Partij van de Arbeid ta temé pa libertat di prensa na Kòrsou. Motibu pa esaki ta e manera ku Helmien Wiels, lider di Pueblo Soberano a ekspresa su mes kontra redaktor hefe di Antilliaans Dagblad. Parlamentario Martijn van Dam ta mira un tendensia di intimidashon di periodista na Kòrsou i e ke pa minister Liesbeth Spies di asuntunan den Reino hasi algu.

Segun e polítiko di PvdA libertat di prensa ta un di e pilarnan di demokrasia. "Periodistanan ta praga di hendenan na poder, tambe ora nan ke públika detaye ku polítikonan ta preferá tene sekretu." Ta pesei Van Dam ta haña ku e menasanan den korantnan ta bayendo muchu leu: "Si bo ta hasi e tipo di kosnan akí komo polítiko bo ta intimidá periodista i bo ta mishi ku libertat di prensa."

Krítika di Wiels
Entretantu Helmien Wiels ta disgustá ku Hulanda ta mete den asuntu di Kòrsou. E ta haña ku Hulanda mester mete ku su mes asuntunan. Segun Van Dam kosnan ku no ta kana bon na Kòrsou ta asuntu di Hulanda tambe: "Naturalmente ta un asuntu di gobièrnu di Kòrsou i e mester aktuá tambe kontra e tipo di kosnan akí, pero regularmente gobièrnu a keda sin hasi esaki i e or'ei gobièrnu di Reino mester tuma akshon.

Segun Van Dam mester sosodé algu si, pa asina trese trankilidat bèk bou di periodistanan na Kòrsou. "Distansiá so no ta sufisiente pa kreá un klíma den kual periodistanan ta sintí nan mes seif atrobe. Algun polítiko por ofresé nan diskulpa, por ta esnan di partidonan di koalishon. E kultura di gobernashon na Kòrsou mester kambia."

Karta di Wilsoe
E motibu pa e rebolishi aki ta un karta di minister Elmer Wilsoe di PS ku Antilliaans Dagblad a publiká. Den e karta Wilsoe ta skibi gobièrnu merikano ku e ta bogá pa eleminá e beslag ku a buta riba kuentanan di banko di rifero Robbie Dos Santos. Wiels ta rabiá i e ta haña ku mester "detené" redaktor hefe di Antilliaans Dagblad.