Boletin di notisia, 2 di sèptèmber

Krísis den CDA por lo pronto bou di kòntròl
E krísis den seno di CDA, e partido demókrata kristian ulandes, por lo pronto ta parse di ta bou di kòntròl. Ayera djárason den oranan di anochi un skisma den frakshon dje partido tabata parse inevitabel na momentu ku un karta di ko-negoshadó Ab Klink di CDA a lèk.Den e karta el a skibi ku kolaborashon ku PVV di Geert Wilders definitivamente ta un trayekto intransitabel. Despues di mediashon di minister Donner, Klink i parlamentarionan Koppejan i Ferrier di CDA a disidí di warda riba resultadonan di e negosiashonnan. Klink lo hala atras sí komo ko-negoshadó. Maxime Verhagen, lider di frakshon di CDA lo sigui sin mas komo negoshadó prinsipal. Sekretario di estado Ank Bijleveld ta remplasá minister demishonario Ab Klink komo negoshadó. Awe ta reanudá e negosiashonnan ku VVD i PVV, ku a stanka debí n'e krísis den seno di CDA. Kabesante di PVV, Geert Wilders a duna di konosé kaba ku e tin hopi pregunta pa Verhagen.

MFK, PS i MAN a firma karta di intenshon na Kòrsou
Na Kòrsou e tres partidonan MFK, Pueblo Soberano i MAN a firma un karta di intenshon ayeratardi, pa forma un gobièrnu nobo mas pronto posibel. Ku esaki nan a saka PAR afó, ku t'e partido mas grandi. Despues dje elekshon pa Konseho Insular di 27 di ougùstùs último PAR, e partido gobernante di Antia i di Kòrsou a bolbe bira e partido mas grandi, i a subi di 7 pa 8 asiento. Djaluna último a inisiá e deliberashon pa formashon tambe. Pero awor MFK, Pueblo Soberano i MAN a primintí di no negoshá mas ku PAR, pero pa forma un gobièrnu konhuntamente. E partidonan ke traha riba un gobièrnu kaminda 'libertat, igualdat, solidaridat, hustisia sosial i rèspèt pa dignidat di pueblo di Kòrsou' ta pará sentral. Ademas di esei e partidonan ta tene mas demokrasia i mió kalidat di bida pa pueblo haltu na laria. Kòrsou ta na víspera di reformenan estatal importante. E Konseho Insular nobo mester atendé k'un Konstitushon pa Kòrsou, moda ku e isla por bira pais outónomo den Reino entrante 10 di òktober dje aña akí.

Kontrabandista di hende na Méhiko no ke laga 17 imigrante ilegal bai
Den nòrt di Méhiko kontrabandistanan di hende tin por lo ménos 17 imigrante ilegal wantá, segun polis di Tijuana, un siudat mehikano pegá ku frontera di estado merikanu Kalifòrnia. Polis a sa di e sekuestro despues ku dos imigrante a sali liber. Nan a informá ku tin 17 otro imigrante será den un edifisio na Tijuana. Outoridatnan ta tratando na saka afó ta kua edifisio nan ke men. Siman pasá outoridatnan a deskubrí kurpa sin bida di 72 imigrante ilegal na un finka den nortost di Méhiko. Segun gobièrnu ta e guèn yamá 'Los Zetas' ta tras di e masakre. Un sobrebibiente a deklará ku a sera e víktimanan den un kas di kunuku djis dilanti frontera ku Estados Unídos. Aya e trafikantenan di hende a eksigí plaka di nan. Ora ku e kriminalnan a ripará ku niun hende no tabatin sèn, nan lo a ofresé e migrantenan un djòp komo sikario, o sea hende ku ta mata otro pa sèn. E hendenan a ninga, segun e sobrebibiente, antó despues a tira nan mata.

Mineronan chileno a kome nan promé plato kayente
E mineronan chileno, ku a keda pegá n'un profundidat di 700 meter bou di suela, a kome kuminda kayente pa promé biá. Te awor tabata duna nan píldora di glukosa i lechi ku hopi proteína. Entretantu un ekipo di NASA, e organisashon merikanu di biahe espasial a yega Chile. Ta trata di eskpertonan riba tereno di estadia será den kamber chikí. Un di nan ta yuda ku preparashon di menú p'e 33 mineronan. Ekspektativa ta ku reskate di e mineronan lo dura tres pa kuater luna. Debí na su intervenshon rápido, popularidat di presidente Piñera a oumentá ku 10 porshento for di yüli último, awor el a bira 56 porshento, loke t'e skor mas haltu for di momento ku el a asumí su kargo na mart dje aña akí.

Sospechadonan yemenita arestá na Schiphol ta den libertat atrobe
E dos hòmbernan yemenita, ku a arestá na Schiphol djaluna último ta den libertat atrobe. Ministerio Públiko ta bisa ku nan no tabata tramando un atentado. E duo tabata na bordo di un avion prosedente di Chicago ku destinu Amsterdam i a base di informashon for di Merka a gara nan. A pone maleta di un di nan rib'un buelo pa Washington. A bin haña artefaktonan sospechoso den e ekipahe. Ayera djárason fuentenan di FBI a notifiká kaba ku e dos Yemenitanan ta inosente. Ministerio Públiko di Hulanda ta bisa awor ku nan detenshon ta debí n'un ekibokashon. Posiblemente e dos hòmbernan lo sigui awenochi mes pa Dubai, ku ta nan destinashon final.

Kòntròl di Maresjosei na Schiphol a resultá den hayasgo di 13 arma
Maresjosei a topa ku 13 arma durante un akshon grandi di kòntròl pegá ku airopuerto Schiphol. Riba e kareteranan den direkshon di e airopuerto i na Schiphol mes tambe a listra kasi 500 persona i por lo ménos shen outo. Maresjosei ta bisa ku ta trata djun kòntròl preventivo pa kua a hasi uso di servisio di 40 empleado. A bin haña entre otro un machete, un her'i moketa, tres chikoti i shete kuchú. Tambe a topa ku lote di sòftdrùg. Maresjosei tin kustumber di kontrolá alrededor di Schiphol i ta bisa di ta topa ku ménos i ménos arma.

Kardenal Simonis mester testiguá bou di huramentu
Kardenal ulandes Simonis mester testiguá bou di huramentu. Esaki segun eksigensha djun abogado di un víktima di abusu seksual, ku un pader a kometé na Hulanda. Polis a kapturá e klérigo na 1979 pa abusu seksual di mucha hòmber den un sentro di hubentut na Rijswijk. E siudat ta kai bou di obispado di Rotterdam, kaminda Simonis tabata obispu.E tempu ei a seponé e kaso.

Wer na Hulanda
Shelu ta nublando mas i mas for di nòrt, aki i aya awa ta kai, sobretodo na ost di Hulanda. Temperatura ta den kareda di 19 grado. Mañan tin mas solo, i kisas algun yobida. Den fin di siman lo bira solo-solo, ta keda seku i temperatura ta entre 20 i 22 grado na Hulanda.