Jerson Martina, un ingeniero médiko antiano ku a kaba su estudio na Universidat Tékniko na Eindhoven, ta spera ku despues ku e doktorá, e por bolbe su isla natal Kòrsou, pa kuminsá ku henter un konsepto sientífiko médiko den e area di kardiologia. Aktualmente e ta hasi un investigashon, pa promové riba e tópiko di kurason artifisial.

Un kurason artifisial ta un aparato ku ta usa pa mantené sirkulashon di sanger serka pashènt ku ta sufri di kurason. Ta yega un momentu ku e kurason natural no por sigui laga e sanger sirkulá, loke ta pone ku e pashènt ta bira mas malu òf te asta fayesé.

Na e momentu akí tin 25 pashènt na Utrecht ku un kurason artifisial implantá. Nan tur ta den bon kondishon.
 

For di skol sekundario Jerson tabata interesá den órganonan artifisial. Tempu k'el a bai studia el a haña oportunidat pa kore stazje na Houston, Texas. El a spesialisá den malesanan di kurason, komo ku el a haña e aspekto akí masha interesante.

Bon mirá e ta un ingeniero médiko, o sea ku e ta spesialisá riba tereno di implementashon i maneho di teknologia nobo den e área médiko. E ta anhelá un karera internashonal, pero promé e ke terminá su programa di doktoral.

Rita van der Heul a kombersá ku Jerson Martina i a puntr'é kiko ta un kurason artifishal.