Parlamentario di SP Ronald van Raak a entregá un moshon tokante screening di minister na Kòrsou durante un debate urgente den Tweede Kamer. Minister Piet Hein Donner di Asuntunan Interno i Relashon di Reino a desakonsehá e moshon ku lo trata otro siman.

E debate urgente a tuma lugá riba petishon di e parlamentario di SP pasobra e tin duda tokante e konklushon di minister Donner. Esaki a bisa despues di un bishita na Kòrsou ku e ministernan ta ministriabel. Anteriormente a surgi beheit tokante e ministernan pasobra no a investigá e ministernan adelantá. Seguidamente a pone Edsel Gumbs hefe di e servisio di seguridat na Kòrsou enkargá ku e screening riba non aktif.

Pidi aklarashon
Van Raak a bisa minister Donner ku añanan benidero lo e mester pidi aklarashon si surgi problemanan ku e ministernan na Kòrsou. 'E minister ta bisa ku mirando e informashonnan ku e tin awor, e no por bisa si e nombramentu di tur e ministernan ta hustu. Pero tòg e ta laga nan sigui. I di e manera ei e ta pone un stèmpel riba e gobièrnu di Kòrsou. El a tuma su ko-responsabilidat.'

Pa ofresé e minister un salida el a entregá e moshon, asina Van Raak ta bisa. E moshon ta bisa asin'akí: 'Pa medio di e debate aki Tweede Kamer ta urgi gobièrnu pa e mes hasi un investigashon mas profundo pa sa si e ministernan aktual di Kòrsou ta nombrá hustamente i ta urgi pa informá Tweede Kamer tokante e posiblidatnan pa eventualmente anulá e nombramentunan di e ministernan.'