WILLEMSTAD – Ayera polis a arestá kuater sospechoso den e kaso di asesinato di un pareha chines siman pasá djaluna.

Mitar di sinku di atardi polis a gara un hóben di 16 aña na altura di Kaya Garapa den e baro Juan Hato. E hóben a trata di skonde den un roi pero polis a hañ’é tòg. Mas lat polis a aresta un hòmber di 27 aña tambe den un kas na Kaya Renbak den e bario De Savaan.

Anteriormente riba mes dia polis a arestá dos hoben di edat di 16 i 19 aña riba Pater Eeuwensweg na Otrobanda. Polis a señalá nan den un outo huntu ku dos hòmber adulto i arestá nan.

Ta sospecha e arestadonan di a atraká i mata e pareha chines Chaowen Feng (49) i Yanyin Feng-Liu (46) sanger friu dilanti nan snèk na Moontjeweg den e bario De Savaan. Nan yu di sinku aña a hui na tempu i a skapa.

E asesinatonan a kousa un ola di horifikashon den komunidat kurasoleño i chines. Komunidat chines na Kòrsou asta a primintí un rekompensa di 10 mil florin pa e tep ku por trese arestamentu di e malhechornan.