E situashon na prizòn di Antia i Aruba ta molostiá partido GroenLinks kétubai. Sobretodo e sirkunstanshanan den prizòn Bon Futuro na Kòrsou ta preokupante, segun parlamentario ulandes Ineke van Gent. Asina ta ku e ta bai pidi aklarashon serka sekretario di estado Ank Bijleveld di Relashonnan di Rèino.

Kontenido di rapòrt

Lesando e rapòrt i su kontenido Van Gent no ta mira ningun motibu pa alegria. E ta haña ku tin hopi asuntu ku no ta kanando bon den e institutonan penitensiario. Un di e asuntunan ei ta ku e personal no ta trata e detenidonan bon. "Ainda tin tenshon i esaki ta trese riesgo tambe pa seguridat den. I ora mi lesa tur e kosnan akí, mi ta kere ku mester di bastante medida pa drecha e asuntu akí.”

Aklarashon di Antia i Aruba

Prinsipio di e luna akí (sèptèmber 2009) Bijleveld a manda e reportahe di progreso enkuanto sistema penitensiario na Antia i Aruba pa parlamentu ulandes (Tweede Kamer). E sekretario di estado ta papia di un situashon 'inaseptabel den seno di Rèino' refiriendo na prizòn di Kòrsou i n'e sèlnan di polis na Sint Maarten. Ta p'e motibu ei el a pidi aklarashon kaba serka e ministernan di hustisia di e islanan. Van Gent: “E minister di Antia ulandes entre tantu a reakshoná kaba i ta bisando di tur dos banda ku e rapòrt ta bieu i ku su kontenido no ta klòp mas."
 

Pronto por entregá pregunta por eskrito tokante presupuesto pa asuntunan antiano i arubano. “N'e okashon ei lo mi duna e asuntu akí atenshon prominentemente i lo mi hasi pregunta kla tokante e situashon manera e ta awor. Mi ta haña ku aya tambe mester di mas personal pa intensivá e programa mehorá", asina Van Gent a bisa.
 

Skucha un entrevista di kolega Scarlet Windster