Tweede Kamer o sea parlamento ulandes lo sigui definitivamente ku tratamentu di e leinan di Konsenso di Reino. Djaweps, 11 di mart a disidí esaki den e debate plenario. Tweede Kamer a determiná kua dje tópikonan lo pasa pa gabinete ulandes nobo trata nan despues.

E proseso di reformashon estatal di Antia ulandes tabata foko di e debate parlamentario enkuanto e lista di temanan kontrovershal. Tantu PVV, SP komo VVD a kritiká e partidonan fuertemente, esta esnan ku ta insistí pa sigui ku tratamentu dje leinan di reformashon, maske ku gabinete ulandes a kai.

Asuntunan importante manera oumento di edat di derechi di penshun di behes, esta AOW i pedido di avion di kombate tipo Joint Strike Fighter (JSF) sí a laga na enkargo di gabinete nobo pa atendé ku nan. Mayoria partido ke dal bai sin mas ku e leinan di Reino, apesar dje periodo demishonario di gobièrnu ulandes. Echo ta ku a kuminsá ku e proseso di renobashon estatal di Antia ulandes for di tempu ku e anterior gabinetenan a sinta.

Scarlet Windster den kòmbersashon ku Leila Wijnhoven tokante leinan di Konsenso di Reino (Pap)

PVV, SP i VVD a bolbe hasi un intento pa deklará tratamentu dje leinan di reforme komo kontrovershal. E partidonan akí a entregá vários amienda, komo ku no a konsiderá tratamentu dje leinan di reforme komo kontrovershal den e reunion di prosedura komun di komishon parlamentario permanente, enkargá ku asuntunan antiano i arubano, o sea NAAZ.

Mayoria
E diskursonan di Hero Brinkman di PVV, Johan Remkes di VVD i Ronald van Raak di SP no a impreshoná e otro partidonan mashá. Un mayoria a vota pro tratamentu dje leinan di konsenso di Reino pa no stroba ni tarda avanse di e proseso di desmantelashon di Antia ulandes.

Durante e debate a bin realisá ku e fecha di disolushon, esta 10-10-'10 kon ku bai bin por ta muchu prematuro. Remkes a bolbe kuestioná e fecha akí ku sekretario di estado Ank Bijleveld di Relashonnan di Reino a menshoná.

Debate den Tweede Kamer tokante lista di tópiko kontrovershal (na hulandes)