E aña akí Zomerkarnaval ta eksistí eksaktamente 25 aña. Den un transmishon spesial di Wereldomroep por skucha fundadónan antiano, representantenan di gruponan di karnaval i Rèina di Zomerkarnaval 2009 den kòmbersashon ku Desirée Martis.

Den un ambiente ameno riba asotea di Café Engels, ku un bista presioso riba skailain di Rotterdam, a rekordá pasado, o sea kon kos a kuminsá na añanan '80. Despues a elaborá riba e situashon aktual i rib'e Gran Marcha, ku lo tuma lugá djasabra, 25 di yüli den sentro di e siudat. Finalmente e invitadonan a trese nan ekspektatiba personal dilanti i un bista riba futuro.

Willy Djaoen, un di e organisadónan di primera ora, ta konta ku originalmente Zomerkarnaval a kuminsá na Utrecht. A organis'é dos bia pero despues el a muda bai Rotterdam, kaminda el a keda te dia djawe. Willy a kumpli entretantu 62 aña i ainda e ta balia den grupo 'Stims and Friends'. Despues di tur e añanan ei p'e ta 'simplemente dushi kétubai' pa kana den e marcha. E otro fundadó, Marlon Brown (71) tambe lo tei atrobe den e desfile karnavalesko.

Konkista di Oropa
Karel Willems di Antia ta presidente di Stichting Zomercarnaval Nederland. E ta splika ku den kurso di aña e evento a para bira dje grandi ei, ku no por a stèns mas riba boluntário so. "Alolargu mester a enkargá profeshonalnan ku instalashon di tarima i di zonido pa grupo." Asina ta ku a drenta ku DUCOS, un empresa ku ta yuda organisá Zomerkarnaval basta aña kaba. Willems tin intenshon di kolaborá ku karnaval britániko di Notting Hill. "Nos lo konkistá Oropa!"

Sushma Bhatti, ku a bira Rèina di Zomerkarnaval 2009 lo habri Gran Marcha na Rotterdam. "Mi kurpa ta kue rel ora mi balia den grupo. Tur e hendenan ku ta para animábo, e ta dunábo asina tantu energia, no!" E biá akí porsierto no por papia di un 'trahe'. Su úniko 'bistí' ta un sonrisa grandi i masha hopi pluma na su kurpa, estilo afrikanu. Di e forma akí por mir'é swing baibin riba su karosa.

No ta Antiano so ta den e wega: Kapverdianonan tambe tabata embolbí for di un prinsipio den e fiesta di Rotterdam. Manuela Estevao di grupo kapverdiano 'Cabo Verde Chegou' ta bisa ku no ta fásil reuní e trinta personanan rekerí. "Ta selebrá karnaval na e pais di orígen. Ta te na yüni ta realisá ku Zomerkarnaval di Rotterdam ta den kurpa."

Gastu
E gastu enorme di partisipashon i di trahe ta un opstákulo pa e gruponan. Esaki ta konta tambe pa Ivan Chirinos, baké den asuntunan di karnaval. E tabata dirigente di grupo 'Freedom Birds', ku a gana hopi premio. E tin basta aña den hurado. E ta haña ta lástima sí ku e no tin su mes grupo mas pa motibunan finansiero. "Hopi trabou pa haña spònser i tur aña mi ke pa mi grupo lusi, loke ta kosta basta sèn."

Partisipashon di parlamentario Chantal Gill'ard ta demostrá ku polítika i karnaval ta bai bon ku otro. Gill'ard ta di orígen antiano i e aña akí e ta partisipá pa promé biá na Zomerkarnaval. "Mi mensahe ta ku Zomerkarnaval ta ehèmpel bibu di un Hulanda nobo, e bunitesa di antaño kombiná ku influenshanan nobo."

Interes ekonómiko
Jantine Kriens, alkalde suplente di Rotterdam i miembro di partido PvdA ta mustra riba interes ekonómiko di e evento pa Rotterdam. "Mas aún den tempu di krísis ta mashá importante ku tur e hotèlnan ei ta di buk." E no tin pensá di djòin e marcha pa kana balia. Sí e ta aseptá invitashon di Willy Djaoen gustosamente pa siñ'é balia.

Akompaño musikal di e enkuentro na Café Engels na Rotterdam tabata na enkargo di 'Brass Eternity Music', un brassband antiano. Aña pasá e banda a bira ganadó di 'Battle of Drums', un konkurso musikal pa brassband. Rannick Sluis, dirigente i integrante di e banda ke defendé su título sigur sigur den e próksimo 'bataya di tambú' ku ta tuma lugá djabièrnè, 24 di yüli na Rotterdam pa e título di ganadó di 2009.