Kastigu mas kòrtiku pa Julien C. Julien C. a haña un kastigu mas kòrtiku pa morto di e hobensito di 8 aña Jesse Dingemans na 2006. C. a drenta un klas na un skol básiko i kòrta garganta kon ku ta di un alumno. Nunka e no a duna un motibu pa su akto. Komo ku e proseso kontra C. a dura sinku aña i mei, Korte Supremo a husgá ku un kastigu di 11 aña i 7 luna i tbs ta sufisiente. E kastigu ta sinku luna mas kòrtiku ku loke korte di Arnhem den promé instante a duna C. un aña pasa pa homisidio. Ministerio Públiko a eksihí ketu bai 20 aña kastigu di prizòn i tbs pa asesinato.

FARC ta mata 12 militar kolombiano
Na frontera di Kolombia i Venesuela diesdos militar kolombiano a muri durante un atake di FARC. Segun ehersito kolombiano e militarnan a kai den un trampa. E rebeldenan di FARC a ataká e militarnan for di un region na frontera di Venesuela kaminda tin boske. Durante e tiroteonan rebeldenan di FARC tambe lo a muri. Ultimo tempu FARC a intensivá e atakenan riba ehersito kolombiano.

Krísis ekonómiko oropeo ta afektá Brazil tambe
E krísis ekonómiko na Oropa ta afektá Brazil tambe. Si no solushoná e krísis na Gresia e kresementu di ekonomia probablemente lo ta menos ku e 4.5 porshento ku a pronóstika anteriormente. Pero segun minister di finansa Guido Mantega e sirkumstanshanan pa kresementu di ekonomia di Brazil tei si ahinda. Mantega ta tene kuenta ku un kresementu mas haltu ku e 2.7 porshento den aña 2011. Analistanan ta tene kuenta ku un oumento di mas ku 3 porshento e aña aki.

Promé buelo espasial komersial
Na Cape Canaveral na Florida a lansá e transbordador espasial Dragon. Ta e promé buelo espasial komersial pa e nave espasial ISS. Abordo tin entre otro kuminda, awa, lèptòp i materialnan pa eksperimentu. E intenshon ta pa e transbordador pega djasabra awor na ISS. Astronouto André Kuipers tin ku sòru pa e konekshon. Djasabra último lansamentu di Dragon a frakasá. Tabatin problema ku un di e motornan.

Remedi kontra malaria di mal kalidat
Un tersera parti di tur e remedinan ku tin rònt mundu pa kombatí malaria ta di mal kalidat o imitashon. Esaki segun un instituto di investigashon merikano. Un gran parti di e remedinan no tin sufisiente material kurativo. Pashèntnan ku huza e remedinan aki muchu largu ta kore e riesgo ku nan ta bira inmune. Kada aña mas o menos un mion di hende ta muri rònt mundo a konsekuensha di malaria.

Afganonan mes ta bira responsabel
Ehersito afgano mes ta bira responsabel verano otro aña pa seguridat na e pais. Durante e kumbre di OTAN na Chicago lidernan di e paisnan miembro a kumbiní esaki. Segun plan ta tèrmina e mishon di OTAN e aña sigiente, 2014. Na fin di e kumbre di dos dia presidente Obama a enfatisá ku despues di 2014 tambe lo tin militar estranhero na Afganistan pa sostené afganonan. Na e momentunan aki tin tin mas o menos 130 mil militar estranhero na e pais. Pa sosten di Afganistan mester di tres miar di euro anualmente despues ku e mishon di OTAN bandoná e pais. E kontribushon di Hulanda lo ta 90 mion di euro pa e periodo di 2014 pa 2017.

Sankshonnan mas severo kontra Iran
Senado merikano a bai diakuerdo ku sankshonnan mas severo kontra Iran. Di e manera aki Estados Unidos ke evitá ku Iran ta logra desaroyá arma nuklear. Kompanianan ku tin un kotisashon na bolsa di balor ta obligá na mèldu kualke negoshi o kontakto ku Iran. Esaki ta nifiká ku pa bankonan estranhero ta mas difisil pa hasi negoshi ku Iran. Ademas ta vris saldo di kompanianan ku ta suminstrá Iran material pa e kibra marchanan di protesta.

Deskonosi a bula for di Niagara Falls
Un hòmber deskonosi a bula kai for di Niagara Falls i a sobrebibí. E hòmber a subi riba un muraya na e parti kanades di e waterval i bula 53 meter abou. Timnan di reskate a saka e hòmber for di awa. A hospitalisá e hòmber di mas o menos 40 aña ku leshon hopi serio. No ta konosi si e hòmber kera kometé suisidio. Te na leu ku ta konosi esaki ta di tres be ku un persona ta bula kai for di Niagara Falls sin ningun faha di seguridat i ta sobrebibí.

Dia di fiesta sobrio
Na Jemen a selebrá un dia di fiesta nashonal sobrio. Ayera 96 militar a muri den un atentado di suisidio. Mas o menos 300 persona a keda heridá. E dia di fiesta nashonal ta marká unifikashon entre e parti nort i e parti sùit di Jemen na 1990. Durante entrenashon pa e parada grandi un militar a laga un bòm eksplotá. Ayera al- Qaida a anunsiá ku e ta responsabel pa e atentado.

Kathleen Ferrier ta bandoná Tweede Kamer
Parlamentario Kathleen Ferrier no ta bolbe parlamentu mas despues di elekshon. Den e programa di telebishon Knevel & Van Den Brink Ferrier a bisa djaluna'nochi ku e no ke bolbe subi lista di CDA. Ferrier a bisa ku ta trata di un 'konsiderashon komplika'. Kathleen Ferrier ta yu di e promé presidente di Sürnam. E tabata 10 aña miembro di parlamentu hulandes. Huntu ku su kolega Ad Koppejan e tabata hopi krítiko tokante e koperashon ku PVV. Koppejan si ta religibel. Ferrier ta haña ku Koppejan mester haña un di promé dies posishonnan riba lista di CDA.

ChristenUnie tambe kontra fondo di emergensha pa euro
Despues di PVV, partido ChristenUnie awor tambe ta kontra un fondo di emergensha pa euro, e asina yamá ESM. Minister de Jager di finansa mester bolbe bai papia na Bruselas, asina lider di frakshon Arie Slob a bisa. Awe Tweede kamer ta debatí tokante e kontribushon hulandes den e fondo di emergensha permanente pa paisnan di Union Oropeo. A pesar di e resistensha di PVV i ChristenUnie tin un mayoria den parlamentu pro introdukshon di e tratado di ESM. Lider di PVV Wilders ta entamá un kaso kontra estado hulandes pa evitá partisipashon di Hulanda den e fondo di emergensha.

Kurason artifisial di mas chikí na mundu
Dòkternan italiano a implantá e kurashon artifisial di mas chikitu na mundu. Un beibi den 16 luna a risibi e kurason na mart último. Ta trata di un pòmp di titanium di 11 gram. E kriatura a nase ku un problema di kurason. Su kurason no tabata sirkulá e sanger bon. E operashon a dura 8 ora. Entretantu a saka e pòmp atrobe for di e kriatura. Awor e tin un kurason humano di un donor i segun su dòkter su salú ta súmamente bon.

Pronóstiko di tempu na Hulanda:
Awe ta e promé dia di verano di 2012. E temperaturnan ta riba 25 grado. Awetardi áwaseru por kai duru. Mayan trobe ta un dia húmedo i kalor ku chèns riba áwaseru.