Wouter Bos lo no enkabesá lista di PvdA mas pa elekshon parlamentario di 9 di yüni próksimo. Bos ta retirá kompletamente di polítika pasó e ke dediká mas tempu na su fania. Job Cohen, ku aktualmente ta alkalde di Amsterdam, probablemente ta bira su susesor.

Durante un konferensha di prensa na Den Haag Bos a bin ku e notisia. E líder di PvdA a bisa ku 'otro responsabilidat' i 'en partikular esun di tata di famia' ta na rais di su desishon. 'Mi ta konsiderá ku tabata un honor di por a sirbi e kousa públiko, pero un funshon asina ta relashoná su mes malu ku mi responsabilidatnan komo tata. Pues lo mi no ta kandidato pa parlamento hulandes.'

'Delaster añanan mi a kumpli ku tur konvikshon ku e funshon ku mi tabatin. Tabata un período úniko yen di desafio, pa mi tabata un honor ku mi por a guia nos pais den e krísis mas agudo di delaster añanan. Mi a tuma e desishon promé ku elekshon pa konseho munisipal, pero e ten ei mi no a pèrmití mi mes di bai duda públikamente si mi ta sigui sí òf nò.'

'Hulanda tin mester di union awor, e mester di un líder ku ta uni partidonan i ku no ta laga nos pais desintegrá den unu ku hende ku ta sali ganá i otro ku ta sali pèrdí. Nos no mester laga hende para un kantu.'

Notisiero Nieuwslijn di Wereldomroep - skucha Wouter Bos splika su retiru den un rueda di prensa

Bos a bisa ku for di aña 2007 el a konsiderá di retirá su mes i ku for di e tempu ei el a kombèrsá ku Job Cohen tokante su suseshon. Cohen lo postulá su mes komo kandidato i lo tene un konferensha di prensa awe tardi tokante e asuntu. 

 Algun reakshon riba kaya relashoná ku desishon di Wouter Bos pa baha komo kabesante di lista di PvdA