E Zomercarnaval di Rotterdam ta mustra ku no tin un kontradikshon den integrashon i identidat. Asina Hans Simons ta bisa. E tábata diputado na Rotterdam tempu e karnaval a kuminsá.

For di kuminsamentu e fiesta aki a entusiasm'é, pasobra un tim di voluntario aktivo a okupá nan mes dia i nochi ku e evento. Simons: "E idea ku riba un dia ku hopi solo lo por a atrahé miles di hende den sentro di Rotterdam, no tabata kuadra mashá ku kultura hulandes." Ma e ekshibishon lo por tábata interesante komersialmente, asina e idea tábata.
 

Bòmbòshi
E promé añanan tòg kos a bai menos bon ku a spera, e eks diputado ta atmití. "Si, e situashon tábata bruá. Tabatín bòmbòshi rònt di finansanan. Si e asuntu aki no a drecha, tur kos lo a para." Despues di un bon kombersashon ku e organisashon tur kos a drecha bèk.
 

A sana e asuntu i e direktiva a traha masha duru. Simons ta komenta riba e mortonan ku a kai den kuminsamentu: "Despues di e insidente horibel ei e evento a bira un inisiativa ekselente!"
 

Kontradikshon falsu
Segun Simons e karnaval ta prueba ku integrashon i mantenshon di identidat propio ta bai huntu masha bon. "Semper m'a haña ku e kontradikshon ta falsu", asina Simons ta bisa. Ounke ku awendia no ta politikamente korekto pa bisa esaki, ma segun Simons mester trata di haña un balans entre di un banda integrashon, esta papia bon hulandes i partisipá, i di otro banda espasio pa ekperiensha bo 'roots'. "No tin nada malu ku e idea ei!"
 

E Zomercarnaval ta kompletamente integrá den komunidat di Rotterdam. Di origen e ta un fiesta antiano, pero laga pasa si bestür munisipal disidí di para e fiesta, nan lo haña henter komunidat di Rotterdam kontra nan, Simons ta pensa.

E mes basta tempu no ta biba na Rotterdam mas, sino na Renesse na Zeeland, tres kuart'i ora for di Rotterdam. E eks diputado no tábatin e intenshon di bini karnaval e aña aki. Ma na kabamentu di e entrevista e ta kambia di idea... "Mi ta kere ku lo mi pasa..."

Fotos: © Fred Vloo