Hulanda lo manda personal mesora pa duna asistensia na prizòn Bon Futuro na Kòrsou. Ta trata di mas o ménos trinta empleado, asina sekretarionan di estado Bijleveld i Albayrak a partisipá. Próksimo tres aña e personal ulandes lo mehorá seguridat di kolaborador i detenidonan pa e instituto penitensiario kumpli ku normanan internashonal.

Sekretario di estado Bijleveld ta aportá ku un enfoke integral di e problemátika pa yega na un solushon definitivo. "Nos ta manda personal pa sekshon di maneho i pa vigilansha di e instituto. Ta vinkulá wardadónan antiano ku koleganan ulandes via di e asina yamá koperashon-twinning. E kontribushon akí lo dura no mas ku tres aña."

Basora nobo ta bari limpi
Parlamentario Ineke van Gent di partido GroenLinks ta mashá kontentu ku e akshon direkto akí, ya ku e tin basta ten ta urgi pa Hulanda yuda Bon Futuro. "Mi mes a pasa ayá na yanüari: seguridat ta enormemente den diskushon", asina Ineke van Gent a bisa. "Mester duna e lugá un bon barí na mod'i papia, mester di un limpiesa profundo pa drecha e situashon. E kos akí ta tumando lugá den seno di Rèino. No por t'asina ku derechi di hende ta bou di preshon i ku seguridat, tantu den komo pafó di prizòn ta den diskushon."

Na mes momento mester hasi mas ku bari ku basora nobo so na mod'i papia antó. Van Gent ta haña ku e edifisio di Bon Futuro mester di un renovashon. E ke pa introdusí un programa spesial pa duna e prezunan un pasatempu diario. "Nan ta hèng arount henter dia. Algun di nan ta mucha ainda kasi, ku a pone huntu ku otro detenidonan. Mester atendé ku e kos akí, mi ta sali for di e punto di bista ku esei lo sosodé tambe."