E aña akí un komishon di inspekshon a evaluá e aktividatnan periodístiko dje emisora internashonal Wereldomroep. Un dje konklushonnan ta ku mester oumentá e kontenido riba énternèt pa Sürnam, Antia i Aruba. Konsekuensha di esaki ta ku lo mester kòrta e transmishonnan radial diario ku 30 minüt.
 
Korant i revista ta saka edishon digital ku mas frekuensha i mas i mas por sintonisá radio i televishon riba énternèt. Wereldomroep ke bai ku tempu i pa e motibu akí ke dediká mas i mas atenshon na media nobo.

Jan Hoek ta direktor di Radio Nederland Wereldomroep i e ta mashá satisfecho ku e estilo di traha. Hoek ta enfoká riba e fenómeno mashá  konosí awendia den mundu periodístiko yamá 'crossmedialiteit'. Loke ta nifiká ku ta usa diferente tipo di media pa por transmití un mensahe mas efektivo posibel. "Mi tin e sensashon ku nos ta trahando bon, pero nos mester sigui hasi nos bèst riba algun punto manera uso di diferente media (crossmedialiteit red.). Ta dushi pa ripará ku nos ta riba e bon kaminda, pasobra opviamente nos ta hañando sosten awor."
 
Wereldomroep tei pa keda
E rapòrt di inspekshon no tin nada di aber ku e derecho di eksistensha di Wereldomroep. E emisora internashonal ta keda i e tin un tarea klaramente definí pa informá Hulandesnan den eksterior mas mihó posibel i duna un imáhen realístiko di Hulanda. Pero bo mester keda sigui tur desaroyo nobo, segun Hoek. "Ku introdukshon di twitter i blog por ehèmpel, bo mester keda na altura di loke ta pasa i sòru pa bo kambia bo estilo segun tempu bai, sino bo no ta aktuando bon."
 
Modernisá
Wereldomroep ta bai ku tempu i ta modernisando. "Nos por bai asta un paso mas leu. Na Sürnam nos mester empeñá mas ku énternèt i den kaso di Antia mester traha mas na Papiamentu i ménos na Hulandes", asina Hoek ta bisa.
 
Wereldomroep ta dal den un problema en konekshon ku énternèt. Na Sürnam i Antia ta usa énternèt ménos biá i e ta basta karu tambe. Tòg mester traha riba modernisashon, pasobra desaroyo ta sigui. "Nos mester antisipá riba e desaroyonan den Karibe. Nos no mester warda te ora e tempu yega, pero mester traha pa kontra esaki", segun Hoek.