Awemainta tempran 4 or Vierdaagse di Nijmegen a start sali. E partisipantenan ta kana distansha di 30, 40 òf 50 kilometer. E aña akí kasi 43.000 kaminante ta partisipá, loke ta 3000 mas ku aña pasá. Teniendo kuenta ku pronóstiko di tempu, organisashon dje kaminata di kuater dia na Nijmegen a rekomendá e partisipantenan pa bisti paña impermeabel, o sea paña spesial pa awaseru.

Esaki ta e di 95 edishon dje kaminata internashonal di kuater dia na Nijmegen. Ta un evento deportivo anual i e aña akí 42.000 hende ke kan'é, entre nan tin antiano tambe. Kargá ku vèst, kuminda, bibida i un par di mea èkstra riba nan lomba, nan a subi kaminda pa kana e ruta djawe. Tin ta karga bandera di Kòrsou. Esun ta zwai kune asina e kuminsá kana, e otro ta preferá warda te ora solo sali.

Mea èkstra
P'e siman akí a pronostiká wer di awa, sinembargo dia a habri ku solo. Yen di entusiasmo, Eric Toppenberg, Braulio Guerrero i Rensley Victoria a tumba pa kaya.

Eric Toppenberg (42) ta kana Vierdaagse pa di seis biá. Su distansha ta esun di 50 kilometer. 'Ta e úniko spòrt ku mi ta hasiendo último tempu, mi a stòp di kore baiskel, mi a stòp di kore antó awor mi ta kana Vierdaagse...' Bou di su regenjas komun e tin tishùrt bistí. Pero el a tene kuenta tambe ku wer di awa, asina ta ku el a bin ku mea i sapatu èkstra den su tas.

Aktividat karnavalesko
Toppenberg ta rekomendá nos hendenan pa kana Vierdaagse, 'e ta leuk, i e ta un aktividat paresido na karnaval na Kòrsou.'
Braulio Jamar Guerrero (33) i Rensley Victoria ( ) tambe ta baké ku respektivamente 4 i 5 biá di partisipashon. Guerrero no a prepará dje bon ei, ku òf sin awaseru 'mi ta partisipá tòg'. Victoria sí a bin ku paña èkstra i el a sosegá bon tambe.

Evento salú
Victoria ta konsiente no solamente di importansha di naturalesa i kondishon humano- p'esei e ta menshoná enternat den su istorial personal - pero tambe di states nobo di Kòrsou komo pais, ku e ta dispuesto na eksponé den eksterior na eventonan manera Vierdaagse. En todo kaso Victoria ta konvensí di e benefisionan di kanamentu: "Kanamentu ta salú, e ta bon pa bo mente, bon pa bo salú, bon pa bo desaroyo personal."

Den kurso dje siman akí por spera mas storia i reportahe tokante Vierdaagse di Nijmegen