Un mayoria dje komunidat boneriano na Hulanda ta di opinion ku ta mihó pa no tene un referèndem tokante futuro dje isla. Eric Molina, penshonado boneriano bibá na Hulanda ta bisa, ku awor ta muchu lat pa kambia e proseso di restrukturashon estatal. "Si Boneiru kier a hasi algu, mester a hasi'é for di un prinsipio", segun Molina.
 

Komunidat boneriano na Hulanda ta sigui e desaroyo estatal n'e isla di aserka. Gobièrnu di Boneiru  a disidí kaba ku mester bin un referèndem pa sa si Boneiru ke un relashon di 'asosiashon liber' ku Hulanda. Eric Molina i tambe otro Boneriano na Hulanda no ta di akuerdo ku e posishon nobo ku Boneiru a asumí. E ke pa Boneiru sigui bou di ala di Hulanda. Molina: "Boneiru ya ta hopi isolá i no ta produsí nada mas. Relashonnan mas amplio ku Hulanda, esta di asosiashon liber, ta difísil. Mester a mobilisá pueblo mas tempran i no pone firma i hasi palabrashonnan."

Bob Wit

Konosido wes Bob Wit, ku aktualmente ta wes den Korte Karibense na Trinidad i Tobago, no ta kompartí e opinionnan akí. E ta bisa ku segun reglanan di derecho internashonal no tin mag di integrá Boneiru i hasi'é parti di Hulanda, sin ku pueblo boneriano a disidí i aprobá esaki eksplísitamente. Bob Wit a splika esaki ampliamente den un karta ku el a manda pa Jopi Abraham, lider polítiko di Partido Demokratiko Boneriano. Wit ta bisa asta, ku tur e argumentunan ku Hulanda ta usa pa splika ku no tin alternativa konstitushonal, no ta válido. Boneiru mester por tene un referèndem, pero ku un pregunta adaptá i kambio di fecha, segun wes Bob Wit.
 

Molina ta bisa ku si Boneiru ke drai tur kos bèk tin chèns ku ta pèrdè tur kos. "Ora Makamba drenta bo lugá i e dunábo un depchi, e ta saka 25 sèn for di bo. Tur hende sa esei mashá bon. Awor nan por bisa 'take it, or leave it'.

Bobedat
Lo ta un bobedat di Boneiru si e ekskluí su mes i e no sinta na mesa ku Hulanda pa e deliberashon riba nivel gubernamental, segun Molina. "Bo no por defendé bo mes si bo no tei. Bo ta traha akuerdo ku enemigu i no ku amigunan."
 

Skucha Eric Molina den kòmbersashon ku Belkis Osepa