Presidente Raul Castro di Cuba ta kuater dia di bishita na China entrante djárason awor, pa drecha e relashonnan diplomátiko. Castro lo tin un enkuentro ku presidente chines Hu Jintao. Nan lo firma akuerdonan di koperashon. Pa China Cuba ta un pais importante na Latinoamerika, asina ministerio di asuntunan eksterior di China a bisa. E bishita di Castro na China ta e promé for di dia ku el a tuma presidensha over di su ruman Fidel na 2008.

Nieto a gana elekshon presidenshal na Mèksiko
Enrique Peña Nieto, e kandidato di oposishon di partido PRI a deklará su mes ganador di elekshon presidenshal na Mèksiko. Despues ku a konta dos tersera parti di e votonan Nieto a haña mas o menos 37 porshento di e votonan. Andres Manuel Lopez Obrador di PRD a haña mas o menos 32 porshento. E partido di Nieto a gana tambe elekshon parlamentario. PRI a goberná e pais 72 aña largu te ku 2000 ora ku e partido di presidente Calderón a bin na mando. Hopi mehikano ta desapuntá den Calderón pasobra e lucha kontra droga a frakasá i kresementu di ekonomia tambe ta laga di deseá. E ganador di e elekshon Peña Nieto ta bisa ku e ta pragmátiko i moderá i ku e ke dediká mas atenshon na otro problema di e pais i no na kombatimentu di droga so.

Tratado nobo tokante arma
Na Nashonnan Uní na New York ta kuminsa awe negosashonnan pa yega na un tratado di arma nobo. Meta ta pa stipulá kondishonnan nobo pa e negoshi di arma. Anualmente negoshantenan di arma ta gana kasi sinku miar di euro. Segun Nashonnan Uní anualmente shenmil persona ta muri dor di arma prinsipalmente na Afrika. Durante e negosashonnan ku ku lo dura un luna, eksportadonan di arma i organisashonnan ku ta duna ayudo ta enfrenta otro.

Mas penshonado
E kantidat di penshonado na Hulanda a subi na 2011 pa di promé be riba tres mion, asina CBS, e ofisina sentral di estadístika ta informá. Poblashon hulandes ta birando dia pa dia mas bieu i a konsekuensha di esaki e kantidat di pemnshonado a subi entre 2000 pa 2011 ku kasi 600 mil penshonado. Un grupo chiki, ku ta birando mas grandi, ta biba den eksterior. Aña pasa e grupo aki tabata mas o menos 50 000 persona. E edat promedio ku hulandesnan ta baha ku penshun a subi di 61 pa 63. 

Partido nobo ke subi palaka di vakansi pa penshonado
E partido 50Plus ke un oumentu di e plaka di vakansi pa penshonado. Den e programa di elekshon e partido ta skibi ku penshonadonan mester haña mes tantu plaka di vakansi ku hendenan ku ta traha. E porsentahe mester subi di 6 pa 8 porshento. E medida aki ta gosta 450 mion di euro. E partido di kabes di partido Henk Krol ke ekonomisá riba gastunan di gobièrnu pa asina paga e medidanan manera oumento di plaka di vakansi ku e ta proponé. 

Rutte: 'Esklabitut ta dehumanisa'
Pa muchu tempu esklabitut tabata un kos muchu komun i koriente na Hulanda i na otro partinan di Reino. Asina promé minister Rutte a bisa ayera durante e konmemorashon nashonal di pasado di esklabitut hulandes na Amsterdam. 'Esklabitut ta dehumanisá hende', asina Rutte a bisa. Segun e promé minister esklabitut ta redusi hende hasi nan medionan di produkshon. E konmemorashon a tuma luga den Oosterpark kaminda e monumentu nashonal di esklabitut ta situá i a konmemorá abolishon di esklabitut 149 aña pasá na èks kolonianan hulandes Sürnam i Antia. Abolishon a pone un fin na mas ku 200 aña di esklabitut. Durante ponementu di krans Barryl Biekman, un di e inisiadornan di e monumentu, a subi stage pa e protesta kontra paramentu  di supsidio di NiNsee, e instituto nashonal tokante esklabitut.

Demonstrantenan a asaltá ofisina di konseho elektoral
Na Benghazi, suidat di Libia tresshen demonstrante a asaltá un ofisina di konseho elektoral. E hòmbernan a bai ku kòmpüter i karchi di vota i a kima nan pafó di e ofisina. E demonstratenan ke pa e region ront di Benghazi haña mas outonomia. Na Libia tin elekshon parlamentario fin di otro siman. E promé elekshon despues di morto di èks diktador Kadhafi òktober aña pasa. Hopi habitante den e parti ost di Libia ke mas asiento den e parlamentu nobo.

Musulmannan ta destruí graf
Na Timboektoe, na Mali musulmannan ekstremista pa di dos dia konsekutivo a bolbe destruí ayera monumentunan di graf mundialmente konosi. E grafnan tabata blanku di e rebeldenan pasó segunan ta trata e defuntunan manera santu i esaki ta kontra di islam. Segun testigunan okular ayera sigur tres mousuleo a keda destruí kompletamente.  UNESCO a kondená e akshonnan fuertemente. E siman aki UNESCO a buta e grafnan riba e lista di patrimonio internashonal.

Kabes den parke
Na Montreal na Canada nan a haña un kabes. Polis ta investiga si ta trata di e kabes di e studiante chines ku Luka Magnotta a asesiná. Ta sospecha Magnotta di a kap kurpa di su amigu na pida pida i ku el a kome partinan di e kurpa. A haña e kabes bentá den un parke algun kilometer for di e kas di Magnotta. Magnotta a manda otro parti di e kurpa di su amigu pa skol i partidonan polítiko. A detené Magnotta na Berlin. E ta bisa ku e ta inosente.

Aterizahe a kousa dolo
E astronouto hulandes André Kuipers ta bisa ku su aterizahe di ayera a kousa hopi dolo i e no tabata komfortabel. El a aterizá den un kápsula espasial chiki na Kazachstan. Kuipers a keda algu mas ku mei aña den espasio den e nave espasial ISS. Esaki tabata e biahe espasial oropeo di mas largu te ku awor. Den un entrevista Kuipers a bisa ku e ta sintié maryá i su kabes ta bira si e move muchu. E astronouto mester siña kana atrobe. Awe Kuipers mester yega estado merikano Houston kaminda e lo keda próksimo simannan pa e rekupera. Na Houston e lo topa ku su kasa i yunan. Prínsipe Willem-Alexander i promé minister Rutte a duna Kuipers pabien ku su seif retiru na mundu.

Pronóstiko di tempu na Hulanda:
Awe ta seku i tin hopi solo. Temperatura 22 grado. Mayan ta un tiki mas kalor, pero tin chèns riba áwaseru.