Mark Rutte, líder di partido polítiko VVD ta haña ku parlamento hulandes en todo kaso mester trata legislashon pa islanan BES, maske ku gabinete a kai. Manera el a anunsiá anteriormente, promé minister Emily de Jongh-Elhage a manda un karta pa reina Beatris, promé minister Balkenende i diferente otro polítiko na Den Haag.

Den e karta De Jongh-Elhage ta hasi un yamada pa no retrasá e proseso di desmantelashon di Antia ku kaída di gabinete. E fecha stipulá pa desmantelashon ta 10-10-10, djei Kòrsou i Sint Maarten lo por sigui komo pais outónomo den Reino. Boneiru, Sint Eustatius i Saba ke bira parti di Hulanda.

Lei di Reino
Promé ku kos yega asina leu, parlamento hulandes mester trata algun lei di Reino (Rijkswet) ainda. Esaki ta planeá pa mart i aprel. Fuera di su yamada na la Reina, De Jongh-Elhage ta hasi un apelashon ekstenso na diferente hende konserní, manera tur lider di frakshon den parlamento, pa laga tratamentu di e proposishonnan sigui no opstante kaída di gabinete. Den e karta De Jongh-Elhage ta splika mas aleu 'pakiko ta importante pa Antia i Reino pa desmantelashon sigui segun plan'.

Leinan di BES
Mark Rutte, lider di partido di oposishon VVD a bisa na radio hulandes ku e ta haña ku mester finalisá tratamentu di sierto proposishon di lei, ku a kuminsá trata kaba. VVD ta haña importante pa lei di krísis i reparashon keda tratá den senado hulandes i pa leinan di BES keda tratá den parlamento hulandes.