Sint Maarten ta kore riesgo di bira un pais bashí ku tin ménos di bisa tokante su asuntunan interno kompará ku islanan BES. Esei t'e miedu ku parlamentario Ronald van Raak di SP a ekspresá den parlamento hulandes.

Kòrsou i Sint Maarten ta bira outónomo entrante 10-10-10, pero riba e fecha ei e islanan no tin tur kos kla ainda pa nan státùs nobo. Pa kompensá esei Reino, esta Hulanda, ta bai supervisá sierto tarea via un medida general pa maneho di Reino. (Algemene Maatregel van Bestuur).

'Ta bisto ku riba sierto tereno no ta logra kumpli ku 10-10-10,' asina Van Raak ta bisa. 'Esei ta konta pa prizòn Bon Futuro i polis na Kòrsou. Pa Sint Maarten esei ta konta pa un kantidat mas di tereno.' E echo ku e ora ei den práktika Hulanda ta tuma maneho di e isla 'no tin nada di aber ku un pais outónomo,' asina e parlamentario ta bisa.

Pais bashí
Fuera di esei e parlamentario ta puntra su mes kon kos tin di kana den práktika. 'Ta for di Den Haag nos mester bai dirigí polis na Sint Maarten? Ta nos tin di bai paga esei? Mi ta teme un pais bashí.' Den pensamentu di Van Raak, mandatarionan di Sint Maarten lo tin poko kos pa hasi.

Segun Van Raak ta surgi un situashon straño. Boneiru ku ta ta bira parti di Hulanda, ta haña mas outonomia ku pais outónomo Sint Maarten. 'Futuro di Sint Maarten ta pa abitantenan di e isla. Pero 10-10-10 ta mané magia sin enkanto.

Ta estúpido ku no opstante e dudanan ku tin den parlamento hulandes, tòg a sigui ku e proseso di reforma. 'Mi tin miedu ku 10-10-10 nos ta bai dal den un muraya.'