Boletin di notisia di 13or

Informadónan serka Lareina
Informadónan Uri Rosenthal i Jacques Wallage lo hiba un bishita awe djárason tres or di atardi na Reina Bètris. Na palasio Noordeinde nan lo entregá su mahestat nan relato final i nan lo informá Lareina di e negosiashonnan tokante un gabinete Püs-Plùs ku mester a para ayera.
Despues di e bishita na Lareina e informadónan lo duna un konferensha di prensa den edifisio di Eerste Kamer, o sea di Senado ulandes.
Ayera a resultá ku no ta posibel forma un gabinete püs-plùs, konsistiendo djun koalishon di partidonan VVD, PvdA, D66 i GroenLinks. Sobretodo VVD i PvdA no por a yega n'un akuerdo ku otro tokante magnitut di e ekonomisashonnan nesesario.
Kabesante polítiko di VVD, Mark Rutte ke ekonomisá por lo ménos 18 miar di euro te aña 2015, pero Job Cohen, lider di PvdA ta haña ta dimas. Ni tampoko e asuntu di dedukshon fiskal di interes hipotekario no a a kondusí na un kombenio. Awor Rutte ta mek rib'un gabinete intermedio di VVD, PvdA i CDA, kos ku Cohen di PvdA no ta deseá mashá. E ta preferá un gabinete intermedio, agregando Groenlinks i D66. Un gabinete amplio asina por konta ku 102 di e 150 asientonan di Parlamento ulandes.
Geert Wilders, dirigente di PVV ta kontentu ku e negosiashonnan a frakasá. Wilders ke pa forma un gabinete sentro-derechista tòg, esta un koalishon di VVD, PVV i CDA. Te awor e intentonan anterior pa forma un tipo di gabinete asina a malográ. D66 i GroenLinks ta di opinion ku kisas mester studia posibilidat di un gabinete derechista atrobe.

Bouterse ke pidi pordon públikamente
Despues di su inougurashon komo presidente di Sürnam, Bouterse lo bai pidi prodon públikamente pa e asesinatonan di Dezèmber 1982. Esaki ta loke su lider religioso, obispu Meye a bisa awé den e programa radial 'Dit is de dag van Radio 1'
Meye ta yuda prepará un enkuentro masivo na Onafhankelijkheidsplein, e plasa di Independensha di Sürnam na Paramaribo. E ta bisa di ta sigur ku Bouterse lo pidi famia di e difuntunan i tur otro hende pordon. No a stipulá fecha di e enkuentro ainda.

Merka ke pa Sürnam atendé ku korupshon
Estádos Unídos ke pa gobièrnu nobo di Sürnam atendé ku korupshon i pa e respetá prinsipionan demokrátiko. Rèspèt pa derechinan di hende i pa lei tambe ta eksigensianan ku mester kumpli kune pa konservá un bon relashon ku Merka. Ayera Estádos Unídos a duna di konosé den un deklarashon di lo buta preshon riba Desi Bouterse, èks komandante di ehérsito sürnam i for di djaluna último, presidente elekto di Sürnam.
Gobièrnu merikanu na Washington ta respetá resultado di e elekshon ku a bai di forma demokrátiko n'e pais. Bouterse di 64 aña di edat lo huramentá komo presidente dia 3 di ougùstùs próksimo. E mester keda kla ku formashon di su gabinete no mas tardá ku 12 di ougùstùs.
Na 2007 a kuminsá ku e proseso kontra Bouterse i 24 otro sospechado, ku supuestamente lo a hunga un papel den e masakre di Dezèmber 1982 na Paramaribo, kaminda 15 oponente di su régimen dje tempu ei a pèrdè nan bida dilanti un peloton di fusilamentu. Na Hulanda a sentensiá Bouterse i a dikta un kastigu di 11 aña di prizòn relashoná ku narkotráfiko.

BP a kuminsá bende algun divishon
Kompania petrolero britániko BP a bende algun sekshon empresarial na balor di shete miar di dòler. Apache, un kompania di zeta i gas a kumpra entre otro kampo di petroli i fábrika di prosesamentu di krudo na Texas i un empresa di gas na Kánada. Lo depositá e suma den un fondo ku mester kubri gastunan ku a surgi debí n'e derame di zeta den Golfo di Méhiko. Alolargu BP ke depositá 20 miar di dòler den e fondo pa reskate di Golfo di Méhiko. Te awor e kompania petrolero britániko a gasta komo kuater miar di dòler kaba na seramentu di e buraku dje oleodukto den fondo di e golfo, na trabou di limpiesa di laman i na indemnisashon di esnan perhudiká.

Tráfiko aéreo ku hopi retraso na Oropa
Awe biaheronan na airopuerto Schiphol ta sufriendo di e efektonan molestoso di e wèlga di empleadonan di kòntròl di tráfiko aéreo na Fransha. Sobretodo buelonan pa i for di Spaña, Italia, Franshakrijk, Portugal i Islanan Kanario tin retraso. Asina bosero di kompania di aviashon Transavia a bisa awé.
Transavia a splika ku e retraso ta surgi entre otro debí na desvío di buelo. E kompania di aviashon ta rekomendá biaheronan pa sigui tur modifikashon di orario bon riba énternèt. A anulá vários buelo pa Fransha i destinashonnan sur-oropeo. Ni Schiphol ni Kòntròl di Tráfiko Aéreo di Hulanda no por a bisa si esaki tin di aber ku e wèlga na Fransha.

Kalor ta mata hende na trabou
Federashon di sindikato FNV Bondgenoten a risibí kasi 600 keho di kalor na bok'i trabou. Prinsipio dje luna akí e bònt a habri e sentro Werken in de Zomerhitte. Mayoria empleado ta keha di falta di konsentrashon. Diesun hende mester a bai hòspital, despues ku kalor a ataká nan. Dunadónan di trabou apénas ta hasi algu pa aliviá kalor na trabou, segun FNV Bondgenoten. Temperatura di kurpa di hende no mag surpasá 38 grado.

Deporte-CAC na Mayaguez, Puerto Riko
Na Mayaguez, Puerto Riko ta tumando luigá e di 21 edishon dje Weganan Sentroamerikano i Karibense. Despues di tres dia di kompetishon, Kolombia ta na kabes dje lista ku 27 medaya di oro. Méhiko i Benesuela ta pará respektivamente na di dos i na di tres lugá; te awor ambos pais a gana 25 medaya di oro. Te n'e momentu akí Antia ulandes ta na puesto numebr 14 ku ún medaya di plata pa landadó Rodion Davelaar. El a kubri 50 meter de 28 i piku sekònde i a landa estilo skolar. Tantu Guyana komo Trinidad&Tobago a risibí un medaya di bròns. Te awor Sürnam no a kai den e premionan.

Nijmeegse Vierdaagse 2010
Na Nijmegen kasi 39.000 kaminante a ranka sali riba e di dos dia di Vierdaagse. Ayera mil 154 partisipante a kai afó, loke ta dòbel mas ku nòrmal pa un promé dia. Organisashon dje kaminata di kuater dia na Nijmegen ta bisa ku ta debí n'e kalor inmenso. E kayente a asotá desénas di partisipante. Mester a interná kuater di nan na hòspital. A adelantá e evento un ora, pa mayoria kaminante pasa finish promé ku kalor di mèrdia dal aden. Awe sí ta hasi ménos kalor, asina ta ku a start kuat'or di mardugá manera kustumber.

Wer na Hulanda
Dia a habri ku solo, pero despues shelu ta nubla atrobe. Den oranan di atardi i di anochi áwaseru lo kai, aki i aya por tin bos i welek. Temperatura ta 23 grado na kosta i 30 grado na ost. Mañan ta variablemente nublá, mèrdia awa por kai lokalmente. Temperatura ta 24 grado, loke ta algu mas agradabel kompará k'e dianan anterior.