WILLEMSTAD – Curaçao Soccer Academy djadumingu 5 di febrüari a start ofishalmente. Ku e ‘skol’ aki pa futbolista kurasoleño hóben ta krea posibilidat pa desaroya nan talento mas mihó posibel.

E akademia ta un proyekto pa despues di skol: ta buska e partisipantenan selektá kuater bé pa siman ora skol kaba i hiba nan e sentro di training di FFK

Curaçao Soccer Academy no ta un asosiashon di futbòl: e futbolistanan ta keda seka nan mes klup, ta train einan un be pa siman i ta partisipá ku nan tim den kompetishon hubenil. E akademia regularmente lo hunga wega di train si, lokal i den strañero.

Maneho di e proyekto ta den man di Hans van Elden. Segun e organisashon Van Elden ku su eksperiensha komo futbolista, trainer i dosente di KNVB tin eksáktamente e kompetenshanan ku lo hasi e proyekto aki un éksito.

Curaçao Soccer Academy ta un inisiativa di Fundashon Bon Intenshon di Gregory Elias ku ta fasilitá e proyekto finansieramente. Aktualmente tin un inisiativa tambe di Feyenoord, huntu ku Curaçao Soccer School di Ronald Añes, pa duna futbolista hoben e chèns pa sigui desaroyá na Kòrsou.