Presidente de Graaf di Eerste Kamer, esta senado hulandes, ta studiando e petishon di PVV pa tene un reunion konhunto tokante e fondo di emergensha oropeo. Un reunion konhunto ta un reunion di Tweede Kamer, esta parlamentu i senado pareu bou di liderasko di presidente di Eerste Kamer. PVV ke pa pospone e aprobashon di parlamentu pa introdukshon di e fondo i e partido ke pa e reunion konhunto tuma un desishon. 11 miembro di PVV di Tweede Kamer i Eerste Kamer a firma e petishon.

Hopi alumno di VMBO a drùip
E kantidat di alumno di VMBO na Hulanda ku a drùip pa nan èksámen a redoblá kompara ku aña pasa. Na 2011 un promedio di 5 porshento di tur e alumnonan ku a hasi èksámen a drùip. E aña aki e porsentahe ta 10. Segun e fundashon Platforms VMBO e kondishonnan mas strikto pa e èksámennan ta kousa di e redoblashon di alumno ku no a pasa nan èksámen ku éksito. E aña aki tur almno mester haña un voldoende komo promedio di tur e materianan di e èksámen sentral. Prinsipalmente den e  sektor di preparashon riba un ofishi e klap ta duru. E sektor aki ta dirihi prinsipalmente riba práktika. Pa e alumnonan aki e èksámen sentral ta konta mas pisa pa e sifra final.

Fabrikante di outo Saab ta bai traha outo eléktriko
Saab ta sigui komo fábrika pa produkshon di outo eléktriko. Na Stockholm a anunsiá ku e kompania sueko National Electric Vehicles Sweden a bira e doño nobo di Saab. A funda e kompania akí speshalmente pa salba Saab. National Electric Vehicles Sweden ta propiedat di un kompania di elektrisidat chines i un kompania di invershon hapones. Saab ta keda produsi outo na Swesia, pero e ta bai konsentrá su mes prinsipalmente riba merkado chines. Kuratòrnan ta optimista ku lo por paga e debe di un miar i mei di euro bèk den e konstrukshon nobo.

Miembronan di kartel di droga detené
Durante invashonnan na e estadonan merikano Oklahoma i New Mexico a detené shete persona ku lo tabata involví den labamentu di plaka di droga mehikano. E invashonnan a tuma luga na un pista pa kareda di kabai i na un rancho di kabai. Segun outoridatnan merikano, pa añanan largu miembronan di e kartel di droga a laba miones di dòler di plaka di droga kumprando i train kabai. Nan tabata kumpra e kabainan ku nòmber falsu i tabata paga e kabainan kèsh. Segun hustisia merikano e invashon i detenshonnan ta un paso importante den e lucha kontra droga i tambe un sla finansiero duru pa e kartel di droga mehikano.

Relashon ku fushonario haltu di gobièrnu a buta periodista retira
Un periodista di Wall Street Journal a tuma su retiru despues ku a sali na kla ku e tin un relashon ku un konsehero haltu di gobièrnu merikano. Tur dos tabata traha na 2008 na Irak ora ku nan a haña un relashon ku otro. E konsehero Brett McGurk tabata den e tim di negosashon merikano. E pareha a kasa entre tantu. E relashon a bin den publisidat awor ku presidente Obama a postulá McGurk komo embahador na Irak. Wall Street Journal ta bisa ku e periodista Chon a kibra e kódiko di kondukta di e korant dor di laga su frei lesa tin biaha artíkulonan no publiká. No ta konosi si McGurk a pasa informashon pa Chon tambe.

NiNSee ta sera definitivamente
E instituto tokante esklabitut NiNSee na Amsterdam ta sera su porta definitivamente dia 1 di ougustus. E instituto no ta haña supsidio mas di ministerio di Enseñansa, Kultura i Siensia. NiNSee tabata dependé pa 90 porshentu di e supsidio di gobièrnu. Intentonan pa evitá siere ku tabata menasá ya pa algun tempu, a resulta inbano. Ku e sèn ku e instituto ta haña di gobièrnu munisipal di Amsterdam nan ta purba kuminsa di nobo ku muchu menos aktividat. E konmemorashon anual di abolishon di ekslabitut dia 1 di yüli i e festival Keti Koti ta aktividatnan ku nan ta keda organisá.

Matamentu di bestia sin anestesia ta keda prohibi
Senado hulandes, esta Eerste Kamer ta keda kontra matamentu di bestia sin huza anestesia. Esaki ta sosode hopi entre otro bou di musulman. Un mayoria lo vota kontra e proposishon di lei adaptá di Partij voor de Dieren. Mayoria senador ta prefera e akuerdo ku sekretario di estado Bleker a firma siman pasa ku organisashonnan religioso. Den e akuerdo aki tin stipulá ku por mata bestia sin huza anestesia bou di kondishonnan strikto. E proposishon di Partij voor de Dieren a haña un aña i mei pasa si un mayoria.

Ekspanshon di mishon di OTAN na Somalia
Parlamentu hulandes a bai diakuerdo ku ekspanshon di e mishon di OTAN pa kombatí pirateria na Somalia. Ta bai bin èkstra marinir, dos helikòpter i un avion sin tripulashon. E ekspanshon ta kosta mas ku 13 mion di euro. Minister Hillen di Defensa a bisa den Tweede Kamer ku e ta kontra pa laga kompanianan di vigilansha sivil traha riba barku. Kompanianan di seguro i doñonan di barku a pidi pèrmit pa hasi esaki. Nan ta haña ku tin muchu tiki marinir pa proteha e barkunan.

Beatris di bishitá na Turkia
Reina Beatris a yega Turkia pa un bishita di tres dia. E bishita ta tuma luga den kuadro di 400 aña di relashonnan diplomátiko entre Hulanda I Turkia. Awenochi presidente Gül ta risibi lareina na Ankara. Mayan Beatris ta bula pa Instanbul kaminda e ta papia entre otro ku studiante i sientífikonan turko. Djabièrnè e ta bolbe Hulanda bèk.

Guera sivil na Siria
Hefe di opservadornan di Nashonnan Uní ta bisa ku den transkurso di 15 luna e konflíkto na Siria a bira un guera sivil. Ta di promé be ku un funshonario haltu di Nashonnan Uní ta bisa esaki públikamente. Ayera a tira riba e opservadornan di Nashonnan Uní na e suidat Haffa i tambe a dalnan ku piedra i pipa di metal. Na Siria tin 300 opservador no armá ta trahando.

Deporte:
Na plasa di libertat na e suidat Charkov na Ukraina e fiesta di fanátikonan di Oraño a kuminsa. E klùp di fanátiko ta spera mas o menos 15 mil persona na e fiesta. Ta deleitá e fanátikonan ku muzik. Awetardi tin un aktuashon speshal di DJ Armin van Buuren. Awenochi promé ku e wega entre Hulanda i Alemania kuminsa, e fanátikonan ta kana bai stadion Metalist kaminda e wega ta tuma luga.

E pronóstiko di tempu na Hulanda: Tin nubia pero tambe un tiki solo. Na Limburg áwaseru por kai un tiki. E temperatura ta mas o menos 16 grado. Mayan tin mas solo i ta seku. Temperatura: entre 16 i 21 grado.