E griegonan por bien lubidá préstamo

Por lo pronto Gresia no ta haña un di dos fiansa di emergensha di 130 miar di euro. Asina a disidí na Bruselas durante kumbre di ministernan di finansa di paisnan oropeo. Presidente Juncker di e grupo di minister a bisa ku a posponé e desishon pa entrega dje fiansa te otro siman. Segun Juncker no tur informashon nesesario tabata riba mesa ainda, pa por tuma un desishon riba e préstamo. Ayera mèrdia e partidonan di koalishon griego a presentá un pakete di medida. Pero no ta tur detaye ta konosí ainda. Loke si ta kla ta ku suèldo mínimo lo baha ku 22 porshentu i 15.000 amtenar lo pèrdè trabou.

Brantwer i polis ta wèlgando na Rio 
Na Rio de Janeiro polis i brantwer a buta trabou abou. E wèlga ta tuma luga djis promé ku karnaval kuminsá. Polis i bomberonan ta masha malkontentu ku nan salario. Ayeranochi lidernan di sindikato a rechasá e último proposishon di parlamentu di Rio de Janeiro. E parlamentarionan a spera ku nan lo por a para e akshonnan ku un proposishon di 39 porshento di oumentu di salario, djis promé ku karnaval kuminsá. Bosero di e sindikatonan ta bisa ku awor guardia nashonal i ehérsito mester sòru pa òrdu durante karnaval.
Aktualmente trupanan di ehérsito ta aktivo kaba na Salvador, na e parti nort ost di Brazil. Ei nan a arestá algun lider sindikal ayera, pa kibra e wèlga. Nuebe dia pasá polis dje suidat di miones di habitante, a buta trabou abou pa haña mas salario. Komo ku no tabatin polis mas riba kaya, e kantidat di asesinato a redoblá. E wèlga ta menasá di pasa pa mas suidat. 

Promé dama hefe di Petrobras Brazil
Petrobras, e kompania petrolero i di koriente brazilero i alabes esun mas grandi na Sur Amerika, ta haña un hefe femenino pa promé biá den su istoria. Riba proposishon di presidente Dilma Rousseff di Brazil, a nombra Maria das Graças komo presidente di Petrobras. E kompania ta representá un balor di 115 miar di euro. Den e añanan binidero e kompania mester bai eksplotá reservanan gigantesko di petroli di bon kalidat den oséano dilanti kosta di Brazil. Petrobras su ganashi a baha ku mas ku mitar te na 2.9 miar dòler, den e di kuater kuartal di aña pasá. Esaki debí na invershonnan haltu ku e kompania mester a hasi.

USA vs kriminalidat na Sentroamérika
Estados Unidos ta bai partisipá na un akshon grandi kontra kriminalidat dilanti di kosta di Sentroamérika. E operashon ta karga e nòmber Hamer. E ta dirihi prinsipalmente riba kontrabanda di droga i arma. E akshon ta kuminsá fin di febrüari i e ta pa tempu indefiní. Banda di Estados Unidos, 12 otro pais ta partisipá na e akshon, entre nan Hulanda. Estados Unidos a disidi di djòin pasó kasi 80 % di e kokaína, destiná pa merkado merikano ku ta drenta Merka via laman, ta prosedente di Sentroamérika. Esaki segun Douglas Fraser di e komando sùit di Merka.

Ekspulshon wes spañó Garzón pa 11 aña
Ta saka wes spañó di investigashon Garzòn 11 aña for di su funshon. Korte a konden'é paso el a tap kòmbersashon di abogadonan ilegalmente. Dos organisashon chikí ultra derechista a denunsiá Garzòn. Nan ta di opinion ku e wes a violá lei di apsolushon tempu ku e tabata investigá krímennan ku a tuma lugá tempu di Franco. A introdusí e lei despues di morto di Franco na 1975. Nunka promé no a investigá régimen di Franco.

Defensor di pueblo no ke defendé polako
Ombudsman Brenninckmeijer, defensor di pueblo hulandes, no ta mira motibu pa trata e keho di embahador di Polonia kontra PVV. E partido a habri un sentro di notifikashon riba su wèpsait, pa depositá keho riba molèster di personanan di Sentro- i Ost Oropa. Brenninckmeijer ta husga ku no ta lógiko ku embahada polako ta bin seka dje pa keha riba PVV. Defensor nashonal ta trata kasonan tokante kondukta di gobièrnu i no di partidonan polítiko. Embahada di Polonia ta haña e inisiativa di PVV pa un instansha di notifikashon, deskriminatorio.

CBS ke publiká sifra ekonomia tempran
Ofisína Sentral di Estadístika ta bai publiká e sífranan di kresementu di ekonomia mas trempan. Promé nan a bisa ku nan ta bai hasi esaki dia 20 di mart. Pero awor CPB ta menshoná 1 di mart. E sífranan di CPB ta e fuentenan mas importante pa gobièrnu stipulá su maneho finansiero. Na Den Haag nan ta tene kuenta ku gabinete ta bai ekonomisá miares di euro èkstra.

Strea Walk of Fame pa e último Beatle 
Paul McCartney ta e último Beatle ku ta haña su mes strea riba Walk of Fame na Hollywood. E strea ta pegá ku esun di e èks integrantenan di The Beatles, John Lennon, George Harrison i Ringo Starr. Paul McCartney ta risibí e strea pasó e ta sinkuenta aña aktivo den músika.

Kasi 500 morto na Oropa pa motibu di friu
E kantidat di morto a konsekuensha di wer di invierno severo na Oropa a subi te mas o menos 460. Wenter a dal aden pisá rònt Oropa. Hopi hende a bira víktima dje frialdat inmenso, prinsipalmente n'e parti ost di Oropa. Mas ku mitar di e mortonan a kai na Polonia i Ukraína.

Pronóstiko di tempu na Hulanda
Solo ta bria kasi tur kaminda pero ta masha friu sí. Awe mèrdia temperatura no ta mas ku 2 grado bou di sero. Den transkurso di djadumingu frialdat lo mengua basta na Hulanda i temperatura lo subi gradualmente.