Kaos total den tráfiko na Hulanda pa motibu di wer di wenter. E pais ta práktikamente den gara di sneu i eis. Na hopi siudat kasi no tin bùs ta kore. Entre otro na i alrededor di Utrecht, Schiphol, Den Haag, Leiden, De Veluwe i di provinsha Brabant bùs no a sali ainda for di garashi. Na e sitionan kaminda sí tin bùs ta kore, esaki no ta sosodiendo di akuèrdo ku orario ofisial di e kompanianan di transporte públiko.

Loke ta pasa ta ku kaya por ta limpi di sneu, pero no parada ni stashònnan di bùs. E empresanan di transporte públiko ta konsiderá ku hende por slep dal abou òf para muchu den friu, wardando riba bùs i trèm òf pusha pa drenta i haña alivio ku e kayente di kalefakshon paden. Nan no ke peliger ni aksidente di pasahero riba nan konsenshi.

Tráfiko di outo tambe ta enfrentando problema riba kaminda. Awemainta a surgi un fila di un largura di por lo ménos 250 kilometer, loke ta algu deskomunal pa temporada di vakansi. E problemanan ta debí sobretodo na e pista na man robes riba kareteranan ulandes. Komo ku ta kita sneu ku katapila spesial na banda drechi, e ta bai resultá na banda robes. Konsekuensha ta ku tráfiko ta pega riba un outopista mas smal. Fuera di tur esaki tin desgrasia pa motibu di slepmentu, loke ta trese mas opstákulo ainda riba kaminda. E pistanan na banda drechi ta relativamente aksesibel sí.

Korement'i baiskel tambe ta bayendo ku difikultat. Hopi siklista ta keha ku munisipionan ta limpia kaya grandi sí, lubidando 'fietspad' o sea e pista spesial pa baiskel banda di asera ku tin rònt Hulanda. Ta hende ku tin ku bai trabou i ku ta kore baiskel komo ku e distansha entre trabou i kas no ta dje grandi ei.

E rekomendashon pa hasi ménos uso posibel di trèin ta vigente ainda. Trèin ta kore wèl na Hulanda, pero muchu ménos ku nòrmal. ProRail i NS ta hasi un apelashon na públiko pa evitá biaha ku trèin, pero aparentemente no tin masha hende ta hasi kaso di e aviso akí.

Na Schiphol avionnan ta lanta buelo sí, entre otro pa Antia i Sürnam, pero sobretodo esnan ku destinu Oropa i Merka ta sufriendo retraso i mester a kanselá algun di nan. Band'i 700 pasahero a mardugá na Schiphol. E airopuerto ta konsehá tur hende pa yama nan kompania di biahe promé ku sali kas. Biaheronan ta pará hopi ora kaba den rei ta warda pa buk òf kambia di buelo.

KNMI, e servisio meteorológiko ofisial di Hulanda ta pronostiká mas yobida di sneu den oranan di atardi.