Den publicacion haci pa e servicio di noticia y datonan financiero Bloomberg ta mustra cu PetroChina ta trahando cu PDVSA y cu posibel deal cu Valero y Gobierno di Aruba, lo ta cu e dos companianan aki of en todo caso cu un compania crea pa nan dos.

Durante e ultimo simannan comunidad ta hayando informacion cu gobierno ta den conversacion cu PetroChina pa busca un solucion pa loke ta trata e ceramento di e refineria aki na Aruba, pero te con leu cu por a compronde PDVSA no tabata forma parti di e conversacionnan.

Posibel deal
Pero den e articulo skirbi pa Nathan Crooks y Daniel Cancel tin indicacion cu PDVSA lo ta partner di PetroChina den un posibel deal pa cu nos Refineria y cu esaki lo no ta un decision cu lo por bay dura hopi.

Segun e articulo di Crooks y Cancel, e compania di e estado Venezolano, Petroleos de Venezuela S.A. miho conoci como PDVSA, ta studiando diferente manera pa uza loke nan ta yama 'idle refinaries' of refinerianan cu no ta operando den Caribe pa procesa e depositonan di crudo cu tin den e faha di Orinoco,

E articulo ta sigui bisa cu PDVSA, cu sede na Caracas, lo por a utilisa e refineria di Valero Energy Corporation na Aruba y e planta Hovensa LLC na U.S. Virgin Islands te ora instalacion pa maneho di crudo pisa keda construi na e pais, esaki segun loke un funcionario di e compania lo a declara den un entrevista, pero cu a haci esaki sin autorisacion.

Segun e reportahe di Bloomberg, Valero a bisa di 8 di mei ultimo cu nan a acepta un oferta no vinculante di $ 350 miyon pa e instalacion di un empresa cu ainda no a keda identifica pa e compania.

Joint venture
PDVSA tin joint venture cu PetroChina Co. Ltd., cu ta e division de refinacion di China National Petroleum Corporation na Venezuela. E funcionario entrevista pa Bloomberg a bisa cu a hiba conversacionnan cu Valero.

E periodistanan di e reconocido media financiero aki a purba di tuma contacto cu Valero via email y e contesta cu nan a haya di nan vocero, Bill Day tabata cu … 'e compania no ta den disponibilidad pa papia tocante e naturalesa di e discusionnan riba un posibel transaccion na Aruba.' Riba e mesun via nan a purba di haya un comentario di PetroChina, pero te na momento di publicacion di e articulo, nan no a logra haya contesta.

E mesun funcionario a bisa e periodistanan di Bloomberg cu Hovensa Refinary, cu ta un joint venture entre PDVSA y compania di New York Hess Corp, tin un importancia strategico pa PDVSA y lo por keda uza como un facilidad pa almacena petroleo.

Perdidanan
Por cierto cu e compania Hess ainda tampoco a contesta e e-mailnan caminda ta pidi e compania pa duna nan comentario riba esaki. Valero, cu base na San Antonio, a su operacionnan di e refineria na Aruba , cu tabata produci 235 mil bari pa dia, debi na e margen di ganashi pober, mientras cu Hovensa, cu ta capacidad pa procesa 350 mil bari pa dia, a cera na Februari ultimo despues di a sufri perdidanan cu ta monta un suma di 1,3 biyon doler den e ultimo 3 aña.

Venezuela, cu ta produci rond di 2.95 miyon bari pa dia na pero nan tin como meta pa yega na 3.5 miyon pa dia. Y pa logra esaki, segun e funcionario di e empresa, e compania tin proyectonan andando pa aumenta e produccion di e pozonan madura y amplia e capacidad di e loke nan ta yama e Faja Petrolifero del Orinoco.