ORANJESTAD – Sentenar di hende di tur gremio di pueblo di Sint Eustatius djamars pasá a duna último honor na defuntu vise presidente di Krus Kòrá, Angela Descartes-Schmidt.

Descartes a fayesé dia 11 di yüni na Guadeloupe, un luna despues ku el a operá. Su morto no ta sin kontroversia. E ta e dos persona di Sint Eustatius ku den poko tempu ta fayesé na hòspital di Guadeloupe despues ku a referié pa tratamentu.

Na un talkshow di televishon lokal miembro di Konseho Insular Franklin Brown (STEP) a hasi un apelashon pa tene un outopsia riba e kurpa sin bida di Descartes. E polítiko lo pidi Konseho Insular esaki tambe. Brown ta bisa ku mester tene un hende responsabel pa e mortonan misterioso di hende ku ta bai Guadeloupe pa trato médiko.

Descartes (40) tabata e forsa tras di un Krus Kòrá renobá na Sint Eustatius ku te dia ku el a bini for di Sint Lucia tabata manera na soño. Na su entiero tabatin diferente delegashon di Krus Kòrá presente: di Hulanda, Surnam, Sint Maarten, Kòrsou, Aruba, Boneiru i Saba.

Descartes-Schmidt, doño di Angela Cleaning Services, tabata aktivo den hopi organisashon, entre nan SDA Womens’s Ministry, e organisashonnan di ayudo kristian Dorcas i Sint Eustatius Aids Committee.