Mitar sunú, hambrá, ta lora abou na suela di doló den un un prizòn ekuatoriano. Asina un paisano kurasoleño a bin haña Elio Melfor di sinkuenta aña di edat, ora el a bai bishitá su mes kasá den e mésun prizòn. Kos ta pinta mahos pa e hòmber malu di sinkuenta aña, ma no tin niun outoridat òf instansha kurasoleño òf hulandes ku ta hasi algu p’e.

Seis luna pasá a gara Melfor pa trafikashon di droga. For di e tempu ei e ta warda su sentensia bou di ‘sirkunstanshanan deplorabel’, asina e bishitante por a konstatá. Su famia na Bandabou no por paga un abogado, i asina no tin niun instansha ta buska Melfor su drechi i segun e dama ku a hañ’é ‘sin kuido adekuá e ta kore riesgo di muri den prizòn’.

No tin areglo kurasoleño
Ora puntra seka Servisio di Reclasering di Kòrsou i Representashon hulandes ta bin haña sa lihé ku Kòrsou mes no tin areglo pa duna asistensia na Yu di Kòrsou sospechado òf kastigá ku ta den prizon den eksterior. “Pa e tipo di problemanan aki Yu di Kòrsou por akudí na embahada di Reino hulandes den e pais mes”, tur dos instansha ta deklará, “i e embahada por tuma medidanan posibel i tuma kontakto ku famia. Na Kòrsou no tin un instansha ku ta okupá su mes ku prizonero kurasoleño den eksterior. Esaki ta un asuntu di Reino.”

Prome minister Schotte, ku alabes ta responsabel tambe pa asuntunan eksterior, ta bisa ku ‘e no ta na altura di e kaso di Melfor’ i ta primintí ku ‘Servisio di Asuntunan Eksterior lo bai trata e asuntu’.

For di 2 di febrüari no tin embahada di Reino hulandes mas na Ecuador. Gabinete Rutte a kit’é pa motibu di ekonomisashon. Ta embahada hulandes na Lima – Peru awó ta trata tur asuntu di hulandes den eksterior. “Nos a tende di e kaso di Melfor ma nos no por hasi nada konkreto ainda”, un trahadó di Embahada hulandes na Lima ta splika. “Nos ta wardando nombramentu di un kònsel honorario hulandes na Ecuador. Nos ta hasi nos bèst for djaki ma ta for di dos dia numa nos tin Ecuador bou di nos responsabilidat.”

Tratado di ekstradishon
Segun sifranan di Embahada hulandes na Peru tin un total di 20 hulandes, entre nan hopi Yu di Kòrsou, será den prizòn di Ecuador. Ekstradishon pa Hulanda òf Kòrsou ta posibel pasobra tin un tratado di ekstradishon pero un prizonero mester hasi un petishon p’esaki. Un di e kondishonnan ta ku a sentensiá kaba. Pa Melfor no ta masha sigur si e ta kapas di kuida su mes interes i por lo pronto no tin bista riba un proseso.