"Pais Antia Hulandes no ta reda mas pa e islanan." I: "Palabrashon ta palabrashon." Ku e palabranan klave ei sekretario di estado demishonario Ank Bijleveld di Relashonnan den Reino a resumí ku renobashon estatal no por bati retirada mas. E último debate den parlamento hulandes, promé ku klousura di Konferensha di Mesa Rondó (RTC) pues a enfoká primeramente riba algun opservashon polítiko den margen enkuanto e proseso di  refornashon.

"A bira tempu pa desishonnan definitivo", segun Bijleveld den e debate plenario. E puntonan mas problemátiko ku a bini dilanti durante e anochi tabata limitá. E opstákulo mas grandi serka kasi tur partido polítiko hulandes tabata aprobashon repentino di un areglo di penshun masha favorabel pa ámtenarnan kurasoleño dia 5 di sèptember último, e dia ku a instalá Kolegio Insular nobo. Ineke van Gent di GroenLinks a kalifiká e areglo komo un 'tribilidat gubernamental di marka mayó'. Ronald van Raak (SP) kièr sa ku e areglo aki ta pone hende bira "mashá rabiá mes" na Kòrsou.

Areglo di penshun
Ta p'esei Bijleveld a risibí pues e petishon pa investigá si ta posibel pa anulá e desishon aki tokante areglo di penshun. Esaki a sosodé na dos okashon kaba ku e bendita areglo (na 2007 i 2009). E sekretario di estado a duna di konosé di a pidi Kòrsou pa aklarashon di e asuntu aki. E ta bai wak si ta posibel i nesesario pa tuma medida. Tambe lo e wak si e areglo ta kuadra ku e lei di reino Supervishon Finansiero (Financieel Toezicht).

Konferensha di emergensha
Un otro punto trabahoso ta e komentario ku vários parlamentario hulandes a yega di trese dilanti i ku nan ta blo ripití, esta ku e islanan 'no ta kla' ainda pa nan statùs nobo. Van Raak: "Nos ta drèi pone un bohio anto bisa ku ta un palasio e ta, siendo ku nos a primintí un palasio." E ta kere ku habitantenan dje islanan lo keda perhudiká si dal bai ku desmantelashon 10 di òktober 2010, asina ta ku el a entregá un moshon k'e petishon pa suspendé Konferensha final di Mesa Rondó i pa konvoká un konferensha di emergensha na su lugá, pa papia rib'e situashon na e islanan.

Moshonnan
Eric Lucassen di PVV a entregá un moshon pa para saniamentu di debe i medidanan di yudansa pa Kòrsou, komo ku e isla - segun e antó - ke dal paso riba término korto pa bira independiente. Den su segundo moshon, Lucassen a hasi un apelashon pa no ehekutá 'Koninklijk Besluit' pa modifikashon di Statüt, algu ku tur partner den Reino a kumbiní ku otro kaba. E ta haña ku Kòrsou i Sint Maarten no a kumpli ku tur kondishon pa pasa pa statùs di pais.

VVD tambe a entregá un moshon. André Bosman a pidi ku masha énfasis pa inkorporá resiprosidat den e lei di reino enkuanto tráfiko di persona, o sea ku e ta konta tantu pa Hulanda komo pa e islanan di Reino ulandes. E lei aki, ku un gabinete ulandes nobo mester trata ainda, tin ku regla tráfiko di persona entre Hulanda i e islanan. Bijleveld a bula aden bisando ku e lei no ta den e pakete di legislashon estatal i ku ta p'e motibu ei no a trat'é ainda. E ta laga un gobièrnu nobo husg'é.

Awe djárason 8 di sèptèmber ta vota enkuanto e moshonnan akí. Por lo demas Bijleveld a desakonsehá Parlamento ulandes di aprobá e tres promé moshonnan.

Grupo piloto polítiko

Promé ku e debate a kuminsá tabatin un reunion djun Grupo Piloto Polítiko den Hotèl Hilton pegá ku edifisio di Tweede Kamer. Einan e delegasonnan dje islanan i di Hulanda a trata na kita algun opstákulo riba kaminda, bayendo pa e Konferensha Final di Mesa Rondó. Asuntunan kandente den e enkuentro tabata entre otro e demanda pa mayor outonomia dje gobernantenan nobo di Kòrsou, e nesesidat pa asistensia hurídiko di Sint Maarten i e posibel korupshon serka sekshon di Ordenamentu i Maneho urbano na Sint Maarten.

Difikultatnan fiho manera supervisho finansiero, Refineria Isla i prizòn Bon Futuro na Kòrsou i tambe funshonamentu di polis na Sint Maarten tambe a ser tresé dilanti den e reunion.