Skirbí pa Ronald A. Muyden

Divishon den komunidat antiano-arubano na Zwolle ta grandi. Pa e motibu aki e grupo di trabou pa 'misa katóliko na papiamentu' a organisá un enkuentro na 'Verrijzeniskerk' den Zwolle djasabra 31 di òktober. 

“Nos a spera binti persona, te ahinda diesdos a inskribí”, segun presidente di e grupo di trabou señora Violet Roosberg den un mail ku a manda pa e grupo di trabou i panelistanan djaweps 29 di òktober último. “Mi a bai ku esaki tambe den orashon i Spiritu Santu a mustrámi ku Hesus tabatin diesdos apòstel, anto wak kuantu El a logra”, señora Violet ta sigui skirbi.

Pa bisa bèrdat un total di dieskuater persona a bishitá e enkuentro. Dies hende muhé i kuater hende hòmber. Pastor Peter van de Weide a tene e apertura di e konferensia sosial i a konta su eksperensia ku e tema divishon .“Mi mes ta bini for di provinsia Friesland i den nos seno tambe tin divishon. E habitantenan di e pueblonan chikí ta sinti nan menospresiá pa esnan ku ta biba den suidat”, asina pastor van de Weide a bisa.

Echonan
E tres panelistanan a duna nan mira personal riba e istoria, i tambe kousa i konsekuensia di divishon. Señora Juliana van Thijs ta sosiólogo, i el a skohe pa papia di tempu di katibu. “Hopi di nos no konosé nos istoria bon i dikon nos ta aktua manera tin biaha ta e kaso”, segun van Thijs.

Un periodista freelance, ku tambe tabata presente, a trese dilanti ku e kousanan, entre otro di divishon, ta ku tin hende no kier asumí su responsabilidat komo suidadano. “Nò, ta un otro mester hasié òf ta gobièrno tin ku perkurá pa nos haña un sentro pa nos tene reunion i bira mas organisá”.

Señor Gunter Zielinski, hurista i 'voorganger', a buska e konsekuenshanan a base di loke tin pará den beibel i di e amor di Dios. “E ròl di tata ta importante den un famia. Nos no mester sinta pensa muchu riba identidat, sino usa e abilidatnan ku Dios a duna nos i tin'e semper na mente”, segun Zielinski.

Miedu, disgusto i malkontentu
Den reakshon riba diskurso di e panelistanan, señora Noreen M.G. Senior, un di e partisipantenan ku ta biba na Groningen, a duna di konosé ku na su suidat nan no tin divishon. Loke e ta eksperensiá mas bien ta e temor pa tribi i hasi algu pa otro hende. Dj Dynamite ta di idea ku esaki ta debí na e echo ku hopi di e Antianonan aki ta bini di Boca Sami na Kòrsou i ku p'esei nan lo ta mas uní ku otro.  “Na Zwolle si esaki no ta e kaso. Mi mes a hasi hopi intento o a eksperensiá un ke otro komo DJ ku ta biba na Zwolle. Ta kuminsá ku algu, pero entro otro pa motibu di desunion e ta kaba na nada”, segun Dj Dynamite.

Kenneth Carolina ta hala pia for di trabou boluntario pa Antiano i Arubano na Zwolle. “No tin transparaensia den fundashon o aktividatnan organisá pa Antiano. Pa e motibu aki ta bini deskonfiansa i personanan manera ami no kier tin ni arte ni parti mas den organisashon antiano”, segun Carolina.

Kiko por hasi pa trese kambio?
 “Nos mester tribi mas pa pone “un spil dilanti otro”. Na e manera aki e persona ku hasi algu robes ta komprondé kiko ta e eror ku el a kometé. E siguiente paso ta pa duna e persona aki un konseho, pa otro biaha e sa kiko e hasi den un situashon asina” segun señora Ramona Heyliger, ku a papia pa su grupo.
E grupo di señora Senior ta kere ku mester duna mas atenshon na famia. Tin kurso adekuá ku yama 'Pa un famia felis' i ku por yuda parehanan ku kier kasa òf ku ta kasá kaba ku diferente aspekto di un relashon, inkluso tambe si tin yu envolví.

Grupo di señor Rudsel Luciano ta haña ku mester envolvé hubentut mas den asuntunan manera esun di konferensia sosial. “Nos mester siña nos yunan nos istoria, norma i balornan por ehèmpel pa medio di deporte. Pero tambe nos mester tribi di papia mas, tantu di emoshonnan positivo komo di esnan negativo”, segun Luciano.

Resultado
Señora Violet Roosberg ta satisfecho ku e enkuentro i e resultadonan. Komo presidente di e grupo di trabou 'misa na papiamentu' lo e perkurá pa distribuí e resultado pa interesadonan, implement'é den nan maneho di misa i interkambi'é  ku otro fundashonnan na Zwolle.
“Lo tene un 'follow-up' di e konferensia di awe tambe, mirando e petishon pa esaki di públiko presente. Pero hopi a bira aún mas konsiente di e divishon i nan a primintí pa ehekutá e resultadonan di e konferensia den nan bida diario”, segun Roosberg.