Loudrieth 'Mai' Leocaria (1938) ganadó di premio MAAPP 2010 pa su trabou inkansabel pa antiano na Almere, ta 'hende di tur hende'. 'Asina un persona ku konosé Mai di aserka ta deskribíé. Kaminda mester di orashon, dibèrtí mucha, kompartí ku hende muhé, yuda hende den problema, Mai tei. 'Nan por yama mi any time' asina Mai ta bisa.

Mai no por sinta ketu. E ta asina apnegá ku e ta mas prekupá ku bienestar di otronan ku esun di su mes. Pero pa Mai esei no ta niun problema. E ta bisa ku e ta purba kòrda riba su mes salú tambe pero ku esei no ta bai fásilmente.'

Dios mes ta kuidámi. T'e sa ki dia ta mi dia.' Mai tin 71 aña. E ta bsia ku tanten un hende no kaba di kumpli ku e mishon ku a pone p'e ora el a bini na mundu, e ta keda aktivo. 'Bo por kai i bolbe lanta pasó E mes ta lantábo.'

Mester di hende, no ami
Pareha Nelson i Edith Isenia konosé Mai bou di sirkumstansha masha partikular. Nan yu a haña un derame serebral ku a lag'é paralisá di un banda i e no por a papia bon mas. Despues ku el a rekuperá su situashon a bòltu te ku a disidí di duna e yu santolio. Nelson i Edith a disidí di yama Mai.

'Mai a bini i resa ku nos.' Diripente e yu su kurpa a kuminsá ta drecha atrobe. E eksperensha akí tabata asina impaktante ku te awe famia Isenia su hemut ta yena ora nan papia di dje. Mai ta wak e loke a sosodé di un otro ángulo.

E ta konta ku famia Isenia ta 'hendenan di fe.' 'Nan ta konfia den Dios. Na un momento duru asina nan mester di hende, no ami, pero mas hende pa yuda nan. Na opinion di Mai ta Dios mes a manda otro hende pa e pareha. 'Pa enkurashá nan pa lanta nan fe te ku algu inkreíbel a pasa.'

Yuna
Un señora ta konta ku Mai ta asina hende di tur hende ku 'ora e ta ku mucha Mai kier sa ku e tambe ta mucha meimei di nan.' Ni su edat ni su salú lo no stroba Mai pa sigui hasi obra pa esnan ku mester. E ta diabétiko i e ta sufri di kurason. Pero esei no ta kita ku pa Mai Bièrnè Santu ta dia ku e tin di yuna. E ta konsiente ku su salú no ta pèrmití esei pero 'mi ta bai buska un forma pa mi yuna tòg.'

Skucha un entrevista di Marlon Reina ku Mai Leocaria