Munisipio karibense-hulandes Sint Eustatius e simannan ku ta bini ta pará sentral den un serie di dokumentario di e emisora públiko hulandes NTR. E dokumentarionan lo duna atenshon amplio na e malkontentu ku e status nobo ku ta sinti riba e isla.

Den publisidat pa e dokumentario tabatin hopi atenshon pa palabranan di Joshua Spanner, ku ta bisa kisas ta mihó pa atraká hulandesnan. Segun trahadó di e dokumentario Marco van Es esaki tabata un gritu di desesperashon. E tin un bista masha positivo di e habitantenan di Sint Eustatius: “Nos a haña hopi di nan dispuesto pa konta nan historia. Un hende di Statia ta un hende masha amabel.”

Sin kontakto
Van Es a ripará si ku poblashon outóktono di Statia i hulandesnan riba e isla no tin mashá kontakto. “Nan no ta meskla.” Den kada kapítulo di e serie tin dos persona sentral: un hulandes i un hende di Statia. Asina e trahadónan di e dokumentario ke mustra tur dos banda di un historia.

Manera kos ta pinta lo no t’asina ku awó lo bini mas serie tokante e otro munisipionan karibense, Saba i Boneiru. “Lo mi ke si, pasobra e islanan ta kompletamente distinto.” Pero por lo pronto van Es ta kontentu kaba ku e por duna públiko hulandes un imágen di un di e islanan i kiko ta pasando einan.

• For di djasabra dia 10 di sèptèmber lo pasa e serie Caribisch Nederland di NTR na e emisora Nederland 2. Despues por mira e serie via Uitzending Gemist.
  
• Na BVN e serie ta kuminsá djaweps dia 22 di sèptèmber