But ta sigui pa esnan ku tarda muchu ku estudio

Organisashonnan estudiantil na Hulanda ta sumamente desapuntá awor ku wes a aprobá gran parti dje areglo di but ku lo imponé na studiante ku tarda mas de lo debido ku kabamentu di nan estudio. Segun e organisashonnan ta konfrontá 66.000 studiante ku kambio di regla turesten ku wega t'aden na mod'i papia. Konseho di HBO, o sea di skol profeshonal superior tambe ta prekupá. Sobretodo studiante ku ta kombiná estudio ku trabou i kuido di famia, lo sufri na man dje areglo di but. Organisashonnan kordinante di studiante na Hulanda ta hasi un apelashon na polítika pa anulá e but ainda.

Entrante otro aña subida edat AOW na Hulanda
Desishon a kai na Hulanda. Entrante otro aña ta subi edat pa derechi di AOW, o sea di penshun general di behes. Despues di parlamentu, awor ta senado tambe ta aprobá un subida gradual dje edat, pa finalmente e bira 67 aña. Ta pa promé biá for di 1956 ku ta kambia edat di penshun di behes. Otro aña edat di derechi di AOW ta subi bira 65 aña i mèi anto despues dje momento ei e ta sigui subi den etapa te yega 67 na 2023. No ta mashá probabel ku lo hala e subida di edat bèk despues di elekshon. Den mayoria programa elektoral tin pará ku ampliashon di edat di AOW ta inevitabel. Sindikatonan hulandes ta desapuntá ku a subi edat pa bin na remarke pa penshun di behes, esta di 65 aña, hasié 67 aña.

Cft no tin pasenshi segun gabinete Schotte Kòrsou
Gabinete Schotte ta haña ku e konseho di Kolegio di Supervishon finansiero, esta pa Hulanda mete ku maneho finansiero di Kòrsou, ta prematuro e innesesario. E kolegio a duna e rekomendashon ei komo ku presupuesto kurasoleño di 2012 no ta kuadra ku normanan di lei di Reino. "Si Cft lo a warda un luna i mei mas ku pasenshi, anto e or'ei lo el a mira ku efektivamente nos por implementá e ekonomisashonnan den sektor di salubridat públiko," segun promé minister Schotte.

Kambio den ehekushon kastigu di morto na Texas
Estado merikanu Texas lo kambia prosedura dje sistema ku ta ehekutá kastigu di morto. For djawó esnan kondená na morto lo risibí ún sustansha mortal so enbes di tres inyekshon ku diferente líkido. Tur esaki pasobra reservanan di inyekshon di Hustisia teksano ta kabando. Aña pasá mes stòk djun otr'un método mortal a kaba, komo ku e agensia no kier a produsíé mas pa motibunan étiko. Texas ta e estado na Merka ku e kantidat mas grandi di ehekushon di kastigu mortal.

Prolongashon mishon opservador na Siria deseo Rusia
Rusia ke pa prolongá mishon di opservadornan di Nashonnan Uní na Siria, asina ta resultá for djun konsepto di resolushon ku Rusia a entregá na Konseho di Seguridat di Nashonnan Uní, segun agensia di prensa Reuters. Chèns ta grandi ku Estados Unidos i e paisnan miembro oropeo di Konseho di Seguridat lo no bai di akuerdo ku e proposishon ruso. E paisnan ei ta deseá mas sanshon diplomátiko i ekonómiko. E 300 opservadornan di Nashonnan Uní no por a hasi masha kos for di mediados di yüni, komo ku nan a haña nan obligá di keda den hotèl debí n'e agreshon n'e pais na Medio Oriente.

Desgrasia ku krusero Costa Concordia ta duel kaptan Schettino
Kaptan di Costa Concordia, e krusero ku a kai di banda dilanti kosta italianu na Toscane, a pidi despensa p'e desaster marítimo ku a tuma lugá na yanüari dje aña akí. Kaptan Schettino a bisa ku su tinu a kita na momento ku e barku a dal den baranka. E desgrasia a eksigí bida di 32 hende na bordo. Djis promé k'e aksidente Schettino tabata na telefòn. E ta sinti'é kulpabel p'e motibu ei. Ta hibando un investigashon penal kontra Schettino. Ta akus'é di homisidio, di a okashoná noufragio i di a bandoná e barku promé ku ora. Te dia djawe Costa Concordia ta drumí n'e sitio di desaster. Pa kit'é for djei por dura un añ'.

Tragedia ku refugiado di Nort Afrika den boto riba Laman Mediteráneo
Atrobe un tragedia di refugiado a eksigí bida di hende riba Laman Mediteráneo; 54 persona a muri di set despues djun intento malográ pa nabegá ku boto di rùber di Libia pa Italia. Un hòmber di Eritrea tabata e úniko sobrebibiente. A reskat'é ora ku a deskubrí pidanan dje boto dilanti kosta di Tunesia. Mitar dje nabegantenan tabata prosedente di Eritrea. Nashonnan Uní no por kab'i komprondé ku niun barku riba Laman Mediteráneo no a detektá e boto di rùber yen di refugiado. E aña akí 170 hende a peresé despues di a purba krusa laman entre Libia i Oropa.

Konmemorashon kaída di kolonia musulman Srebrenica
Miles di hende a akudí awé na Srebrenica pa konmemorá kaída dje kolonia musulman na Bosnia, 11 di yüli 1995. Den e dianan despues, ehérsito bosnio-serbo a mata miles di hòmber islámiko. Awe ta bolbe dera 520 di e 6800 mortonan ku a logra identifiká te awor. E tempu ei ehérsito bosnio serbo tabata bou di mando di general Ratko Mladic, ku aktualmente ta komparesé dilanti wesnan dje tribunal na Den Haag pa krimennan kometé den e guera yugoslabo. Sòldá hulandes ku hèlmu blou, o sea djun mishon militar di Nashonnan Uní ta supos di a protehá e kolonia musulman, pero nan no a logra evitá kaída di Srebrenica.

Ta proponé serament'i hòspital na Hulanda pa limitá gastu médiko
Pa limitá gastu di kuido médiko, mester por sera por lo menos 15 hòspital sin ningun problema, segun presidente di direktiva di agensia di seguro médiko CZ den 'Altijd Wat', un programa di NCRV. El a bisa ku lo no tin lista di espera si sera, por ehèmpel, un dje hòspitalnan na Amsterdam. Presidente di direktiva di AMC na Amsterdam a bisa na su turno ku 'kisas e ta di akuerdo ku esei', pero e ta puntra su mes sí kon bin antó kompanianan di seguro médiko ta sera kòntrat kétubai ku tur hòspital. CZ ta kere ku ta lukrativo tambe pa no hasi sierto tiponan di operashon médiko mas. Sa sosodé ku hòspitalnan ta wak e sèn ku ta drenta enbes di aktua na bienestar di pashènt.

Treiner di gimnasia sospechá di aktonan inmoral ku mucha
A suspendé un treiner di 38 aña di edat n'un klup di gimnasia na Den Bosch, sospechá di a kometé akto inmoral. Turnvereniging Flik-Flak a pone e entrenador di Nederweert riba nònaktif, despues ku a denunsi'é. No sa kuantu mucha e hòmber tabata guia ku ehersisio. üniko kos ku e direktor ke bisa ta ku ta trata djun 'klup selekto'. Flik-Flak ta bisa ku e hòmber tabata traha na vários otro klup di deporte. Dos siman pasá un mucha hòmber menor di edat di Weert a denunsiá e trainer serka polis.

Wer na Hulanda
Ta variablemente nublá, debésenkuando awa ta kai anto por surgi tempestat. Temperatura ta mas o ménos 19 grado. Bientu ta moderá i ta bin di zùitwèst, na kosta e ta basta fuerte. Mañan tambe awa por kai, ma mèrdia wer ta habri atrobe i solo lo bria mas.