Boletin di notisia, 17 di novèmber

Rutte ta konsiderá su gabinete stabil
Promé minister Rutte ta konvensé ku su gabinete ta stabil. Rutte a bisa esaki djamars anochi den e debate den parlamento tokante e asuntu rònt di e parlamentario di PVV Lucassen. Gabinete ta hopi okupá aktualmente. Nan mester kue e asuntunan ku a kumbiní den e akuerdo di goberná i tolerá, i laga nan bira medida, segun Rutte. Anteriormente a sentensiá Lucassen pa libertinahe. E no a divulgá esaki ora el a solisitá seka PVV. Lider di PVV Wilders a pidi despensa i a deklará ku el a keda sin investigá pasado di Lucassen.

Parlamentario Sharpe difamá
E parlamentario di PVV James Sharpe djamars a keda mas difamá atrobe. Te ku poko tempu pasá Sharpe tabata direktor di un kompania di telekòm ku na aña 2008 a haña un but na Hungaria pasobra nan lo a gaña kliente. Na prinsipio Sharpe a ninga redondamente, pero despues e lider di PVV Wilders mester a atmití ku tabatin kestion di un but. Sharpe ta di desendensia antiano. Tempu ku e tabata atleta el a hinka e kampion di dekatlòn Robert de Wit den su kara ku un spaik. Tambe e lo a menasá un hende. De Wit no a duna keho i no ke papia di e maltrato. Fuentenan den mundu di atletismo ta bisa ku Sharpe mas be tabatin kondukta agresivo. Na aña 1992 el a partisipá na weganan olímpiko na Barcelona pa Antia. Te ainda e ta den e miho 10 koredónan di kareda ku opstákulo hulandes di tur tempu.

Investigashon forénsiko na Aruba
Na Aruba e Instituto Forénsiko Hulandes ta investigá material di wesu. Nan ta hasi esaki bou di orden di Ministerio Públiko. For di e investigashon mester sali si ta trata di restonan di Natalee Holloway. A haña e material na Aruba pero no ta sigur si ta trata di resto humano. Segun e korant De Telegraaf a haña un parti di un kákunbèin na playa di Phoenix Hotel, serka di e awa di Bubali. Esaki ta un di e lugánan ku Joran van der Sloot a mustra den un deklarashon.

KLM ta sostené Space Experience Curaçao
Kompania aéreo KLM ta sostené plannan di Space Experience Curaçao pa hasi biahe den espasio for di Kòrsou. Asina un bosero di KLM a konfirmá, relatá na un notisia den De Telegraaf. Klientenan di e kompania aéreo aki tres aña por hasi un buelo den rakèt riba Korsou, kaminda na aña 2014 lo habri un base espasial. KLM a inskribí riba e promé buelonan ku ta kosta 70 mil euro. Ademas KLM ke tuma promoshon i benta di téket.

Epidemia di kólera na Haiti a kosta mas ku mil bida kaba
E epidemia di kólera na Haiti a kosta mas ku mil bida kaba. Tin mas o ménos 17 mil hende drumí den hòspital ku kólera. E enfermedat ta plama lihé pa motibu di e sirkunstanshanan higiéniko malu. Un kantidat di hende ta biba den kampamentu di tènt despues di e temblor kuminsamentu dje aña aki. Awó a konstatá un kaso di kólera den Repúblika Dominikana tambe, e pais bisiña di Haiti. Den un área turístiko un trahadó haitiano tin kólera. E hòmber a yega einan ku bùs for di Haiti.

Tanja Nijmeijer ta atmití ku el a pone bòm
E miembro hulandes di FARC Tanja Nijmeijer a atmití ku el a pone bòm na Colombia. Tambe e tabata envolví den kimamentu di bùs i kompania, asina Nijmeijer mes ta bisa. Embahador di Colombia na Hulanda a bisa Wereldomroep ku, ku e deklarashonnan aki, Nijmeijer a pèrdè su chèns riba amnestia. Siman pasá ainda gobièrnu kolombiano a bisa ku nada lo no pas'é si e retirá for di FARC, pero e oferta aki awor si a kaduká.

Konteiner yen di kokaina den haf di Rotterdam
Den haf di Rotterdam último lunanan a gara tres konteiner ku mas ku 500 kilo di kokaina. Mayoria di e droganan tabata skondí den un lote di piesa pa motor ku na yüni a yega for di Colombia. E dos otro kònteinernan a yega Rotterdam na sèptèmber i òktober. Den e kasonan ei a skonde e droganan den muebel i motor di disel. A detené kuater hòmber i dos muhé. Den kasnan i un edifisio komersial a gara droga, plaka i arma. Segun Reshèrshi Nashonal e trafikadónan di droga a lanta kompania komersial na Colombia i Hulanda pa usa komo kapa. E seis sospechosonan ta bini dilanti djabièrnè.

Prens William di Gran Bretaña ta bai kasa otro aña
Prens William di Gran Bretaña i su amiga Kate Middleton ta bai kasa otro aña. E pareha a komprometé luna pasá durante un vakashon na Kenya. William a pidi Kate su tata pa su man. E kasamentu lo ta den primavera òf den verano. Despues di e matrimonio nan lo bai biba den nort di Wales. William i Kate a sera konosí na universidat i nan konosé otro nuebe aña. Kate ta yu di un negoshante britániko. Nan tur dos tin 28 aña di edat. Despues di su tata Charles, William ta di dos den liña di suseshon di trono.

Gobièrnu britániko ta indemnisá èks prezunan di Guantanamo Bay
Gobièrnu britániko a traha un dil ku èks prizonero di Guantanamo Bay. Ta britániko òf hende ku a biba na Gran Bretaña. Sigur seis di nan ta bisa ku a torturá nan i ku servisio sekreto di Gran Bretaña tambe ta responsabel. Segun e emisora britániko BBC e èks prizoneronan huntu lo haña miónes di pònt di indemnisashon di daño. Gobièrnu britániko lo a forma un areglo pa evitá kasonan largu den korte, ku lo a duna servisio sekreto mal nòmber. Tambe e kostonan hurídiko haltu lo a hunga un ròl.

Pronóstiko di wer
Ta seku, nubla i friu. Ku un bientu ost no muchu fuerte lo bira mas o ménos seis grado. Sobra di siman lo keda nublá i poko awa lo kai. Temperatura lo subi algu, te 8 grado.