D66 ta yama Boris van der Ham ayó

Boris van der Ham no ta eligibel mas pa partido D66. Despues di elekshon parlamentario di 12 di sèptèmber e no ta regresá Tweede Kamer mas. Segun e mes di, e ta preferá "algu nobo". Van der Ham a drenta parlamentu hulandes na 2002. E tabata plantia ideanan di partido D66, entre otro riba terenu di enseñansa, kultura i media. Ekspreshon liber i libertat dje individuo tabata pertenesé na su tópikonan. Desishon di Van der Ham a kue lider di partido, Alexander Pechtold, di sorpresa.

Yen di nobato riba lista di partido CDA
Kònsèpt dje lista di kandidato di partido CDA pa próksimo elekshon parlamentario na Hulanda ta yen di figura nobato. E lista tin 56 nòmber, 9 di nan so ta miembro parlamentario den funshon. Den e promé 15 hendenan riba lista tin 8 kandidato nobo. Un di nan ta Mona Keijzer, e ta pará na di dos lugá, despues di kabesante di lista Sybrand van Haersma Buma. Mas aleu tin tambe Arjan Erkel, konosí p'e sekuestro ku a dura kasi dos aña na Rusia, kaminda e tabata aktivo pa Dòkternan sin Frontera.

Pago adishonal pa kompensá situashon islanan BES
Islanan Boneiru, Sint Eustatius i Saba lo risibí mas sèn di Den Haag. Lo oumentá nan pago konhunto di 35 mion di dòler pa kasi 43 mion. Boneiru lo risibí kasi 5 mion adishonal, Sint Eustatius 1.3 mion i Saba 1.2 mion, asina minister Liesbeth Spies di Asuntunan Interno a anunsiá. Ta pone 800.000 dòler disponibel pa atendé ku problema sosial ekonómiko. E tres islanan BES ta risibí un asina yamá vrije uitkering, ku ta di kompará ku e pagonan for di fondo munisipal pa munisipionan hulandes. A disidí di oumentá e pago despues di a averiguá tareanan ku e islanan tin di ehekutá den e situashon nobo ku a surgi for di òktober 2010.

Presidente boliviano di bishita na Den Haag
Awemainta presidente Evo Morales tabatin un enkuentro na Den Haag ku Emil Roemer, lider polítiko di partido sosialista SP. E kòmbersashon a tuma lugá a petishon di Morales. Roemer a bisa ku e deliberashon bal la pena i ku bishita di Morales ta un onor p'e. El a bisa tambe ku ta duel e presidente sosialista ku Hulanda a para yudansa pa desaroyo di Bolivia. Despues di Roemer, Morales a papia ku minister Rosenthal di Asuntunan di Eksterior. Na final el a bishitá Floriada, e eksposishon di hortikultura na Venlo.

Hugo Chávez lo partisipá na kontienda elektoral
Ku un komitiva di miles di simpatisante i ku su yu muhénan band'i dje, presidente venesolano Hugo Chávez a postulá su mes ofishalmente komo kandidato pa elekshon presidenshal na òktober. E presidente ta kere ku no tin mester di wòri ku su kondishon di salú. Último aña a duna e presidente tratamentu médiko pa kanser na vários okashon. E ta sinti'é sufisientemente fet pa reeligi'é. E lider sosialista ta na kabes di Venezuela for di 1999. Ku tur e reelekshonnan, Chávez por keda na poder te 2019. E presidente lo enfrentá kandidato di oposishon Henrique Capriles. Djadumingu último el a registrá komo kandidato presidenshal p'e elekshon di 7 di òktober.

Sòlda stashoná na Afganistan por vota ayá mes
Militarnan hulandes stashoná na Afganistan por entregá nan voto aya mes dia 12 di sèptèmber próksimo. Ministerio di Defensa lo depositá urna elektoral ayá spesial p'e okashon. Despues ta seya i manda nan Hulanda. Ta pa promé biá ku militarnan ku'n mishon por vota den eksterior mes pa elekshon ku tene na Hulanda. Antes nan ayá tabata por
únikamente pa medio di pòst òf si outorisá un persona na Hulanda. Pa por vota na Afganistan, militarnan mester pidi un formulario di voto sí promé serka nan propio munisipio.

Monumento hudiu Yad Vashem Heruzalèm manchá
A mancha e m monumento na Heruzalèm, dediká na víktimanan di persekushon di hudiu na Oropa. Ta trata dje monumento i museo famoso Yad Vashem anto riba dje a skibi lema na hebreu, dirigí kontra estado Israel i kontra zionismo. Bosero polisial a bisa ku no sa nada ainda dje malechornan. Yad Vashem a kolektá entre otro nòmber i datonan di paradero di kuater mion dje mas o menos seis mion di víktima hudiu di Segundo Guera Mundial.

Hulandes sospechá di froude ku creditcard na Seattle
Na siudat merikanu Seattle a hib'un hulandes dilanti wes, ya ku ta sospech'é di froude na gran eskala ku tarheta di krédito. Media merikanu ta informá ku a demandá David S. pa hòrtamentu di dato di por lo menos 44.000 sifra di tarheta di krédito. E hóben hulandes di 21 lo a ofresé e numbernan na benta riba vários wèpsait. Na mart a arest'é na Rumania anto djasabra último a ekstradit'é pa Merka. E hulandes a bisa wes ku e ta inosente.

Mucha ta shilt ehérsito Siria kontra atake oposishon
Militarnan sirio ta torturá mucha i ta uza nan komo shilt humano, asina ta pará den un rapòrt di Nashonnan Uní. Supuestamente ta fòrsa mucha kore ku nan riba tank'i guera i den konvoi. Dje forma akí ehérsito sirio ke evitá atake di oposishon. Den e rapòrt por lesa tambe relato di mucha ku ta konta kon a martirisá nan. E enviado spesial di Nashonnan Uní pa mucha den konfliktonan armá a keda morto spantá. Mutilá i mata mucha den guera sa sosodé mas biá, pero torturá mucha chikí den koutiverio ta úniko den su sorto, segun e señora enviado di Nashonnan Uní.

Korient'i lodo na Afganistan despues di temblor
Paradero di por lo ménos 80 hende ta deskonosí ainda den nòrt di Afganistan despues dje dos temblornan di ayera, ku intensidat di 5.7 i 5.4 riba eskala di Richter. E dos teremotonan a okashoná koriente di lodo, ku a kubri desenas di bibienda na provinsha Baghlan. No tin masha chèns ku e habitantenan a sobrebibí e desaster natural. Outoridatnan afgano a pidi yudansa serka trupanan internashonal stashoná riba nan teritorio. E militarnan hulandes tambe lo duna asistensha si resultá nesesario.

Koro rasista riba tribuna kontra futbolista eksótiko
UEFA, bònt di futbòl oropeo ta bai investigá e komentarionan rasista ku a grita riba tribuna durante e weganan di Spaña kontra Italia i Rusia kontra Chekia na Kampeonato pa Kopa oropeo. Parse ku Mario Balottelli di Italia i Theodor Gebreselassie di selekshon cheko, ambos futbolista estelar koló skur, tabata blanko di ekspreshonnan rasista di gruponan di fanátiko riba tribuna durante wega. Ademas di keho tokante rasismo, a drenta denunsia ofisial tambe serka komishon disiplinario di UEFA enkuanto malkomportashon di fanátikonan kroata, portugues, aleman i ruso.

Wer na Hulanda
Awetardi ta nublá ma debésenkuando solo ta bria sí. Awa ta kai ratu ratu tambe. Na islanan Wadden ta 15 grado, miéntras ku den interior por bira 19 grado.