Den kuadro di elekshonnan benidero tur siman nos ta trese un reportahe for di e area di mas fuerte di un determinado partido. E siman aki nos ta dediká atenshon na Partido Nashonal di Pueblo (PNP) i e bario di Montaña.

Durante e ultimo elekshonnan urna elektoral # 100 Kolegio San Dominico na Montaña Rey 11 tabata e urna elektoral kaminda PNP a haña mas tantu voto. Akinan PNP a haña un total di 118 voto.

PNP kasi no ta visibel
Faltando algu menos ku dos luna pa elekshonnan tuma lugá PNP kasi no ta visibel na Montaña i bisendario. Segun esnan ku konosé historia di e partido, esaki ta un kontraste hopi grandi ku pasado kaminda semper e partido tabata bon representá i tabata sòru pa dòrna e barionan di Bandariba ku bandera. Durante un rekorido chikitu ku nos a hasi na Montaña Rey i Seru Grandi nos a topa ku unikamente un bandera di PNP i esaki tabata na kas di ruman muhé di Humphrey Davelaar, lider di PNP.

Buskando un kontesta pa e falta di visibilidat di PNP nos a papia ku algun habitante di Montaña Rey i tambe Seru Grandi. Tur ta koinsidí ku e motibu prinsipal ta e falta di kontakto direkto entre e dirigentenan di partido i e habitantenan di bario.

Relashon personal ku votadónan
Francis ‘Pèmpi’ Kleinmoedig di Montaña Rey konosé PNP hopi bon i ta kòrda kon e lidernan di bario di antes manera Dario Martha, Nai Curi i Lodowika tabata reuni na su kas huntu ku lider Dòktor Da Costa Gomez. “E lidernan di bario di e tempu ey tabatin un relashon personal ku e bario. Esei tabata e forsa di Partido Nashonal pasobra e tabatin tres palanka ku tabata konosé henter Bandariba.”

Iris Haseth a nase na Seru Grandi i for di mucha e tambe tabata un nashonalista ferviente i tabata forma parti di Hubentut Nashonal. Su kasá tabata primu di Dr. da Costa Gomez. “Tempu mi kasá tabata na bida e hendenan di Nashonal tabata bini na kas pasobra e tabata kana bario ku nan, pero despues niun hende mas di e partido no a bini serka nos”. Segun Iris ta esaki a pone ku e partido a bai atras asina tantu.

Nesesidatnan di Montaña
E nesesidatnan di Montaña i bisendario ta multiple i ta kore for di falta di sufisiente polis pa kombatí kriminalidat te na falta di sufisiente fasilidat di rekreo i deporte i falta di atenshon pa e aspekto di pobresa ekstremo. Pastor Raul Mercedes di parokia di Montaña i Erik Sofia lider di Scouting ku tin kontakto diariamente ku habitantenan di Montaña ta konfirmá esaki.