WILLEMSTAD –Ta investigando i reorganisando Servisio di Siguridat Kòrsou (VDC) pa hasié bira mas efektivo. Nunka mas no mester ta asina ku ta usa e servisio akí pa finnan polítiko.

Asina minister presidente Gerrit Schotte a bisa djaweps 27 di òktober. E premier ta lamentá ku, pa nan por a trese screening di e ministernan bèk den diskushon, ‘atversarionan polítiko’ a asta publiká un memorandum ku e servisio a pone un banda den privá debí ku no por a proba e alegashonnan ku e ta kontené.

Hefe di Reshèrshi di Duana, Frank Calmero, lo tuma VDC na su enkargo komo ‘crisismanager’. Ta formando na mes momento lasonan ku otro servisionan di siguridat den reino i den region. E servisionan homólogo akí ta yuda VDC bira mas skèrpi.

“Den e kontaktonan ku e otro instansianan akí a bini padilanti ku no por ta asina ku ta na inisio di su karera, binti aña pasá, so ta evaluá integridat di un miembro di VDC: esei tin ku sosodé ku mas regularidat.”