UPB a tene su mes na palabrashon

Jopie Abraham
RNW

'UPB di Ramonsito Booi a bende tur kos pa preis di baka flaku', asina Jopie Abraham di PDB a bisa djamars, 16 di mart. Segun e bestürskolezje aktual enkabesá pa Jopie Abraham, ta e kolegio anterior ta kulpabel di mayoria problema ku tin awor den e relashon ku Hulanda. Pero líder di UPB Ramonsito Booi ta bisa ku bestürskolezje mester atené su mes na palabrashonnan hasí.

'Nos a hasi palabrashon ku Hulanda i a firma nan na aña 2006. No por neglishá otro palabrashon ku a hasi i firma p'e durante e Konferensha di Mesa Rondó asina asina tampoko. No por ta asina ku señor Abraham tabatin un otro kos na mente i awor ta komprondé e palabrashonnan hasí di un otro forma'.

Segun Booi UPB a sòru ku tin un futuro pa Boneiru, pero delaster ocho lunanan tur kos a kibra. Despues ku kos a para ketu pa lunanan, e siman akí a anunsiá tambe ku bestürskolezje di Boneiru ta bai drenta kombèrsashon ku Henk Kamp pa sòru pa e deliberashon ku Hulanda kana bon atrobe. 'Pero awor e posishon di Abraham ta débil', Booi ta bisa.

No tin espasio pa negosiashon
Introdukshon di matrimonio di homoseksual, lei di eutanasia i lei di aborto ta algun di e amiendanan ku Booi a bai di akuerdo kuné pero Boneiru mes no ta kontentu ku nan. Den e kaso di e amiendanan tin bisá tambe ku UPB no a deliberá sufisientemente bon. Pero segun Booi no tabatin espasio pa negoshá. 'Si bo bira parti di Hulanda, esei ta loke bo ta hañábo kuné. Nos a palabrá ku nos ta haña 5 aña pa nos wak kon nos tin di atendé ku esei.'

Parlamento hulandes a bisa sinembargo ku ún aña despues ku islanan BES bira parti di Hulanda, mester introdusí legislashon di aborto. 'Pero bo no por tenémi responsabel pa esei,' Booi ta bisa. 'E tempu ei nos a palabrá un periodo di 5 aña, niun hende no tabatin problema ku esei, te ora ku e grupo akí a kuminsá ta akusá Hulanda di tur sorto di kos. I esei a duna un otro grupo den parlamento hulandes chèns pa pone regla. Esei ta e realidat ku nos tin di biba kuné.'

Konfiansa a disparsé
Na aprel tin un deliberashon gubernamental i Abraham a indiká ku e ke bolbe papia ku Hulanda. 'Mi ta kontentu ku nan ta bai hasi esei, pasó nos a bringa pa esei. Ta asina sí ku ta masha difísil pa bolbe krea konfiansa den otro.' Booi ta haña importante pa e deliberashon akí tuma lugá mas pronto posibel pasó e ta na benefisio di enseñansa, salubridat públiko, seguridat, hubentut i famia na Boneiru.

Skucha Ramonsito Booi den kòmbersashon ku koresponsal René Roodheuvel (na hulandes)