Mester sania Tesoro Públiko hulandes pa kaba

Komisario hulandes Rehn riba nivel oropeo ta haña ku otro aña Hulanda mester redusí su défisit presupuestario te bou di 3 porshento, kueste lo ke kueste. El a kòmbersá ku minister De Jager di Finansa i el a bisa ku e ta konfia ku esei lo logra. El a enfatisá ku Hulanda tin un tradishon sólido di finansa gubernamental duradero. E ta haña ku paisnan oropeo mester atené nan mes n'e puntonan di salida, maske ku situashon ekonómiko no ta duna. Minister De Jager ta di akuerdo kuné. Posiblemente gabinete hulandes ta ekonomisá miares di euro adishonal pa sania tesoro públiko. Otro luna lo bisa si esei lo sosodé realmente.

Pelea sangriente den stadion di futbòl egipsio
E disturbionan k'a surgi despues djun weg'i futbòl na Egipto a eksigí bida di desenas di hende. E hunta militar gobernante na e pais a proklamá tres dia di luto nashonal. Por lo menos 74 persona a pèrdè nan bida ora ku gruponan di fanátiko rival di otro a ataká otro í e hungadónan di bala na final dje wega entre Al-Mahsry i al-Ahly na Port Said. Mas ku 200 hende a keda heridá. A konvoká un reunion urgente awé pa parlamentu egipsio deliberá riba loke a pasa. E parlamentarionan a tene ún minüt di silensio pa e víktimanan. Presidente di parlamentu a yama e disturbionan trabou di diabel i el a bisa tambe ku revolushon na Egipto ta kore peliger. A keda di tene varios manifestashon di protesta kontr'e echo ku polis a intervení muchu lat den e stadion. Outoridatnan lo no a hasi lo sufisiente pa garantisá seguridat i protekshon riba kaya i den stadion. A disolvé bònt di futbòl egipsio. Mohammed Ibrahim, minister di Asuntunan Interno, a kore ku Essam Samak, hefe di seguridat na Port Said, esenario di un dje iregularidatnan mas sangriente den istoria di futbòl.

Polis ta wèlga na Sürnam pa tempu indefiní
Wèlga di polis na Sürnam ta kousando basta problema den tráfiko. Fuera djesei awaseru torensial ta hasi e kos mas problemátiko ainda. Polis a drenta wèlga pa tempu indefiní. Nan ta eksigí sobrepago i prima ku gobièrnu a primintí nan, pero por lo pronto gobièrnu no tin intenshon di kumpli. Pa garantisá orden i seguridat n'e pais, outoridatnan a disidí di pone otro servisionan di seguridat patruyá na lugá di polis, manera por ehèmpel ehérsito nashonal, pa intervení si esei ta nesesario.

Fèri a senk ku 350 hende na Papua N-Guinea
Un fèri a senk dilanti kosta di Pápua Nieuw-Guinea ku mas o menos 350 hende na bordo. Segun e último informe k'a drenta, a logra saka 200 for di awa; ta teme sí ku mas ku shen a hoga. E fèri tabata na kaminda p'e isla prinsipal di Papua Nieuw Guinea prosedente djun isla mas chikí dje archipiélago. Kousa dje desgrasia no ta kompletamente konosí ainda. E barku no a notifiká ningun problema; wardakosta di Oustralia a risibí notifikashon sí di satélite, ku a detektá vürwèrk di emergensha, kédesir e bolanan kòrá ku barku ta manda lèira pa pidi ouksilio, pero a resultá k'e barku a senk kasi por kompletu kaba.

Ret di media sosial Facebook ta bai Bolsa
Facebook, e reda di media sosial, ta bai bolsa. Ku e paso akí e empresa merikanu ta spera di generá 5 miar di dòler, loke ta muchu ménos plaka di loke analistanan a fèrwagt. Nan a kalkulá ku Facebook lo gana por lo menos 10 miar ku su debut bursátil. Esaki no ta kita ku te awor ta trata dje baiment'i bolsa mas grandi di un empresa riba enternèt. Ta kalkulá ku Facebook bal shen miar di dòler, mas o menos mes tantu ku McDonald's, e kompania gigante di benta di hèmbùrger.

Ekonomisashon drástiko American Airlines
American Airlines ta bai ekonomisá drástikamente ku su personal. Lo skrap 13.000 kupo di trabou, ku ta 16 porshento dje total. E empleadonan ku por keda, mester entregá 20 porshento di nan salario. Lo kòrta nan penshun tambe. Novèmber di aña pasá, e kompania merikanu di aviashon a pidi wes pa proteg'é di su kreditornan. Direktiva di American Airlines ta bisa ku lo hundi e kompania, si keda sin tuma medida drástiko.

Detenshon duo trafikadó di para eksótiko
Ayera Polis di sekshon Rotterdam-Rijnmond a detené dos hòmber ku supuestamente ta kulpabel di trafikashon di para eksótiko. Ta sospechá e duo di Rotterdam i Spijkenisse di froude i tambe di kompra di para hòrtá. Nan lo a maltratá bestia tambe. E duo lo a importá para tropikal ilegalmente for di Sürnam. Despues ku polis a listra kas dje hòmbernan, a konfiská un kantidat di para i tambe plaka i arma di kandela.

Trainer di bokseo Angelo Dundee a fayesé
Èks bòksdó i treiner merikanu Angelo Dundee a fayesé na Florida. E tabata traha komo entrenadó i asistente di 15 kampeon mundial di bokseo, entre nan Muhammed Ali, Sugar Ray Leonard i George Foreman. Dundee a sinta den skina di rin na kasi tur enkuentro grandi di Muhammed Ali. Angelo Dundee a bai sosegá na edat respetá di 90 aña.

Mas ku shen hende a muri di friu na Oropa
E kantidat di hende ku a peresé na Oropa pa motibu di frialdat di wenter a pasa shen bai. Sobretodo na Ost-Oropa a kai hopi víktima. Ukraína ta e pais mas perhudiká ku un total di 63 morto, binti di nan a fayesé mardugá k'a pasa. Temperatura a sak bai te 30 bou di sero. Na Polonia 29 hende a vris muri te awor. Partinan di Black Sea pegá ku Rumania a kongelá anto na algun region di Bulgaria, a midi e temperatura mas abou di último shen aña.

Pronóstiko di tempu na Hulanda
Awe solo ta bria henter dia atrobe, ta den nòrt so t'un tiki nublá ku chèns di yobida di  sneu. Temperatura ta varia entre 3 i 6 grado bou di sero, pero mardugá lo e sigui baha i elada ta sigui ekstremo, pa no bisa estilo polo norte. Mañan sneu ta kuminsá kai kuminsando den nòrt.