Awe, djaweps 9 di sèptèmber ta formalisá desmantelashon di pais Antia. E último Konferensha di Mesa Rondó pa yega na desmantelashon di Antia a kuminsá 2 or di mèrdia, ora hulandes.

Ya kaba reina Beatris a firma e Desishon Real pa e Lei di Reino modifikashon di Statüt relashoná ku desmantelashon di Antia, asina sekretario di estado Ank Bijleveld a bisa Wereldomroep awe.

Na fin dje Konferensha di Mesa Rondó akí falta so pa e otro partnernan den Reino firma. Bijleveld ta kontentu ku tur kos a sali bon: 'Ami ta haña e filandl dje Konfrensha di Mesa Rondó algu netamente simbóliko, nos a hasi tur lo posibel pa kita e opstákulonan ku tabatin riba kaminda.'

Schotte
For di 13.15 di mèrdia invitadonan ta kana pasa lihé riba e tapeit kòrá. Gerit Schotte, lider polítiko nobo di Kòrsou i aspirante pa bira promé  minister di pais Korsou, sa kaba kiko ta e promé kos ku e ta bai hasi despues di 10-10-10. 'E teip kòra (burokrasia), mester kaba  kuné. Nos ke goberná mas serka pueblo. Nos tur ke un mihó Kòrsou. E ta kla pa bai goberná. Schotte ke pèrkurá pa studiante antiano bolbe nan isla bèk ora nan kaba ku nan estudio. 'E ora ei nan por duna bèk loke nan a logra komo profeshonal na Hulanda.'

Elhage i Duncan
Emily de Jongh-Elhage, e delaster promé minister di Antia, ta orguyoso ku lo logra e fecha di desmantelashon esta 10-10-10. 'Tur kambio ta hasi doló un ratu, pero esaki ta deseo di pueblo di Kòrsou.' E ta bisa tokante su posishon nobo den oposishon : 'Mi ta sigui sirbi pueblo.'
Ronald Duncan, minister antiano di Asuntunan Estatal, tambe ta kontentu i en partikular pa su isla Sint Maarten. 'Nos ta spera ku nos ta haña chèns pa hasi e trabou. Por i nos mester di kurashi pa hasié.

Marlin
Lider polítiko William Marlin di Sint Maarten ta kontentu i no ta mashá prekupá ku influensha hulandes den e proseso di desmantelashon. 'No ta asina ku Hulanda tin masha influensha. E plannan di enfoke no ta un forma di supervishon superior. Nos mes a traha nan i nos mes ta bai paga i ehekutá nan. ' Will Johnson, parlamentario di Staten, tin sentimentu miksto riba e dia akí. 'Semper nos a traha bon ku e otro islanan antiano.'

Brinkman
Parlamentario Hero Brinkman di PVV ta un dje pokonan ku no ta drenta Ridderzaal kontentu. E ta keda di opinion ku e sèn ku e islanan ta haña pa saneamentu di debe ta  'sen di  impuesto hulandes i ku ta drispidié.'Pero pa e mes tambe tin algun punto positivo: 'Mi ta kontentu ku hendenan na Kòrsou i Boneiru a lanta for di soño i ku nan a bai pensa tokante outodeterminashon.' Brinkman lo preferá ku tur e seis islanan ta bira kompletamente independiente pa asina HUlanda no tin nodi mas di invertí sèn ei.