Wiels ta kita Jansen komo minister i pone Trinidad

Dinámiko

Segun lider di PS Helmin Wiels, Carlos Trinidad ‘for di òktober último ta kore stazje’ seka Carlos Monk. “Nos a prepará e kambionan aki bon. Awó Trinidad por dal bai mes ora. Meskos ku Monk e ta sali for di sektor privá i e tin hopi energia i dinamismo.”

Riba dos website internashonal pa vakatura un ‘instaladó di panel ku eksperiensha’ kolombiano ta ofresé su servisionan. Komo referensha e ta menta algun doño di trabou ku e tabatin resientemente, entre nan Carlos Trinidad, direktor di ‘Roofcenter’. Trinidad ta kontratista den sektor di konstrukshon.

Kayus i Kayus
Segun Wiels Monk tambe a ‘kore stazje for di òktober’ seka Jansen. “Mi a dun’é e proyektonan ‘Enseñansa gratis’ i ‘Sedreko’. Awor lo e sigui sirbi su pais komo minister di Enseñansa, Kultura, Deporte i Siensia. Pa PS tur dos ta minister di fishi. Mi no ta yama nan ‘Carlos i Carlos’, sino na e nòmber di kariño krioyo pa un hende ku yama Carlos: ‘Kayus i Kayus’.”

Pa di kuater be den apenas un aña i mei Pueblo Soberano ta manda un di su propio ministernan kas. Lionel Jansen mester bai pasobra loke el a presta no ta na agrado di lider di partido Helmin Wiels.

Siman pasa kaba minister di PS Carlos Monk ketu ketu a haña ‘Deporte’, i ku esaki Jansen su kartera di Enseñansa, Kultura, Deporte i Siensia (OCSW) a bira ‘OCW’ i Monk a haña BPD&S: Planifikakashon di gobièrnu, Servisio i Deporte. Monk su promé akshon komo minister di deporte tabata di haña 5000 florin via Sedreko pa asina landadó Perry Lindo por a bai Cuba pa kompetishon pa kalifikashon olímpiko.

Carlos i Carlos
Carlos Monk su susesor na e ministerio, ku atrobe yama BPD, ta Carlos Trinidad. Mundu di sindikato a reakshoná desapuntá riba Monk su despedida na BPD. E lo a manehá ‘prosesonan progresivamente i segun regla’.

Presidente Lisette van Lamoen-Garmers di Rooms-Katholiek Centraal Schoolbestuurt a spera ku e kambio na OCSW ‘lo no trese retraso pa proyektonan’ den enseñansa.

Kada dies siman
Te awo PS ta trese un minister nobo dilanti ku un promedio di kada dies siman. Trinidad ta number shete den 74 siman. Number ocho lo sigui banda di promé di yuni?

Minister di Hustisia Elmer Wilsoe ta e úniko ku a keda for di prinsipio. Monk ta kambia, pero e ta keda si. Anteriormente Norman Girigorie (BPD), René Rosalia (OCSW), Leocadia ‘Lia’ Willems-Martina (BPD) a bai, i awó Lionel Jansen (OCS).

Asiento
Kontrali na e otro ministernan ku a kita, Jansen, segun rumornan a ‘keda bon ku partido’. Echo ta ku si Jansen kibra ku su partido, e por bai ku un asiento den Staten: e tabata number dos riba lista di PS den último elekshonnan.

Segun esnan ku na altura, Jansen tin ambishon pa un puesto den e taskforce ku mester kambia Sedreko den Instituto Nashonal di Deporte di Kòrsou.

Bookmark/Search this post with: