Uzo di anti depresiva a mata Whitney Houston
Famianan di Whitney Houston a deklará ku posiblemente e kantante a fayese pa motibu di un kombinashon di anti depresiva Xanax, otro pildoranan i alkohòl. Esei e wèpsait farandulero TMZ a públika. Nan a haña e informashon ei di nan fuentenan. Djasabra último a haña e kurpa sin bida di Houston den badkuip di e hotèl kaminda e tabata keda na Los Angeles. E tabata einan pa otorgashon di e premio Grammy. Dòkternan forense a bisa famia di Houston ku no ta posibel ku e kantante lo a hoga den su badkuip. Lo ta'tin tiki awa den su pulmon. Ta posibel ku e artista a fayese promé ku su kabes a bai bou di awa. TMZ a bisa tambe ku no ta un bodyguard a haña Whitney Houston pero su tanta.

Mareshosé ta detené sospechoso na Schiphol
Mareshosé a detené un sospechoso na Schiphol despues di a haña notifikashon di un bòm. Su identidat no ta konosí. No ta konosí tambe si a haña un bòm. A sera sala di embarke number 1 i 2 pa hasi un investigashon. Segun testigu okular e sospechoso lo ta un hòmber ku a kome na restorant panorama. E hòmber a ninga di paga i a sera su mes den wc. Esaki a pone hopi biahe na Schiphol kai lat.

Defensa hulandes lo tin ku traha mas ku otro paisnan
Hulanda lo tin ku kolaborá mas ku otro paisnan pa loke ta trata defensa. Lo por kumpra arma, mantene material i trein sòldá nan huntu. Esei konseho di asesoramentu internashonal di problema a avisá minister Hillen enkargá ku Defensa. Krisis finansiero ta obligá paisnan oropeo pa bin ku kolaborashon militar. Temor pa pèrdida di soverania nashonal ta algu ku ta pertenesé na pasado segun e Konseho di Asesoramentu. Tambe e konseho ta haña ku no tin ku ekonomisá riba Defensa.

Henrique Capriles gran rival di Chávez
Henrique Capriles, lider di oposishon venezolano, ta bira e kontrinkante prinsipal di presidente Hugo Chávez durante elekshonnan presidensial ku ta tuma lugá na òktober. Ayera Capriles a gana durante un pre-elekshon. El a haña 62 porshento di tur voto. Mas ku 3 mion persona a bai vota. Capriles di 39 aña ta gobernador na estado Miranda. Opinionnan ta dividí tokante su chèns pa gana Chávez

Polis brasileño na Salvador ta reanudá trabou
Polisnan brasileño a kuminsá traha awe atrobe despues di a wèlga 12 dia na siudat Salvador. Outoridatnan a bai di akuerdo ku subida di sueldo di 6.5 porshento ku nan a eksigí. Tambe a primintí ku lo no kita ningun di e 6000 agentenan ku a wèlga for di trabou. Kantidat di morto a subi durante e wèlga. Entretantu e wèlga di polis na Rio de Janeiro sí ta sigui. Djabièrnè pasá nan a para tur trabou. Segun outoridatnan no ta nota mashá di e wèlga. Mayoria agente lo no ta partisipá na e paro di trabou.

Ta saka parlamentario for di partido despues di votashon di parlamentu na Gresia
Votashon den parlamentu griego pa bai di akuerdo ku ekonomisashon tabatin algun konsekuensia negativo pa desenas di parlamentario di partidonan gobernante. A saka nan for di e partido. Nan no a mantené nan mes na disiplina di e partido. Durante protesta na Athenas mas ku 80 persona a keda heridá. Gobièrnu di Gresia tin ku ekonomisá ku mas di 3.3 miar euro pa asina bini na remarke pa haña fiansa internashonal di emergensia di mas ku 130 miar euro.

Rusia i China ta bòikotia plan pa mishon di pas na Siria
Rusia i China ahinda no a bisa si nan ta sostené un mishon di pas di Nashonnan Uní na Siria.
Liga Arabe ke kuminsá ku un mishon di pas na Siria huntu ku Nashonnan Uní. Rusia ke evalua e proposishon. Minister di asuntunan di eksterior ruso, Lavrov, ke pa bini promé ku un toke de keda na Siria. E ora ei numa lo por kuminsá ku un mishon di pas na e pais. China ta sostené intentonan di Liga Arabe pa purba trese kambio pa medio di polítika. Pero e minister chines enkargá ku asuntunan di eksterior no ke duna kontesta riba e pregunta si nan tambe ke sostené un mishon di pas na Siria. Siman pasá China i Rusia a wanta un resolushon ku Konseho di Seguridat pa pidi retiro di presidente Assad di Siria.

Futuro presidente China di bishita na Merka
Desishonnan importante no ta pará riba agenda pero tòg ta spera hopi di e bishita di presidente di China, Xi Jingping na Estados Unidos. E polítiko di 58 aña lo tuma mando na e pais fin di e aña aki. Esei ta hasi'é un partner interesante pa Merka. Xi ta konosí komo konservativo. Vise presidente Joe Biden lo risib'é. Mañan Xi lo tin un enkuentro ku presidente Barack Obama.

Mas hulandes ku sueldo mínimo
E kantidat di persona na Hulanda ku tin ku sobrebibi ku un sueldo mínimo ta kresiendo. Esei trahadonan soshal ku ta yuda personanan ku debe i dùrwarder ta bisa. Segun nan ahinda no tin sifranan ku por proba esei pero tur kos ta mustra riba e echo ku kada biaha tin mas hende ku debe. Ta trata di personanan ku ta kustumbra di tin un bon salario. E problemanan ta kuminsá pa motibu di bahamentu di preis di bibienda, gastunan haltu of perdementu di trabou, segun organisashon di ayudo di personanan ku debe NVVK.

Febrüari luna di mas friu di 2012
Nunka antes promé mitar di febrüari tabata asina friu. Pero e aña aki sí. E promedio di temperatura den dia i anochi tabata 7 grado bou di sero. Na 1917 tambe a marka un rèkort di frieldat. E promedio tabata 6.4 grado bou di sero. Entretantu e periodo di frieldat a pasa na Hulanda. Awor bientu ta supla for di wèst, loke ta trese airu un poko mas kayente den e pais.

Wer na Hulanda:
De bes en kuando awa ta kai. Temperatura ta 4 grado. Awenochi lo ta seku. Temperatura ta nèt riba sero grado. Mañan ratu ratu solo ta bria.