Konsumidó a gasta menos sèn na yüni
Kasnan di famia a gasta menos ku sero punto 9 porshento kompara ku aña pasá. Segun CBS (Ofisina Sentral di Estadístika). Ta promé bes e aña aki ku konsumidó ta saka tiki sèn. El a saka tiki sèn tantu pa komustibel komo pa produktonan di luho. Pero sí a paga mas pa servisio. Kompra di produktonan duradero a baha. Un di e motibunan ta ku a kumpra menos outo nobo den e luna di yüni.

Wer na Hulanda:
Solo ta bria na parti nort i sentro di Hulanda. Ta nublá na parti sùit i por spera kaida di awa. Awemèrdia ta nublá. Temperatura ta entre 20 i 25 grado. Mañan ta hopi kalor. Temperatura ta subi riba 25 grado. Awa lo por kai den kareda di mèrdia ku bos i welek.