Persiguishon Joran van der Sloot. Estados Unidos ke persiguí Joran van der Sloot pa asesinato. Asina Michael Griffith un kolaborador renombrá di Internatioal Legal Defense Counsel a bisa djaweps. E organisashon aki ta asistí hende ku ta será den prizòn den eksterior. Estados Unidos a pidí Peru pa estraditá van der Sloot relashoná ku posibel chantahe di e mama di Natalee Holloway. Pero segun Griffith hustisia merikano no tin tempu pa investigá e tipo di kasonan aki. Hustisia merikano lo ke pèrsiguí Van der Sloot ora ku e ta na Merka pa asesinato di Natalee Holloway, ku a disparsé na 2005 na Aruba. Joran van der Sloot ta sinta un kastigu di prizòn di 28 aña na Peru pa asesinato di Stephany Flores na 2010. E proseso na Estados Unidos tokante chantahe ta planiá pa 2015. Si wes diktá ku Van der Sloot ta kulpabel e por haña un kastigu di 25 aña.

Obama pro matrimonio homoseksual
Presidente Obama ta haña ku homoseksualnan mester por kasa. E ta e promé presidente merikano ku ta ekspresá su mes pro matrimonio di hende di mesun sekso. Den un entrevista ku ABC News Obama a bisa ku mester trata homoseksualnan honesto. El a enfatisá ku ta e estadonan ta disidí si nan ta introdusí matrimonio homosekual. Na trinta di e sinkuenta estadonan matrimonio di hende di mesun sekso ta prohibí. E preshon riba Obama pa e duna su opinion tokante matrimonio homoseksual a bira mas grandi despues ku visé presidente Joe Biden a bisa djadumingu k'a pasa ku e ta pro esaki. Obama su kontrigante republikano Mitt Romney a duna di konose un biaha mas ku e ta kontra matrimonio di hende di mesun sekso. E espektativa ta ku e tópiko akí lo no bira un issue importante durante e próksimo kampania di elekshon presidenshal.

Ultimo transmishon di programa na hulandes di Wereldomroep
Wereldomroep ta transmití awe pa di último be programanan na hulandes. E emisora ta despedí di su oyente ku un programa di 24 ora non stop ku ta kuminsa awenochi 10or. Motibu pa stòp ku e transmishonnan ta e ekonomisashonnan pisá di gobièrnu hulandes. Di e 350 empleadónan 270 ta haña nan retiru. Wereldomroep ta bai dirihí su mes den futuro riba 'distribushon di palabra liber' na paisnan kaminda no tin prensa liber manera na Afrika i den mundu árabe.

Wèlga grandi na Gran Britania
Na Gran Britania algun shenmil hende ta wèlga kontra reformashon di penshun, redukshon di salario i otro medidanan di ekonomisashon. Na e wèlga di 24 ora ta partisipá trahadónan den sektor di kwido, duana i agentenan di polis. Den sentro di Londeres 20 mil polis a kana den un marcha di protesta kontra ekonomisashon di 20 porshento riba e budgèt pa polis. Un di e medidanan ku tin hopi trahadó rabiá ta hisamentu di e edat pa por baha ku penshun te 68 aña. Partido Konservativo ta pidí e trahadónan pa siguí traha un tiki mas a kambio di un penshun garantisá.

Formashon di gobièrnu na Gresia 
Despues di dos intento frakasá pa forma un gobièrnu nobo na Gresia, e demókrata soshal Venizelos ta bai purba formá un gobièrnu di koalishon. Su predesesornan, e konservativo Samaras i e iskierdista radikal Tsipras a entregá nan enkargo e siman akí bèk. Si e intento di èks minister di finansa Venizelos tambe frakasá lo bin probablemente elekshon nobo. E lider di sosialistanan griego tin tres dia di tempu. Entretantu desempleo na Gresia a kresé na un nivel rekòrt di 22 porshento. Kasi un mion griego no tin trabou awor. Na 2009 e kantidat di desempleo tabata menos ku mei mion. Bou di hóbennnan desemploe ta mas haltu. Di e grupo di 15 pa 24 aña mas ku mitar no tin trabou.

Restu di avion riba klep na Indonesia
Timnan di reskate a topa ku e oroplanu di krèsh ruso ku a disparsé ayera na Indonesia. For di un helikòpter forsa aereo indones a mira restunan di e avion na rant di un klep. E oroplanu nobo nobo a disparsé for di radar ayera durante un buelo di demonstrashon. Abordo tabatin 45 persona bou di kual komersiantenan indones, empleadonan di embahada ruso i periodista. Nan ta kere ku niun hende no a sobrebí e krèsh.

Spaña ta nashonalisá banko Bankia
Na Spaña ta bai nashonalisá e banko Bankia parsialmente. E banko ta den problema serio a konsekuensha di invershonnan den sektor di propiedat inmóvil, un merkado ku a bai hopi atras. A palabrá ku banko sentral di Spaña ta konvertí 4,5 mion di euro di fyansa den akshon. Di e manera akí gobièrnu ta haña un parti di 45 porshento den e banko i e ta e akshonista mas grandi. Bamnkia ta e di kuater banko mas grandi di Spaña. Mas o menos 10 mion spañó tin un keunta seka e banko. Gobièrnu di promé minister Rajoy, ku a sintá dezèmber aña pasa, a bisa ketu bai ku no ta reskatá ningun banko ku plaka di gobièrnu.

Dos atentadó na Siria
Den e parti ost di kapital di Siria Damascus dos eksploshon grandi a gosta bida di algun diespiku hende. Asina e kanal di televishon di Siria ta anunsiá. E eksploshonnan a tuma luga awemainta djis tras di otro. Na televishon por a mira imáhennan di un krater grandi, outonan destrosá i miembronan di kurpa. E eksploshonnan a tuma luga den bisendario di e base di e servisio di inteligensha sirio. Dos siman pasá nuebe persona a muri i 26 a keda heridá den un atentadó di suisidio na Damascus.

Abogado ta kontrola proseso na Sürnam
E abogado britániko Jeff Handmaker ta na Sürnam pa kontrolá si e proseso relashoná ku e asesinatonan di dezèmber 1982 ta honesto. E ta hasi esaki komo opservador independiente di e Komishon Internashonal di Hurista ICJ. Konsientemente a skohé pa no manda un hulandes Sürnam pa asina garantisá inparsialidat. Jeff Handmaker ta papia hulandes kemen ku e por siguí e proseso bon. Mayan, djabièrnè korte militar di Sürnam ta tuma un desishon tokante kontinuashon di e proseso di asesinatonan di dezèmber 1982.

Pronóstiko di tempu na Hulanda
E temperatura ta awe mas o menos 20 grado, pero áwaseru ta kai hopi si. Awetardi ta spera hopi áwaseru. Aki aya te asta lo tin mal wer, hagel i binetu ta supla duru. Mayan ta nubla pero solo ta sali tambe. Tin chèns riba un tiki áwaseru. Temperatura 17 grado.