Boletin di notisia, 20 di yüli

Bouterse presidente nobo di Sürnam
Desi Bouterse a tene su promé diskurso despues ku parlamento, o sea Asamblea Nashonal di Pueblo a eligi'é komo presidente di Sürnam . El a hasi un yamamentu na tur Sürnam pa koperá ku edifikashon di nan pais. El a duna di komprond'é ku e no ta deseá metementu djafó. 'Nos no mester laga otro pais determiná kiko tin ku sosodé na Sürnam', asina Bouterse a bisa. Su elekshon komo presidente di e pais a lanta reakshonnan diverso. Tin Sürnam ku ta aploudi'é, otronan ta puntra kon por ta ku Sürnam ta elegí un hòmber, sospechá di asesinato di 15 oponente di su régimen militar na 1982. Hulanda ta bisa di ta respetá e elekshon demokrátiko di Bouterse, pero segun minister Verhagen di Asuntunan di Eksterior di Reino, e kontaktonan ku Sürnam lo keda limitá, o sea ku nan lo tuma lugá ora ta nesesario so. Un ten pasá a sentensiá Bouterse na Hulanda. Wes a dikta 11 aña di prizòn p'e en konekshon ku narkotráfiko. Ta p'e motibu akí e no ta bonbiní, a ménos ku e ke sinta su kastigu, asina Verhagen a sigui bisa. Porlopronto esaki no ta posibel, komo ku Bouterse ta gosa di imunidat diplomátiko den su kalidat di hefe di estado. Minister Verhagen ta enfatisá sí ku Hulanda lo sigui ku e kompromisonan ku e tin ku Sürnam i ta aspirá un relashon práktiko ku e pais. Loke ta lógiko si konsiderá e istoria ku nan ta kompartí i un sinfin di kontakto personal ku ta eksistí entre Hulandes i Sürnamnan.
Bouterse a logra respaldo di sufisiente parlamentario pa sigui Ronald Venetiaan komo presidente, tur esaki grasias na apoyo diVolks Alliantie. Su rival mas grandi tabata minister Santokhi di Hustisia i di Polis.

Mas i mihó limpiesa den Bon futuro na Kòrsou
Na Kòrsou a hasi entrada hudishal i a detené shete persona sospechá di ta involukrá den suministro di droga i selular na prezunan. Dos di e sospechadonan ta empleadonan di prizòn Bon Futuro. Polis ta bisa ku e septeto ta forma parti di un ret kriminal ku tabata entregá hashis, mariwana òf kokaína na detenidonan ku ta hasi pedido. Pa basta ten Polis i Hustisia na Kòrsou ta teniendo akshon di limpiesa na Bon Futuro, ku yudansa di Hulanda. Luna pasá mes a konfiská desénas di arma pa bati i hinka hende; tambe droga i kasi shen selular. Ku e limpiesa grandi akí Kòrsou ta spera ku e instituto penitensiario ta kumpli ku normanan internashonal.

Hòmber na Schiphol ku pistol kargá kier a bai Kòrsou
Na airopuerto Schiphol Mareshòsei a detené un hòmber di 35 aña ku'n pistol kargá den su poder. El a purba pasa empleadonan di seguridat bai sin nan ripar'é, asina un bosero a informá.
E hòmber tabatin pasashi p'un buelo pa Kòrsou. Awemainta band'i mitar di dies, ora k'e mester a pasa kòntròl di seguridat a resultá k'e tabatin un arma di kandela den su bachi. Mareshòsei a gar'é mésora i sin ningun problema. Umbes despues dje hayasgo Mareshòsei a ser'e gate dje buelo konserní. Despues djun investigashon mas aleu a laga e avion lanta buelo numa pa Kòrsou. E pasahero arestáta di nashonalidat ulandes. Mareshòsei no sa ainda konbin e tabatin un pistol den su poder. N'e momentunan akí ta interogando e.

Frialdat polar ta eksihí hopi víktima na Suramérika
E frialdat ekstremo, mas bien polar ku ta hasiendo na Suramérika a pone sifra di morto subi bira 175. Sobretodo na Argentina i Bolivia, hopi víktima a vris muri, partikularmente vagabundo ku ta drumi na aire liber i hende ku kas ku no ta bon isolá. Miles di bestia a muri na Paraguay i Brazil. Ta trata di un dje wenternan mas friu di último dies aña n'e kontinente latinoamerikano. Na Perú a midi e temperatura mas abou, esta 23 grado sèlsiùs bou di sero. Skolnan na Perú i Bolivia lo keda será te fin di siman.

Hopi kadaver di bestia di laman na playanan di Brazil
Sentenáres di pingwino morto a spula na playanan di Sao Paolo, ubiká na parti zùit di Brazil. Tambe a topa ku desénas di para di laman, algun dòlfein i turtuga marino grandi. Tur tabata morto drumí riba santu. E animalnan a bin di oséano dilanti Argentina i probablemente nan a kansa dimas. Un veterinario ta kere ku e pingwinonan a muri di hamber. Biólogonan di Universidat di Sao Paolo ta investigando e asuntu.

Intento di kontrabanda di makaku chikí na Méhiko
Na airopuerto di Siudat di Méhiko a gara un hòmber ku a purba kontrabandiá makaku drenta Méhiko ku nan. A deskubrí e hòmber mehikanu komo ku e tabata aktua djun forma sospechoso. Ademas e tabatin asin'un bultu bou di su paña. Ora a listr'é a resultá k'el a hinka 18 makaku buladó den meya i a skonde nan bou di su paña. Ta trata di makaku mashá chikí ku e mehikanu a bisa di a kumpra na Perú pa band'i 23 euro kada un. Un makaku buladó bal kasi mil euro na Méhiko.

Deporte-CAC i medaya di plata pa Antia
Antia ulandes a konkistá su promé medaya na Weganan Sentroamerikano i di Karibe na Mayaguez, Puerto Riko. Landadó Rodion Davelaar a gana medaya di plata pa natashon skolar rib'e distansha di 50 meter den 28.61 sekònde.

Kaminata Nijmeegse Vierdaagse a ranka kibra
Kaminantenan na Nijmegen a start sali riba promé dia di Vierdaagse, o sea e kaminata di kuater dia konosí rònt mundu. E promé partisipantenan a kuminsá kana for di mardugá grandi, esta band'i tres or. A adelantá e start p'e kaminantenan kubri nan ruta promé ku kalor sofokante dal aden. Awe temperatura por pasa 30 grado bai. Dirigentenan di e kaminata anual di Vierdaagse na Nijmegen ta rekomendá e partisipantenan pa bebe hopi. A pone puesto di bòter di awa adishonal na disposihon dje kaminata. Tambe a pidi esnan ku ta biba kant'i kaminda pa parti awa p'e kaminantenan. A introdusí e medidanan kontra kalor pa motibu dje kaminata di 2006 ku mester a kanselá. E tempu ei a para e evento un dia pa motibu di kalor ekstremo. Dos kaminante a fayesé e tempu ei. Aworatu ei e promé dos kaminantenan a pasa finishi. Te awor e kalor por pasa, ta ún partisipante so a sinti malu.

Wer na Hulanda
Dia a habri ku solo i ta seku. Band'i mèrdia shelu lo nubla gradualmente. Temperatura ta 27 grado na kosta te 32 grado den interior. Por surgi tempestat den kurso di dia. Despues di mañan ta ménos kalor i tur dia awa por kai.