Fundashon ZWOCAN, o sea e órgano di konsulta di hulandes karibense na Zwolle lo lansa nan wèpsait renobá djárason, 9 di febrüari pa ofresé mas i mió servisio na habitantenan di e islanan karibense ku ta biba na Zwolle. ZWOCAN ke uza 'Social Media' tambe pa komuniká direktamente i efisientemente ku antiano i arubanonan bibá na Zwolle i pa sali mió na nan interes, segun Juliana van Thijs, presidente di e ZWOCAN.

Presidente di fundashon ZWOCAN

Potrèt: Ronald A. Muyden

Van Thijs ta konsiderá ku awendia nos ta biba den un époka digital i ku ta bon pa adaptá na e sistema modèrnu. E manera mas lihé i efektivo pa drenta den kontakto ku miembronan di komunidat hulandes karibense ta hasiendo uzo di media sosial.

Media Sosial ta hòt
Den pasado tabata difísil pa tin kontakto direkto ku komunidat. Awor ku tur hende ta move den media sosial, manera Twitter, Facebook, Hyves, Myspace i hopi otro mas a bira muchu mas fásil. Tin por lo ménos 1100 habitante hulandes-karibense na Zwolle, pero grandinan no ta move masalmente den sosial media manera hubentut, pero por alkansá nan mediante nan yu i nietunan.

Ademas 'kon ku bai bin, si nos ke poder polítiko, si nos ke pa nos aktividatnan tuma lugá, pa nos influenshá maneho di gemeente, bo ta haña mas reakshon hasiendo uzo di media sosial.  Bo ta sa kiko hende ta pensa, kiko nan ke i ki ta biba bou di e komunidat i ademas por envolvé i mobilisá habitantenan di nos komunidat i forma un grupo grandi.'

Públiko presente durante e lansamentu dje wèbsait nobo di ZWOCAN

Potrèt: Ronald A. Muyden

Yuda ku integrashon
E problemanan mas agudo na Zwolle ta di índole sosial i finansiero, tin tambe problema ku soledat, ku edukashon di mucha, ku adaptashon i integrashon den komunidat hulandes. Hulanda su norma i kustumbernan ta difísil di komprondé pa antianonan resien yegá. Juliana van Thijs di ZWOCAN ta konvensí ku mester yuda e hendenan aki, pa sali na nan interes, pa asina nan adaptá i integrá lihé.

Wèpsait renobá
ZWOCAN a disidí di renobá su wèpsait. A opta pa uza idioma hulandes, pasó 'pa di promé nos ta biba na Hulanda, anto nos ke tene e kontakto ku komunidat hulandes tambe'. Van Thijs no ta maint agregá idioma papiamentu i adaptá e wèpsait despues, a ménos ku tin sufisiente interes i disposishon pa esaki.

Entrante mañan por alkansá e wèpsait renobá di ZWOCAN