Konseho Munisipal di Zwolle no ta kontentu ku e maneho aktual di Antiano i Arubano na Zwolle. E Konseho a pidi kolegio di Burgemeester i Wethouder pa inisiá un investigashon di efektividat di proyektonan dirigí riba hóbennan di riesgo. ZWOCAN, e organisashon di konseho pa Antiano i Arubano di Zwolle tambe ta partisipá na e investigashon. Juliana van Thijs, presidente di ZWOCAN ta kere ku mió tuma medida for di e orígen, kuminsando ku e mamanan, pa kondusí hubentut riba e bon kaminda.

Oumento di kriminalidat
Konseho munisipal di Zwolle no ta satisfecho ku e maneho i ta kuestioná efektividat di proyektonan manera: 'On track again' (OTA), kaminda 'streetcornerworkers' ta purba kita hóbennan problemátiko for di kaya i 'Een spiegel liegt niet', un proyekto pa stimulá hóbennan ku ta falta skol pa sigui ku nan formashon, pa mañan Dios ke nan tin un porvenir. 
E opinion general di efektividat di e proyektonan aki ta dividí, ya ku kétubai kriminalidat ta oumentando den seno di hóbennan antiano i arubano.

Cityhoppers
Kasonan di violensia, abusu di mucha muhé i di adikshon ta kresiendo na Zwolle. Ta bin aserka e fenómeno di 'Cityhoppers'. Ta trata di mas o ménos 200 hóben ku ta sirkulá na Hulanda. Ora ku situashon bira pèrèpèmpèm despues ku nan a kometé kualke fechoria anto polis ta nan tras, nan ta move bai otro siudat. Konseho munisipal ta husga ku mester aktua ku man duru kontra tur forma di molèster i di kriminalidat.

Di otro banda ta resultá ku e dos proyektonan dirigí riba hóbennan di riesgo ta surtiendo efekto sí. Ta pa e motibu akí e kolegio di Burgemeester en Wethouders ke sigui ku nan e aña akí. 

ZWOCAN
Juliana van Thijs ta presidente di ZWOCAN, e organisashon di konseho di Antiano i Arubano na Zwolle ku tambe ta tuma parti na e investigashon. Van Thijs ta haña ku mester analisá e problema di kriminalidat efektivamente promé ku stipulá un maneho. Ta resultá ku no tin sifra di e hendenan ku a kaba nan trayekto ku resultado positivo. Tin hóben ku mester di mas tempu pa rekapasitá. Si nan no ta fuerte nan ta inkurí den visio.

ZWOCAN ta kere ku mester hinka tempu, energia i plaka den e fuente di orígen, pues kuminsando ku e mamanan. Mester obligá mamanan pa siguí kurso di edukashon, i si nan no ke koperá, ta baha pago di ònderstant. Esaki ta un di e maneranan pa kombatí e problemanan aktual. E ta kere ku kon ku bai bin ta pèrdèment'i tempu si invertí sèn den 'hóbennan di riesgo'.
 

Van Thijs: "E palu a krese kaba, ta difísil pa règt e bèk. A duna nan diferente chèns pero si un hende no ke aseptá yudansa, bo no por hasi masha kos."